1 Roroc neŋgocne jâmbâŋ Kanaaŋ mâreŋ sâcke‐fârerâ fohuc juwec. 2 Eme Aigita mâreŋkonec nânâ bawarembiŋ i nâpie omaeme mamac‐jeŋiczi ʒiŋuc jazawec: “Ŋoŋe nânâ‐nâŋec gâcne furine baniŋte mocwâc ranʒepieŋ.” 3 Mume Judazi ʒiŋuc âzâcnewec: “Ŋic e dâŋ mupaŋkehuc ʒiŋuc nâzâwec: ‘Ŋoŋe ɋaŋeŋic tâmiric nore maio mocwâc mi fuanʒepieŋ.’ 4 Irec go ɋanâŋec e nâŋehec mâmâc ranaŋte mana‐nârecmuo ine sâcne ra nânâ furine bagarenaŋmu. 5 E sakare‐nârecmuo ine ŋic e ʒiŋuc muwecte mi ranaŋmu: ‘Ŋoŋe ɋaŋeŋic tâmiric nore maio mocwâc mi fua‐jâmbâŋkenʒepieŋ.’ ” 6 Eme Israezi muwec: “Ŋoŋe wemocte bunaneo bahuc, ɋaŋeŋicte biŋe ŋic e âzâcnembiŋ?” 7 Mume mumbiŋ: “Ŋic e nâŋe nâŋâcne â wiacfâc‐nâŋec ŋoŋere mu indiŋ enârehuc muwec: ‘Mamac‐ŋeŋic jukac me? Erâ ɋaŋeŋic moc jukac me weniŋuc?’ Iŋuc eme juŋgopeneŋ sâc irec dâŋ âzâcne‐fârembeŋ. Eme eki, ‘Ɋaŋeŋic jowa warenʒepieŋ,’ iŋuc muocmu, i wemocko mananʒapeŋ.” 8 Eme Judazi mamac‐ticne Israe âzâcnewec: “Motec e norao râetec ʒawierâ fahare ranʒepeneŋ. Eme nâŋe mecne, go mecne, naru motecfâc‐nâŋec jaŋe mecne, nâŋâc hâmo sipiric mi enʒepeneŋ. 9 No ere riŋ rohape risie‐gareocte mupaŋkekopac, me bârisie‐garerâ maŋfuŋgao mi râepemuo ine irec kiŋ i fai‐naneo feme âsickerâ juhape juju dameŋ‐nane tarazejec. 10 Nâŋe irec maŋjahec boc mi enʒapeŋ muzac ine huc wefuc epene biac arec jajahec ezac.”

11 Eme mamac‐jeŋic Israe e ʒiŋuc jazawec: “Iŋuc eene fokacko ine ʒiŋuc enʒepieŋ: Mâreŋ ʒira wiac fuaekac irecnec gâcne biaŋne kecʒiŋuc bâwosâerâ târu‐ŋeŋicko ŋierâ ŋic erao bara tahackenʒepieŋ: Wokemaŋ biaŋ, gumi, baŋac, jâcsâŋiŋ, kaŋa â fâric. 12 Erâ moneŋ ɋâricne â mârâc târu‐ŋeŋicko nânâ fainao ŋiekicne i mâmâc baranʒepieŋ, i bâbâsifuc moc fuawec mecne. 13 Erâ wâc ɋaŋeŋic jowahuc ŋic erao mocwâc ranʒepieŋ. 14 Anutu bapafâre eki ine ŋic ere maio roroŋ sasabec eŋarehuc hahac‐ŋeŋic mecne, Benjamiŋ mecne bârisie‐ŋarehuc sorec‐ŋopame risie warenʒepieŋ. No ine naru motecheczi naru motec tâmiric tinac juekopac hâcne.”

15 Eme ŋic jaŋe taha mecne, moneŋ ɋâricne â raŋɋane mecne rorâ Benjamiŋ jowapie Aigita mâreŋko rahuc juku Josefere maio fuambiŋ. 16 Eme Josefezi Benjamiŋ jaŋehec jume honerâ ficsoŋaŋ‐ticne âzâcnerâ muwec: “Go ŋic jaŋe ficko jowac‐jopa fec, erâ qowi hezurâ tiwâ bâzi râe bâmoc etec jaŋe ʒoaŋte nânâ nohec mâmâc nânʒepeneŋ.” 17 Eme ŋic e Josefezi muwec sâc efârewec, erâ ŋic jowac‐jopame ficko fembiŋ. 18 Jaŋe ine Josefere ficko râec‐jopakicnere hâwic‐jopame mumbiŋ: “Bâbâni warepene târu‐nâŋecko moneŋ mocwâc bârisierâ ŋie‐nârekicne moneŋ irec erâ ʒira râec‐nâpoŋgopieŋ: nâŋâc ʒira ŋehapene wefu niŋgiŋ‐nâpohuc kiŋaŋ qaqa bacnâponiŋmu â doŋgifâc‐nâŋec nâwoc roniŋmu.” 19 Irec Josefere ficsoŋoŋ juwec ŋic erao rarâ ficmotâcko domaha 20 ʒiŋuc âzâcnembiŋ: “O bomboŋ‐nâŋec. Nâŋe mârâc nânâ furine banaŋte warembeŋ. 21 Eme ra juku fic fombeŋ ira fisirâ târu‐nâŋec firuerâ mi târu sâc moneŋ nânâ faio fome bâfuanʒepeneŋ i! Eme moneŋ i hâcne mocwâc bawarembeneŋ. 22 Â nânâ furine banaŋte moneŋ ɋâricne mâmâc bafisimbeneŋ wâc. Moneŋ‐nâŋec mozi târu‐nâŋecko ŋiewec i mi manaŋgopeneŋ.” 23 Eki ine muwec: “I sâcne, mi hâwic‐ŋopaoc, ŋoŋere â mamac‐ŋeŋicte Anutu eki hâcne târu‐ŋeŋicko wiac furi sâko ŋarewec, moneŋ‐ŋeŋiczi norao sâcne fisiwec.” Iŋuc murâ Simeoŋ jaŋerao jowa wahawec. 24 Erâ Josefere ficko jowac‐jopa ferâ kike‐jeŋic ʒureniŋte opâ fia‐jarewec, erâ doŋgifâc‐jeŋic nânâ gumec‐jopawec. 25 Eme jaŋe Josefezi nânâre wareocte woŋec juhuc, ere taha wiac bafisimbiŋ i râe biric embiŋ; jaŋe ficmaŋne ira nânâ nâniŋte mukicne irec biŋe biac manambiŋ hâcne.

26 Eme Josefe e wareme taha wiac bajumbiŋ i bafe râcnerâ ere maŋfuŋko fodapembiŋ. 27 Eki ine mu indiŋ ejarehuc muwec: “Mamac raŋɋa‐ŋeŋicte nazambiŋ e weniŋuc jukac? Sâcne jukac me?” 28 Jaŋe mumbiŋ: “Kiŋaŋŋicge, mamac‐nâŋec hâcne, e sâcne mac jukac.” Iŋuc murâ dieŋzi hecnehuc fodapembiŋ. 29 Eme eki qâhâŋnerâ ɋaticne Benjamiŋ honerâ muwec: “Ɋaʒâc‐ŋeŋicte dâŋ nazambiŋ ʒine hâcne me?” Erâ muwec: “Motec‐mae, Anutuzi ehâmo‐garezejec.” 30 Josefe e iŋuc murâ biac e jahacne ficmaŋko raʒiwec, ɋaticne honerâ bu heheric ecneha kiozo ewec irec. Erâ ira kiowec. 31 Erâ ʒâŋe mai‐ticne ʒurerâ mocwâc waha sanaŋkerâ muwec: “Nânâ râeniŋ!” 32 Eme e nânâ buc râcnehuc jaŋe iŋuc jaha buc jarembiŋ, erâ Aigita ŋic ehec mâmâc nânâ nâhuc ŋembiŋ jaŋe iŋuc jaha buc jarembiŋ. Aigita ŋic jaŋe Hebiraio ŋic jaŋehec nânâ mi nâniŋte aka fowec hâcne, Aigita ŋic jaŋe irec manapie mamakâcne ewec. 33 Eme Josefe e ŋifec ŋeha jaŋe ŋifec mârâc motec erao fuŋkerâ biric‐jopa rakupie ʒâhec motec erao tarawec, fua rambiŋ irec sâcko biric‐jopapie ŋerambiŋ hâcne. Eme jaŋe irec hohonec erâ wareckembiŋ. 34 Josefezi ine mume e jahacne teboonec nânâ rorâ jarembiŋ. Ehuc gâcne jaŋere wâŋ wâŋ râehuc Benjamiŋte 5, 5, iŋuc râembiŋ. Eme jaŋe ehec nânâ â waiŋ opâ nâhuc bubiaŋ manambiŋ.