12
Daŋge mumuteŋ gae
1 Dameŋ ira kecʒiŋuc muzokic:
“O Wofuŋ no daŋge gazape;
go kimbeŋ qanaremeŋ,
eme kimbeŋgezi râriehame bâmiriŋnumeŋ.
2 “Jâmbomac, Anutu e bâbâpiaŋ‐nane;
mamanasiŋ fonarekacte mi hâwicnukac.
Wofuŋ Anutu e tâpiri‐nane â mumuteŋ gae‐nane,
eki sisipirickonec bataracnuwec.”
3 Ŋoŋe bâbâpiaŋte opâ ʒâŋeonec
ʒeri ehuc fia nâc eniŋmu.
4 Erâ dameŋ ira kecʒiŋuc muniŋmu:
“Anutu daŋge âzâcneniŋ,
ʒâŋe‐ticne wâsickeniŋ.
Ŋicne ŋicne jaŋerao eebapa‐ticne muromackeniŋ,
ʒâŋe biŋe‐ticne faharekac i mufua‐jareniŋ.
5 “Wofuŋ e gie basarickewecte mucne bacneniŋ,
erâ mâreŋne mâreŋne muromackeniŋ.
6 Zioŋ ŋecjucfâcne ʒeri bari eniŋ,
Israe ere Tiri rune ŋondeŋ‐ŋeŋicko fekicne jukac.”