21
Isaka fuawec
Eme Wofuŋ e Sara iqickerâ mupaŋkecnewec irec sâc jauŋkehuc bafickewec. Eme Abraham e ŋicqizec eha Anutuzi dameŋ bacnewec i maickeme Sara e motec moc kiweckerâ rowec. Eme Abraham e ŋokâ fuacnewec, ere ʒâŋe Isaka muwec. Erâ Abraham e ŋokâ‐ticne Isaka fuarâ fohame ʒoaŋ gie bapa 8 tarame Anutuzi mucnewec irec sâcko hezuwec. Abraham e ine jara‐ticne 100 eha ŋokâ‐ticne Isaka fuawec. Eme Sarazi muwec: “Anutuzi hata banarewec i honepe gâgâwine ekac, irec binaŋ ʒi mananiŋmu jaŋe gâwie‐nareniŋmu wâc.” Erâ muwec: “Mozi mo Abraham ʒiŋuc âzâcnezac: Sarazi kogoc moc sâcne moŋ gumeocmu? Eme Abraham e ŋicqizec eha no sifu ŋokâ moc ropo.”
Abrahamzi Ismae tuŋkewec
Eme motec e sokarâ moŋ natarame Abrahamzi tiwâ bâzi sâko moc rike bâmoc eme nâmbiŋ. Eme ʒoaŋ mocko Aigita ŋokac Hagare ŋokâ e Isakahec mamasiri erâ gâwiepire Sarazi hone manac ejactewec. 10 Irec Abraham ʒiŋuc âzâcnewec: “Go kiŋaŋ ŋokac keci ŋokâ‐ticnehec tuŋjofazemec. Kiŋaŋ ŋokac keci ere ŋokâzi nore ŋokâ Isaka ehec merâfâc wiac‐nâhec mâmâc mi rauckezepirec.” 11 Abraham e ine ŋokâ‐ticne Isimae ere busâqoc manarâ Sarare dâŋ maname mi sâckewec. 12 Anutuzi ine Abraham ʒiŋuc âzâcnewec: “Go motec â kiŋaŋ ŋokacge jahere busâqoc mi manac. Sarazi dâŋ gazakac i reŋkezemec. Isakare ɋâricfâc jaŋe sawa gore ʒâŋe biŋe rauckeniŋmu. 13 Eme kiŋaŋ ŋokacte ŋokâ e gore ɋâric ekacte iŋuc jaha ecnepe ɋâricfâcne jaŋe ŋicguru sâko eniŋmu.”
14 Eme Abraham e furicte faharerâ poroŋ â ʒopo opâhec Haga râcnerâ motec âsi‐ticnao herâ sorec‐jofame rapic. Rarâ Bere‐Seba haeopec mâreŋ burocnao qâsoriehuc jupic. 15 Eme ʒopoo opâ ʒickeme Hagazi motec jâcdutu moc ira domawec irec mumucko râewec. 16 Erâ tepe moc qâtâcnepene raekac irec sâc rarâ taicko ŋewec. Ʒiŋuc muhuc ewec: “No motec hâmorâ foha wemocko honepemu.” Iŋuc murâ motec fowec ocniŋucnao ŋehame moteczi ki kâcɋene kiowec. 17 Eme Anutuzi motecte ki owa manawec; ehame Anuture aŋelozi sambâŋkonec Haga wiracnerâ muwec: “Haga, go weniŋuc egarekac? Mi hâwicguoc. Anutu e motecte ki owa manakac. 18 Irec fahare motec menao sanaŋne bazemec; noni ecnepe ɋâricfâcne jaŋe ŋicguru sâko eniŋmu.” 19 Eme Anutuzi ʒâŋene bâtâcneme ʒâŋe firâ opâ ʒâŋe moc honerâ ra ʒopoo opâ fiarâ ware motec gumewec. 20 Eme Anutuzi motec hone soŋaŋ ecnehame sokawec. Erâ mâreŋ burocnao wosaŋeŋ gie bapa kâcɋene juwec. 21 Mâreŋ burocne ʒâŋene Paraŋ ira hâcne juwec; eme neŋgocnezi Aigita mâreŋkonec ŋokac moc rorâ râcnewec.
22 Dameŋ ira Abimelec â momori soŋaŋ‐ticne Fikoli jahe Abraham ʒiŋuc âzâcnepic: “Anutu e gohec juhame wiac ebac ehuc jukomec. 23 Irec go no â ɋâricfâc‐nane erâ jaŋere ɋâricfâc burec eatuc moc mi enârecmurâ mupaŋke‐narezemec. Noni âgo egare warehuc jupo iŋuc jaha goki no â mâreŋ jaba jukomec irec ŋic nâŋe âgo enârezemec.” 24 Abrahamzi muwec: “No mupaŋke‐garekopac.”
25 Abimelec kiŋaŋŋicfâcne jaŋe ine Abraham opâ nombâŋ moc oma jâoc rombiŋ, irec Abrahamzi mu tutuc ecnewec. 26 Eme Abimeleczi muwec: “Ŋic weni jaŋe iŋuc egarembiŋ i no mi manakopac; goki irec dâŋ moc mi nazameŋ â no nahac wâc mi mana huŋgaŋkepo.” 27 Eme Abrahamzi lama bulimakao rocjoparâ Abimelectao râec‐jopame jahe ʒâʒâfic moc epic. 28 Eme Abraham e lama ŋokacne 7 bâtâcko râec‐jopame 29 Abimeliczi honerâ muwec: “Go wemocte lama ŋokacne 7 bâtâcko râec‐jopamec?” 30 Eki muwec: “Noni opâ nombâŋ ʒi ropo i goki ŋic jaŋere maio musanaŋkecmurâ lama ŋokacne 7 ʒi qikiŋne‐garepe rocjopazemec.” 31 Jahe ira mumupaŋ sanaŋ mupaŋkepicte hae irec ʒâŋe Bere‐Seba mukicne. 32 Jahe Bere‐Seba haeo ʒâʒâfic epic, ehuc Abimelec â momori soŋaŋ‐ticne Fikoli jahe Filisa mâreŋko risiepic. 33 Abraham eki ine Bere‐Seba haeo boriŋjâc moc sararâ Wofuŋ Anutu juju runere ʒâŋe riwaseckewec. 34 Erâ Filisa jaŋere mâreŋko dameŋ ʒora jaba juwec.