11
Dâŋmarac bârâwiŋnekicne
1 Mâreŋŋic sasawa dâŋmarac‐jeŋic mocjaha fowec â wiac ʒâŋene ʒâŋene ijaha sasawa mujumbieŋ. 2 Eme jaŋe ʒoaŋ wewefunaopec rahuc juku Sina mâreŋko wâneŋ sâko moc bâfuarâ ira fic hae erâ jumbiŋ. 3 Erâ kecʒiŋuc muc manac embiŋ: “Ajoc, nâŋâc afe qâhâckerâ ʒocko rikepene sanaŋkeoc.” Eme afe sanaŋkekicne izi fic bapa qânâ ejarewec â mâreŋ maŋkonec sâfâ izi simeŋ ejarewec. 4 Eme mumbiŋ: “Ajoc, nâŋâc hae sâko moc barâ ficʒora moc feŋgaŋne feŋgaŋne râe fekupene botâŋnezi sambâŋ âke uazejec. Eme ʒâŋe biŋehec erâ siŋsaŋ qahuc mâreŋne mâreŋne mi ranʒepeneŋ.” 5 Iŋuc murâ hae sâko â ficʒora bambiŋ i Wofuŋzi honeocte wahawec. 6 Erâ muwec: “Jâmbomac, jaŋe ŋicguru mocjaha â dâŋmarac‐jeŋic wâc mocjaha, erâ gie baniŋte mu biric embieŋ i mâc fufuŋkene sawa. Efehuc fârine quŋquŋke tâmiric bâfuaniŋmu. 7 Ajoc, nâŋâc hurâ dâŋjeŋic bâsifuckepene dâŋte kâuc babac enʒepieŋ.” 8 Wofuŋ e iŋuc muhuc irecnec bârâwiŋ‐jopame mâreŋ sâc rafârembiŋ, ehuc hae qizec sâko bapa i behembiŋ. 9 Wofuŋzi hae ira hâcne mâreŋŋic dâŋjeŋic bârâc qârâwiŋneme fâuckehuc mâreŋ sâc rafârembiŋte hae irec ʒâŋe Babe* Nâŋâcne dâŋko: Bârâwiŋ. mumbiŋ.
Semte ɋâricfâc jaŋere ʒâŋe biri
(Bin I 1:24–27)
10 Kecʒi Semte ɋâricfâc jaŋere ʒâŋe biri: Sem e jara 100 bazume ere bifuŋko Arapakisa fuawec, ine rumi sâko omaewec irec faicnao jara 2 tarame fuacnewec. 11 Sem e Arapakisa fuawec dameŋ irecnec jara 500 ʒuhuckerâ juhame ere bifuŋko naru motec gâcne fua fembiŋ.
12 Arapakisa e jara 35 bazume ere bifuŋko Sela fuawec. 13 Eme Arapakisa e Sela fuawec dameŋ irecnec jara 403 ʒuhuckerâ juhame ere bifuŋko naru motec gâcne fua fembiŋ. 14 Sela e jara 30 bazume ere bifuŋko Ebere fuawec. 15 Eme Sela e Ebere fuawec dameŋ irecnec jara 403 ʒuhuckerâ juhame ere bifuŋko naru motec gâcne fua fembiŋ.
16 Ebere e jara 34 bazume ere bifuŋko Pelege fuawec. 17 Eme Ebere e Pelege fuawec dameŋ irecnec jara 430 ʒuhuckerâ juhame ere bifuŋko naru motec gâcne fua fembiŋ.
18 Pelege e jara 30 bazume ere bifuŋko Reu fuawec. 19 Eme Pelege e Reu fuawec dameŋ irecnec jara 209 ʒuhuckerâ juhame ere bifuŋko naru motec gâcne fua fembiŋ.
20 Reu e jara 32 bazume ere bifuŋko Serugu fuawec. 21 Eme Reu e Serugu fuawec dameŋ irecnec jara 207 ʒuhuckerâ juhame ere bifuŋko naru motec gâcne fua fembiŋ.
22 Serugu e jara 30 bazume ere bifuŋko Naho fuawec. 23 Eme Serugu e Naho fuawec dameŋ irecnec jara 200 ʒuhuckerâ juhame ere bifuŋko naru motec gâcne fua fembiŋ.
24 Naho e jara 29 bazume ere bifuŋko Tera fuawec. 25 Eme Naho e Tera fuawec dameŋ irecnec jara 119 ʒuhuckerâ juhame ere bifuŋko naru motec gâcne fua fembiŋ.
26 Tera e jara 70 bazume ere bifuŋko ŋokâ ʒiŋuc fuacnembiŋ: Abram, Naho â Haraŋ.
27 Kecʒi Tera ere ɋâricfâc jaŋere ʒâŋe: Tera ere bifuŋko Abram, Naho â Haraŋ fuambiŋ. Haraŋ ere bifuŋko ine Loti fuawec. 28 Haraŋ e ine mamac‐ticne Tera juhame Kaldea mâreŋ qizec‐ticnao Uru hae ira hâmowec. 29 Eme Abram â Naho jahe ŋokac ropic. Abram e ŋonâŋ‐ticne Sarai rowec, â Naho e Haraŋte otâ Milika i ŋonâŋ‐ticne rowec. Haraŋ e otâ jajahec jucnepic, Milika â Isika. 30 Sarai e ine ŋokac hufiŋne naru motec tâmiric juwec.
31 Eme Tera e ŋokâ‐ticne Abram â ŋosa‐ticne Loti, Haraŋte ŋokâ hâcne, â joŋao‐ticne Sarai, Abramte ŋonâŋ, iŋuc rocjopame Kanaaŋ mâreŋko raniŋte Kaldea mâreŋko Uru hae ŋewec i beherâ hata fuŋkembiŋ. Raku hata ombâŋko Haraŋ mâreŋko fisirâ ira ŋembiŋ. 32 Terâ e jara 205 bazurâ Haraŋ mâreŋko ira hâmowec.