9
Anutuzi Noa â kikefuŋfâc‐ticne dâŋ jazahuc jambuŋ‐jopawec
1 Eme Anutuzi Noa â ŋokâfâcne ʒiŋuc muhuc jambuŋ‐jopawec: “Ŋoŋe fua sawec ehuc mâreŋ ŋefusucmanʒepieŋ. 2 Erâ kâte qowi â sawa wipe jaŋe ŋoŋere hâhâwic bahuc wise wise junʒepieŋ. Homa gisic wiac mâreŋko foforâ juekac â hâwec qowi jaŋe mâmâc ŋoŋere meo râec‐jopa‐fârekopac. 3 Erâ monʒaŋ wiac ŋarekopac i â wiac jujune qiriŋ‐ticnehec i nânâ‐ŋeŋic efârezejec. 4 Mocjaha, qowi socnehec ine mi nânʒepieŋ! Erâ ʒiŋuc mananiŋ: 5 Socŋeŋicte okacne i noni batarapemu. Ŋicjuju irec okacne qowi jaŋerao, me ŋic jaŋerao, me âgo soctofa jaŋerao i nonizia batara‐jâmbâŋkepemu. 6 Ŋic e mocte hawario mâcne, Anutu nore hawarire sâcko bakicne, irec moc e ŋicsoc hoŋkeocmu, ere soc ŋiczia wâc hoŋkenʒepieŋ. 7 Ŋoŋe ine ukichec ehuc sawe mâririackenʒepieŋ. Eme mâreŋ rauckehuc guriŋne banʒepieŋ!”
8 Anutuzi iŋuc murâ Noa â ŋokâfâcne ʒiŋuc jazawec: 9 “No ʒi ŋoŋe â ɋâricfâc‐ŋeŋic ŋoŋehec ʒâʒâfic sanaŋ ekopac, 10 erâ wâc wiac jujune sasawa, ŋoŋehec wokeonec wahambieŋ, jaŋehec mâmâc, wipe â kâte qowi â hae qowi sasawa, 11 ŋoŋehec mâmâc ʒâʒâfic sanaŋ ekopac, irec rumi sâko mocwâc fisirâ mâreŋte wiac jujune â mâreŋ e jahacne mi imac‐ŋopa‐fârezejec!” 12 Erâ Anutuzi ʒuhuckerâ muwec: “No ʒi ŋoŋe â wiac jujune sasawa ŋoŋehec ʒâʒafic sanaŋ ekopac. 13 Irec maqâreŋ‐nane huriri keci sawao râekopac, izi ʒâʒâfic‐nâŋecte ma ezejec. 14 Nore micte hoe karorac qâzuckeha manane i sawao fuame 15 no ʒâʒâfic sanaŋ irec manasupemu, ehame opâ rumi sâkozi mâreŋte wiac jujune mocwâc mi imackezejec. 16 Eme no huriri hâcne karoracko domaocmu sâc, ʒâŋitahuc mâreŋko wiac jujune sasawa ŋoŋehec ʒâʒâfic sanaŋ epo irec manasupemu.” 17 Anutuzi iŋuc murâ ʒuhuckerâ Noa ʒiŋuc âzâcnewec: “Mâreŋko ŋoŋehec ʒâʒâfic sanaŋ ekopac irec ma ine hâcne!”
Noa â ŋokâfâcne
18 Noare ŋokâfâc wokeonec wahambiŋ jaŋere ʒâŋe Sem, Ham â Jafete. Ham e ine Kanaaŋte mamac. 19 Ŋic jahec â moc keci jaŋe hâcne Noare ŋokâfâc, jaŋeraonec mâreŋŋic gurune gurune fua sawec ewarekicne.
20 Noa e ine hesarac ŋic juwec, ehuc waiŋ gie wâc fuŋkewec. 21 Juku waiŋ opâne barâ nâku maŋne bibiriwame qoruc boze‐ticnao waha iŋke aŋke ehuc fowec. 22 Eme Ham, Kanaaŋte mamac hâcne, e mamac‐ticne Noa ere fuŋne honehuc hahac jahec‐ticne mâreŋko hu dâŋ binaŋ ejactewec. 23 Eme Sem â Jafete jahe ŋaqi moc rorâ ɋawe‐jekicko râehuc rârâpe bozeo raʒirâ mamac‐jekic biuctac fohame mi honehuc qofackepic. 24 Eme Noa e waiŋzi qame guŋ sanaŋ foweckonec ɋârerâ motec‐ticnezi wiac kosa ecnewec irec dâŋ manarâ ʒiŋuc muwec:
25 “Sâweczi Kanaaŋ ere faio fezejec,
e hahac jahec‐ticne jahere kiŋaŋ motec wawahane juzejec!”
26 Iŋuc murâ ʒiŋuc ʒuhuckerâ muwec:
“Wofuŋ Anutu‐nanezi Sem jambuŋkezejec
ehame Kanaaŋ e ine kiŋaŋ motec‐ticne juzejec!”
27 Erâ ʒuhuckerâ muwec:
“Anutuzi Jafete bafickeme sawe mâririackezejec,
ehame ɋâricfâc‐ticne jaŋe Semte ɋâricfâc
jaŋehec ŋeŋe juju enʒepieŋ,
â Kanaaŋ e ine kiŋaŋ qaqa‐ticne ezejec.”
28 Rumi sâkozi omaeweckonecteaŋ Noa e jara 350 ʒuhuckerâ juwec. 29 Juku jara 950 bazurâ hâmowec.