49
Jakobozi ŋokâfâcne jaŋere findaŋdâŋ muwec
1 Eme Jakobo e ŋokâfâcne hefârec‐joparâ ʒiŋuc muwec: “Ŋoŋe tumaŋneniŋ, eme jufeniŋmu dameŋ irec maŋnao wemo wiac fua‐ŋarezokac irec dâŋ ŋazazepac.
2 Ŋokâfâc‐nane, ŋoŋe tumaŋne‐fâreniŋ,
ehuc mamac‐ŋeŋic Israe norao hazec râeniŋ!
3 “Rubeŋ, go mârâc ŋokâ‐nane,
tâpiri â sasanaŋ‐nanere fârine bâbâni go hâcne,
go tâpiri â ʒai ʒonʒoŋge fekicne.
4 Go opâzi roma baekac iŋuc emeŋ
irec fekicne sâko mi juzemec.
Go mamacge nore fofoo femeŋ
ehuc fofo i dameŋ ira gâc hecnemeŋ.
5 “Simeoŋ â Lewi ŋohe hahac ɋa,
ʒika‐ŋekiczi bâbâʒâic gie baekac.
6 Maŋnanezi ŋohere tutumaŋ geŋkezejec,
mâro‐nanezi ŋohere guruo mi ʒuhuckezejec.
Ŋohe aaricte ŋic qâhâmoc‐jopapic
â maŋhazec gâc jaha bulimakao bâpuriŋ‐jopapic.
7 Maŋʒoc‐ŋekiczi momori wânʒâŋ ekacte sâweckezo,
â aaric‐ŋekic hâhâwicne i mâmâc.
No Jakobore mâreŋko bâfâuc‐ŋofapemu
â Israe ŋic jaŋere ŋondeŋko bârâwiŋ‐ŋofapemu.
8 “Juda, go hahac ɋafâcge jaŋe mu ʒeri egareniŋmu.
Megezi râsifâcge jaŋere upeo foocmu,
mamacgere ŋokâfâc jaŋe gorao dapeniŋmu.
9 Juda go laioŋ motec iŋucne
o ŋokâ‐nane, go soroŋ qaqa juhuc sokameŋ hâcne.
Go laioŋ ŋicne iŋucne waha fomanaekic,
erâ laioŋ ŋokacne iŋucnea,
mozi moc sâcne surucguocmu?
10 Ŋicwofuŋ gunu i Juda goraonec mi râriezejec,
â micne gunu i kikegezi qafitackerâ ŋezemec.
Ehame tâpiri rugezi fisime
mâreŋ sâc ŋicne ŋicne jaŋe micne reŋke‐fâreniŋmu.
11 Go doŋgige neŋgocne waiŋjâc fuŋnao niŋgiŋkehuc
doŋgi motecne tieŋnao niŋgiŋkeekic.
Go qorucge waiŋ opâo ʒureekic
â ŋaqige waiŋ hândâŋnere opâo heuruckeekic.
12 Ʒâŋe hândâŋge waiŋte erâ bâruŋkeekac
â micsiecge susure erâ qaŋqaŋ eekac.
13 “Sebuloŋ go hâwec heririŋko ŋec juc eekic,
go woke jaŋere siluŋ ehaŋ
magezi raku Sidoŋ hae mâreŋko tarakac.
14 “Isasa go doŋgi sasanaŋhec,
lama bulimakao sapa ŋoŋondeŋko foekic.
15 Ŋeŋemana toma i aŋacne
â mâreŋ fomeŋ i biaŋne,
go iŋuc honerâ tagi hâpocmurâ ɋawege sicnehuc
jâiŋko gie irec kiŋaŋ qaqa emeŋ.
16 “Daŋ go Israe guru gâcne eeŋgopieŋ
jaŋere sâc jaha ehuc ŋic gurufâcge
jaŋere dâŋ mutaraekic.
17 Daŋ go sopâc homa
â kâteo qotâ juekac iŋucne erâ
becâsic kike kiririŋko kitec
fainao ŋeekac e rârâpe rândiŋke qazejec.
18 O Wofuŋ, no bâbâpiaŋgere woŋec juekopac.
19 “Gade go râsifâcge jaŋe gu jâpec boc egareeŋgopieŋ,
goki ine kikeo kikeo ejarehuc jopa jâpec ejareekic jaha.
20 “Ase go nânâ qowi fofo dunduŋ fogareekac
irec nânâ wiac aŋac baŋacne kâdoc bacmu.
21 “Naftali go qowi rambaŋ jueŋgopieŋ iŋucne,
goki hâcne gae biaŋne hefuaekic.
22 “Josefe go jâc dutu ɋâri fâri raraunehec iŋucne,
jâc dutu ɋâri fâri rarauneheczi opâ mecko domaha
tieŋ taeŋnezi sac qambaraŋkehuc ŋeratieekac.
23 Tepeŋic jaŋe râsi fisirâ
surucguhuc tepe qâtâcnepie
24 go gahacne tepezi sifu qiriŋ tâmiric domawec
â megezi wâc mi tarawec;
i Jakobo nore Tâpiri runezi baficguwecte
â Israere soŋaŋ â haroŋaŋ ere ʒâŋeo roweckemeŋ irec.
25 Mamacge nore Anutu e basanaŋguweczi baficguzejec,
Anutu bapafâre e sabecguweczi jambuŋguzejec.
E sambâŋkonec mâririzi jambuŋguzejec.
E mâreŋmaŋko opâre rowaŋ fokac izi jambuŋguzejec,
erâ kogoc fufua â moŋ i mâmâc jambuŋke‐garezejec.
26 Mamacge nore jambuŋ i
tiki ŋeŋene irec sâc sirickehuc
tiki sanaŋ irec guec i mâmâc sirickekac.
Jambuŋ i sasawa Josefe gore faio ferâ fozejec,
hahacfâcge jaŋere guruonec rowosâecgukicne gore faio hâcne.
27 “Benjamiŋ go qâto momori wânʒâŋ,
go furicte soroŋ qahuc nâekic
â ŋafeo ine nânâ qowi tucne fokac i bâtâc baekic.”
28 Ŋic i sasawa jaŋe Israe ŋicguru 12 ine hâcne, erâ mamac‐jeŋiczi jambuŋ‐jopahuc dâŋ jazawec ine hâcne; ru sâc jambuŋdâŋ jazahuc buc buc jambuŋ‐jopawec hâcne.
Jakobo hâmowec
29-30 Iŋuc erâ dâŋ mu qâmoc ejarehuc ʒiŋuc jazawec: “No mimiŋnefâc‐nane jaŋerao rape ŋoŋe mamac ŋosafâc‐nane jaŋe foŋgopieŋko ducnunʒepieŋ, ine Kanaaŋ mâreŋko Mamere ʒoaŋ wewefunao mâreŋ dâkâne Makepela ira Hitiŋic ʒâŋene Eferoŋ ere gieo hawec fokac ira ducnunʒepieŋ. Gie i hâcne Abrahamzi Hitiŋic Eferoŋ eraonec ʒâŋeruŋte biŋe furine bawec. 31 Ira Abraham â ŋonâŋ‐ticne Sara ducjofambiŋ, â Isaka â ŋonâŋ‐ticne Rebeka ducjofambiŋ, erâ noni wâc Lea ira duckepo. 32 Gie â hawec i Hitiŋic jaŋeraonec furine bakicne.” 33 Eme Jakobo e ŋokâfâcne dâŋ iŋuc jaza mutâc ejare‐fârerâ kike jahec‐ticne fofoo fâreme feme hâmorâ mimiŋnefâc‐ticne jaŋe qâtec‐jopawec hâcne.