4
Râsi jaŋe ufuŋ gie i hetâtiembiŋ
1 Juda â Benjamiŋ guru kâpâcwâruo bacjopa rambiŋkonec risiembiŋ jaŋe Israere Wofuŋ Anuture taha ufuŋ i mocwâc bahuc juŋgopieŋ, kisâfâc‐jeŋic jaŋe biŋe iŋuc manambiŋ. 2 Manarâ Serubabe â garikiŋ sâc irec micne jaŋerao rarâ ʒiŋuc jazambiŋ: “Ŋoŋe eeŋgopieŋ irec sâc jaha nâŋe Anutu‐ŋeŋic dapecneeŋgopeneŋ, irec ufuŋ i ŋoŋehec mâmâc banʒepeneŋ. Erâ nâŋe Asiria ŋicwofuŋ Esahadoŋzi bacnâpo fisi ʒira râec‐nâpowec dameŋ ira fuŋkerâ Anutu taha bâzi rikecnembeŋzi rikecnehuc juŋgopeneŋ.” 3 Jaŋe iŋuc mupie Serubabe â Jesua erâ Israe maŋnao garikiŋ sâc irec micne jaŋe kecʒiŋuc jazambiŋ: “Ŋoŋe nâŋehec Anutu‐nâŋecte ufuŋ moc mi baniŋmu. Nâŋe Wofuŋ, Israere Anutu ere ufuŋ i Perisia ŋicwofuŋ Kiruzi munârewec irec sâcko bucnâŋec banaŋmu.”
4 Inuc mupie ŋic ŋokac mâreŋ rune jaŋe Judaŋiczi ufuŋ ʒuhuckerâ banʒipiŋte mu bâdoc ejarehuc hâhâwic hejarembiŋ. 5 Ehuc Judaŋic jaŋere mamanasu qahuc dâŋgieo râec‐jopaniŋte ŋic micne furi jarembiŋ. Mâsi i Perisia ŋicwofuŋ Kirure dameŋko fuawec erâ wâc ere faicnao Perisia ŋicwofuŋ moc, ʒâŋene Dariusi ere dameŋko fuawec jaha.
6 Eme juku Ahasiwerozi fuŋkerâ ŋicwofuŋ erâ juwec dameŋ ira mâreŋ rune jaŋe Juda â Jerusalem hae mâreŋ rune dâŋ qajarehuc papia qâreŋkecnembiŋ.
7 Eme Arataʒeʒere dameŋko Bisilam â Mitiredate â Tabele, erâ âgofâc‐jeŋic sasawa jaŋe Perisia ŋicwofuŋ Arataʒeʒe e papia qâreŋkecnembiŋ. Erâ papia i Aramaia dâŋko qâreŋkekicnere bâtikiembiŋ. 8 Momori micne Rehum â qâqâreŋ ŋic Simisai jahe Jerusalem hae râsi rocnehuc papia moc qâreŋkerâ ŋicwofuŋ Arataʒeʒerao râepire rawec. 9 Papia i ŋic ʒiŋuc jaŋe qâreŋkembiŋ: Momori micne Rehum â qâqâreŋ ŋic Simisai erâ âgofâc‐jekic gâcne, mumutara ŋic â mâreŋ soŋaŋ â ŋic fekicne, erâ Perisia ŋic â Ereki ŋic â Babeŋic erâ Elamŋic Susa haeonec. 10 Erâ ŋic kâcɋene â fekicne Asinapazi ŋic gurune gurune rocjoparâ Samaria hae sâc â Eufrata opâ ocniŋuc mâreŋ fowec ira râec‐jopame jumbiŋ jaŋe mâmâc qâreŋkembiŋ. 11 Jaŋe papia kecʒiŋuc hâcne râepie rawec: “Ŋicwofuŋ Arataʒeʒe, kiŋaŋ qaqafâcge Eufrata opâ ʒiŋucpec juŋgopeneŋ nâŋe gore manasuhuc dâŋ ʒi râe‐gareŋgopeneŋ. 12 Judaŋic goraonec wefumbiŋ jaŋe Jerusalem haeo rafârembiŋ, iŋuc manazemec. Jaŋe maŋrâŋgeŋheczi hae sâqocne i mocwâc heɋârerâ baŋgopieŋ. Jaŋe haesacte hobeteŋ sasawa bâpiaŋkehuc bafâreŋgopieŋ. 13 Irec ŋicwofuŋ go kecʒiŋuc manapaŋkec: Hae ʒi heɋârerâ bahuc haesac ʒeŋgoma batara‐fâreniŋmuo ine sahac taha hatane fuŋne fuŋne i mi râeniŋmu, eme ŋicwofuŋ gorao moneŋ fisiekac hata i ʒickeocmu. 14 Nâŋe ŋicwofuŋ gohec jupene aŋacne eekacte go araŋ bagarehuc dâŋ ʒi mufua‐gareŋgopeneŋ. 15 Irec go apa ŋosafâcge jaŋere gie binaŋte papia qizecko dâŋ kecʒiŋuc fokac i bâfuacmurâ wose gufuc ezemec: Hae ʒirec rune jaŋe maŋrâŋgeŋhec erâ ŋicwofuŋ â mâreŋne mâreŋne irec râsi sanaŋ, jaŋe juwicnaonecteaŋ maŋrâŋgeŋ bâfua warehuc jumbiŋ. Eme irec hâcne hae ʒi sesuctac fuawec fokac. 16 Nâŋe ŋicwofuŋ go ʒiŋuc gazaŋgopeneŋ: Hae ʒi heɋârerâ bahuc haesac i batara‐fâreniŋmo ine go Eufrata opâ ʒiŋucpec mâreŋ fokac irec rune mocwâc mi jucmu.”
17 Eme ŋicwofuŋ e okacne ʒiŋuc râeme rawec: “Momori micne Rehum â qâqâreŋ ŋic Simisai erâ âgofâc‐jekic Samaria mâreŋko â Eufrata opâ ocniŋuc mâreŋ fokac ira juŋgopieŋ ŋoŋe bubiaŋ dâŋ râe‐ŋarekopac. 18 Papia râe‐narembiŋ i furu jaha wose‐narembiŋ. 19 Eme no ŋic gâcne ejarepe wose gufuc eku ʒiŋuc bâfuambiŋ: Jerusalem hae rune jaŋe ŋicwofuŋ râsi ejarehuc maŋsanaŋ â maŋrâŋgeŋ bâfua warehuc jumbiŋ sanaŋ. 20 Ehuc ŋicwofuŋ tai tâpiri sâko‐jeŋichec jaŋe Jerusalem hae soŋaŋkehuc Eufrata opâ ocniŋucnao mâreŋ fokac i wâc mâmâc soŋaŋkembiŋ. Ehame sahac taha hatane fuŋne fuŋne jarehuc jumbiŋ. 21 Irec ŋoŋe ŋic keci qatara‐jarepie hae i mocwâc mi heɋârenʒepieŋ. Eme jaŋe mâc juhapie noni mutara‐jarepe banʒepieŋ. 22 Ŋoŋe ŋicwofuŋtao sisipiric â ima samaki fuazacte wiac i aimuŋ jaha soŋaŋkehuc ebac enʒepieŋ.”
23 Eme ŋicwofuŋ Arataʒeʒere papia i Rehum â qâqâreŋ ŋic Simisai erâ âgofâc‐jekic wose‐jarepie jaŋe picpac jaha Jerusalem haeo Judaŋic jaŋerao rarâ, hae heɋârerâ bapa gie i beheniŋte tâpirihec jaha qatara‐jarembiŋ. 24 Eme Anuture ufuŋ Jerusalem haeo ŋewec irec gie i bâniniŋkembiŋ. Bâniniŋkepie foha juku Perisia ŋicwofuŋ Dariusizi ŋicwofuŋ erâ juha jara jajahec maickewec.