3
Jesu e Mosere femicne
Mitiŋic âgofâc-nane, sambâŋte mâmâc hefârec-ŋopakicne, ŋoŋe miti kiŋaŋ ŋic â taha bapa sâko Jesu, šâŋene murâ rereŋ eeŋgopeneŋ, erao findendeŋnenšepieŋ. Eki gie runere mume rereŋ juwec, Mosezi Anuture ficko juwec irec sâc juwec hâcne. Fic baekac ere šâŋe biŋezi ficte šâŋe biŋe jâuruekac, sâc ijaha Jesu šai šonšoŋ-ticnezi Mosere sirickekac. Ficne ficne i bâbâfua-ticnehec, wiac sasawa irec bâbâfua ine Anutu. Mose e Anuture ficko jufârehuc mume rereŋ gie bawec, i dâŋ šâhec fufuanere biŋe muocte kiŋaŋ qaqa juwec. Kristo e ine ŋokâzi fic rune jukac. Ficticne nâŋâc hâcne. Erâ i mâc mâcne, wiac biŋe qanârekicne irec mamanac paŋšâic â bubiaŋko juhapene taraocmu, ine ficticne eŋgopeneŋ muzo.
Israe ŋic maŋsanaŋ embiŋ iŋuc mi ezo
Irec Tiri Mârozi dâŋ šiŋuc muwec i nâŋâcne biŋe ekac:
“Ŋoŋe miŋecgac dâŋticne manaŋgopieŋko,
tuhuo eesâic fuame aaricko ekicne,
maŋsanaŋ iŋuc mi enšepieŋ.
Mimiŋnefâc-ŋeŋic jaŋe ira wiac bapa-nane jara 40 honembiŋ,
erâ sifu pepecne enarehuc esâicnumbiŋ.
10 Eme no irec manape gâpâreme jaŋere šiŋuc mupo:
`Jaŋe maŋjeŋiczi raŋɋa raŋɋa qâsorieeŋgopieŋ,
jaŋe nore hata moc mi hone manac embiŋ.'
11 Iŋucte kimbeŋ qajarehuc mumupaŋ dâŋ šiŋuc mupo:
`Jaŋe nore jujumana hae mâreŋko moc mi rašinšepieŋ'.”
12 Âgofâc-nane, ŋoŋeraonec moc e miti qikiŋnehuc maŋ gâgâpâc erâ Anutu jujune râpeckezacte soŋaŋ babac ehuc junšepieŋ. 13 Erâ šoaŋne šoaŋne miŋecgaczi miŋegac forahuc juocmu sâc faŋ qaqac enšepieŋ, sâqocnere eeatuczi ŋoŋeraonec ŋic moc ecneme maŋbâzic ezackohec.
Israe ŋic jaŋere manasurâ hâwic-nâpozejec
14 Nâŋâc Kristore miti kâdoc babaju, ine fuŋkehuc manasiŋkembeŋ mamanasiŋ i paŋnea bajuku mao fisinaŋmuzi eŋgopeneŋ. 15 Dâŋ šiŋuc fokac:
“Ŋoŋe miŋecgac dâŋticne manaŋgopieŋko,
aaricko ekicne, maŋsanaŋ iŋuc mi enšepieŋ”,
16 ine weni jaŋe dâŋticne mana-bipiehuc aaric bâfuambiŋ? I mockoneczi mâcne, Mosezi micne bajareme Aigita mâreŋkonec warembiŋ ŋicguru i sasawa jaŋe hâcne. 17 Me weni jaŋere Anutuzi maname gâpâreme jara 40 tarawec? I sâqocne bahuc mâreŋ tuhuo hâmo sipiric embiŋ jaŋere hâcne iŋuc ewec. 18 Erâ weni jaŋere mumupaŋ dâŋ šiŋuc muwec: Nore jujumana hae mâreŋko mi rašinšepieŋ? I dâŋticne qahuc jumbiŋ jaŋere hâcne muwec. 19 Irec šiŋuc honeŋgopeneŋ: Jaŋe miti qiqikiŋ-jeŋicte quŋkerâ mi rašimbiŋ.