9
Wama ŋicwofuŋ fuarâ guriŋ bapa gie baocmu
1 Erâ hâhâwic maŋko juhapie dapâc fowec i mi fosanaŋkeocmu. Mârâc dameŋko Wofuŋzi Sebuloŋ â Naftali mimi busâqoc bâfua‐jactewec, ʒâhec dameŋko ine riqic hata, Jordaŋ ocniŋuc mâreŋ fokac, qâpuc jaŋere hae mâreŋ irec ʒâŋe biŋe bafahareocmu.
2 Ŋicguru dapâcko hata juŋgopieŋzi ʒoctamac sâko honeŋgopieŋ,
â mâreŋ dapâcnao ŋec juc eŋgopieŋ jaŋe tamae‐jarekac.
3 Go ŋicguru basawec‐jopakic â bubiaŋ bâŋɋârâŋke‐jarekic;
maigao ʒeri eŋgopieŋ i nânâ nânâsuo ʒeri fuaekac irec sâc,
â râsi jaŋere mafa bâtâc bahuc aŋac‐jopaekac iŋuc hâcne.
4 Tagi kimac‐jopawec â reŋ ɋawe‐jeŋic nâwec
â bâbâʒâic ŋic ere ɋaruc i qazu behec ekic,
Midiaŋte dameŋko fuawec irec sâc.
5 Momori ʒikao kike saoŋ qaeŋgopieŋ jaŋere kikehuhu
â ŋaqi soc rurua i ʒocte nânâ efârekac.
6 Nâŋâc ɋie moc fua‐nârekac, ŋokâ moc tahac‐nâpokicne,
eme guriŋ bapa gie i ere ɋaweo foocmu.
Ʒâŋe‐ticne ʒiŋuc muzo: “Mâsi‐Hata‐Bâbâfua, Tâpiri‐Anutu,
Juju‐Sanaŋ‐Mamac, Wama‐Ŋicwofuŋ.”
7 Guriŋ bapa gie‐ticne ŋeratie rame wama fofo sanaŋ foocmu,
Dawidire eri ŋeŋeo â mâreŋ sâc guriŋ baocmu;
eme ere bâbâtiŋ â tiŋne jujuzi eri ŋeŋe‐ticne
bafaharerâ dopeckeme ʒiŋuczia ŋekaczi ŋerahuc juzokac.
Anutu Tâpiri Ɋuŋɋasaŋ Wofuŋ ere ʒoɋaczi wiac i bâfuaocmu.
Wofuŋzi Israe ŋic kimbeŋ qajarekac
8 Wofuŋzi Jakobo okacdâŋ moc râecnewec,
dâŋ izi Israe fainao waha qaocmu.
9 Eme ŋic sasawa hone manac eniŋmu, Eferaim guru â Samaria rune,
maŋfefe â penaroŋ ehuc ʒiŋuc mumbiŋ jaŋe hâcne:
10 “Qoracfic ʒaŋkewec irec okacne busefic banaŋmu,
nemuja farawec irec âkehoc jâmâzâc saranaŋmu.”
11 Eme Wofuŋzi guguriŋfâc‐jeŋic tâpiri jareocmu,
â râsifâc‐jeŋic suruc‐jopame fisi‐jareniŋmu.
12 Siria ŋic ʒoaŋ wewefunaopec â Filisa ŋic huhunaopec,
jaŋe Israe ŋic mauc fufusuc ki nâc ejareŋgopieŋ.
Eme sifu kimbeŋ‐ticnezi mi qaʒue wahakac,
â menezi mi betaŋkehuc qiŋ herâ domakac jaha!
13 Eme ŋicguru jopa bâtiŋ ejarewec jaŋe erao mi risiembiŋ,
â Anutu Tâpiri Ɋuŋɋasaŋ Wofuŋ e wira basac mi ecnembiŋ.
14 Irec Wofuŋzi Israe qizecne â gecne mâmâc hetâcnewec,
fuŋne â botâŋne i ʒoaŋ mocjahao iŋuc hâcne ecnewec.
15 Ŋic raŋɋaŋne â ʒâŋe biŋehec jaŋe qizecne eŋgopieŋ,
â porofete burecdâŋ mumufua jaŋe ine gecne.
16 Ŋicguru ʒi micne bajareŋgopieŋ
jaŋe jojowac ŋic bâbâsifucne
â bâjâpec‐jopaeŋgopieŋ jaŋe
sisipiricte biŋe eŋgopieŋ.
17 Irec Wofuŋzi ŋicmotecfâc‐jeŋic jaŋere mi aŋackekac,
â hozec bekâfâc‐jeŋic busâqoc mi mana‐jarekac.
Jaŋe ʒeŋgoma sindaŋne â sâqocne bapa hâcne,
â micjeŋiczi mutucdâŋ sasawa mueŋgopieŋ.
Eme sifu kimbeŋ‐ticnezi mi qaʒue wahakac,
â menezi mi betaŋkehuc qiŋ herâ domakac jaha!
18 Sindaŋ hârindaŋzi ʒoc iŋucne bâruŋkekac,
i ʒoczi sopâc â saparac ʒâtâcneekac
erâ wâc kâte uupicko qâhâsârâ ʒaekac iŋucne,
eme hosâcnezi ririsiehuc hâŋ feekac.
19 Anutu Tâpiri Ɋuŋɋasaŋ Wofuŋte kimbeŋ izi hâcne
ʒocbâruŋ erâ mâreŋ ʒâtâcnekac,
eme ŋicguru jaŋe ʒocte nânâ eŋgopieŋ,
â qoqomâzi aakic mi eŋgopieŋ.
20 Fâreopec ki nâc ejarerâ mi sâcjopakac,
qanaopec ɋâcjoparâ mi gapec‐jopakac;
qoqomâzi nânâc eŋgopieŋ.
21 Manasezi Eferaim nakac â Eferaimzi Manase nakac,
erâ turerâ Juda râsi ecnekopirec.
Eme sifu kimbeŋ‐ticnezi mi qaʒue wahakac;
â menezi mi betaŋkehuc qiŋ herâ domakac jaha!