32
Ŋicwofuŋ tiŋne
1 Manaŋgopieŋ, ŋicwofuŋ moc fuarâ tiŋne jujure hata bâjâpehuc guriŋ bapa gie baocmu
â fekicnefâc‐ticne jaŋe soŋaŋ gie‐jeŋic
mumutiŋ dâŋte sâcko bahuc juniŋmu.
2 Jaŋe sasawa jâcdapeŋ iŋucne,
ŋiczi mâŋâŋte erâ ira soŋkeeŋgopeneŋ;
jaŋe hoe micsâko heme
qânâuŋzi ŋic sâoc‐nâpoekac irec sâc;
jaŋe mâreŋ burocnao opâ fifisine iŋucne
â mâreŋ fâronao haroŋaŋ sâko irec mumuc iŋuc efâreniŋmu.
3 Ehame ʒâŋe fifi jueŋgopieŋ jaŋe ʒâŋe mi hâmonʒaniŋmu
â hazeczi mamana jaŋe hazec hâric mananiŋmu.
4 Fâro faio wiac kosa eeŋgopieŋ
jaŋe maŋ mamanasuhec eniŋmu,
â dâŋ fâcke turuŋ ehuc mueŋgopieŋ
jaŋere nameŋzi afeckeme dâŋ ɋicɋâc jaha musarickeniŋmu.
5 Eme ŋic sindaŋne e “fekicne” mocwâc mi mucnezo,
erâ ŋic hehesicne ere manapene
ŋic biaŋne mocwâc mi eocmu.
6 Ŋic sindaŋne e ʒaucbac dâŋ muocmu
â maŋticnezi sâqocnere mamana gie bahuc
sindaŋ hârindaŋ eocmu erâ Wofuŋte dâŋ musifuckeocmu,
ehuc nânâ opâre hâmoeŋgopieŋ
jaŋe nânâ opâ sakare‐jareocmu.
7 Ŋic sâqocne ere mamana i sâqocne jaha,
irec ŋic qarâ suriŋne jaŋe burecdâŋzi imac‐jopaocte mamana gie baekac,
ehuc ŋic hapetac e dâŋgieo dâŋticnere sanaŋkeme
sifu burecdâŋzi imackeocmu.
8 Ŋic biaŋne e wiac biaŋnere manatâc qâtâc eekac,
ehuc wiac biaŋne ebac eocte sanaŋkerâ domaekac.
Jerusalem haeonec ŋokac uŋdâŋ jazakicne
9 Ajoc, ŋokac manabâc tâmiric jueŋgopieŋ
ŋoŋe marac fânâŋ‐nane mananiŋ!
Naru ŋokac ŋaŋacnere manapie fâsâekac
ŋoŋe dâŋnanere hazec râeniŋ!
10 Oi, manabâc tâmiric ŋoŋe,
jara moc tarame maŋŋeŋiczi hâhâŋkeocmu,
manaŋgopieŋ, waiŋ fârine roro dameŋ i ŋowaruocmu,
â jâchândâŋ roro dameŋ i wâc mi fuaocmu.
11 Manabâc tâmiric jueŋgopieŋ
ŋoŋe hâwic‐ŋopaha ɋarac ɋarac qanʒepieŋ,
â ŋaŋacnere manapie feekac
ŋoŋe maŋŋeŋiczi hâhâŋkezejec;
ŋaqi wiac hetara‐fârerâ mateŋ qonaŋkenʒepieŋ.
12 Ŋoŋe buŋeŋic bofackehuc jufu gie biaŋne
â waiŋ qizec fâri rarau
irec ki mamakuc eniŋ!
13 Ŋicfâc‐nane jaŋere gieo fâpâ uupic â qinʒiŋ sanaŋ wefukac,
erâ hae sâkoo ficne ficne ʒeri bubiaŋ omaeocmu
irec mâmâc kioniŋ!
14 Manaŋgopieŋ, ŋicwofuŋ fic i behepie fictac ŋeocmu
â hae maŋnao ojowa fokac i omaeme niniŋ siarereŋ fuaocmu,
ficsanaŋ â ficʒora hâŋ bafekicne
izi qânâ hawec iŋucne erâ foocmu sanaŋ,
ehame kâte doŋgi jaŋe bubiaŋ manahuc
maŋnao ju fofo eniŋmu
â qinʒiŋ fuame lama bulimakao jaŋe nâhuc juniŋmu.
15 Iŋuc fokuhame sambâŋkonec Mârozi fai‐nâŋecko wahaocmu,
eme mâreŋ burocnezi ŋerisierâ guecnehec eocmu
â mâreŋ guecnehecte manapie kâte mâreŋ biaŋ eocmu.
16 Ehame mâreŋ burocnao mumutiŋ dâŋ fuaocmu
â tiŋne juju i mâreŋ guecnao ira foocmu.
17 Eme tiŋne jujuzi wama bâfuaocmu
â tiŋne jujure fârine jujumana
â wamao juju fuarâ foocmu sanaŋ.
18 Eme ŋicfâc‐nane jaŋe fic hae biaŋnao ŋehuc
jujumana mâreŋko hâhâwic tâmiric juniŋmu.
19 Hoe sanaŋzi jâckâte sipiricke‐fâreocmu,
â hae sâko e waha qaqane jâmbâŋ eocmu.
20 Opâ sasawa irec heririŋnao gie he sarac eniŋmu,
erâ bulimakao â doŋgifâc‐ŋeŋic ejarepie
aka tâmiric rac warec eniŋmu
ŋoŋere manape ʒerine ekac.