Kâte Bible JESAJA 34

Ŋicne ŋicne â Edomŋic Wofuŋtaonec okacne fisi‐jarekac

1 Ŋicne ŋicne ŋoŋe ware mananiŋ,

â ŋic gurune gurune ŋoŋe hazec râeniŋ!

Mâreŋ â mâreŋte faio wiac fusucmarâ fokac,

erâ mâreŋ sâko mâreŋ â ŋecjucfâc‐ticne

ŋoŋe sasawa mana‐fâreniŋ.

2 Wofuŋ e ŋicne ŋicne jaŋe aaric mana‐jarekac

â kimbeŋ‐ticnere ʒoc i momorifâc‐jeŋic bâruŋke‐jarekac,

e sisipiricte biŋe mujarehuc

ʒikare nânâ eniŋte qikiŋ‐jopawec hâcne.

3 Eme qâhâmoc‐jopakicnefâc‐jeŋic

jaŋe mâc behec‐jopapie foraniŋmu,

ehuc qâŋɋâŋfâc‐jeŋic âsu fihuc foniŋmu;

ehame socjeŋiczi tiki rua‐jareme urueniŋmu.

4 Sambâŋko bâpiŋ gurune gurune ŋeraŋgopieŋ jaŋe sirowe‐fâreniŋmu,

â sambâŋ e papia bataforieeŋgopieŋ iŋuc foforieocmu;

eme gurufâc‐ticne jaŋe waiŋ rehacne me jâmbojâc rehacne ɋaŋa ururuc erâ mârâŋkeekac

irec sâc mârâŋkerâ wahaniŋmu.

5 Manaŋgopieŋ, ʒika‐nanezi sambâŋko kimbeŋ nâ gapec erâ waha Edomko okac babazu gie baocmu,

ŋicguru sisipiricte biŋe râec‐jopapo jaŋerao hâcne.

6 Wofuŋte ʒika i soc â wokemaŋhec sasawa,

lama â noniŋ irec soc

erâ lama ŋicne râpe hândâŋne irec wokemaŋ hâcne.

Wofuŋ e Bozera hae ira taha bâzi gie

â Edom mâreŋko qa hezuc ee sâko bâfuaocmu.

7 Kâte bulimakaozi bulimakao biuc sâko jaŋehec hâmoniŋmu,

â bulimakao ŋicnezi motecne

jaŋe ŋicne tâpiri sâko jaŋehec sipirickeniŋmu.

Eme soczi hae mâreŋ‐jeŋic isirickeocmu

â mâreŋ i wokemaŋhec sasawa foocmu.

8 Wofuŋte okac babazu dameŋ maickeocmu.

Zioŋ kikefuŋ râsi ejarembiŋ

jaŋere okac babazu jara dameŋ hâcne.

9 Eme Edomte opâ jaŋe ŋerisierâ waha kufaŋ sâŋiŋ eniŋmu

â mâreŋ‐ticnezi ŋerisierâ paura sâqocne eocmu;

mâreŋ‐ticnezi kufaŋ sâŋiŋ erâ bâruŋkeocmu.

10 Ehuc ŋafeo mecne ʒoaŋko mecne mi hâhâpo,

hosâcne ŋezume ŋezu fehuc domaocmu sanaŋ.

Mâreŋ i mimiŋzi ɋâric ima bakicne jaha foocmu,

ehame ŋic moczi ira sicne fotâc moc mi eocmu hâcne.

11 Gafu hâro â homa jaŋe rauckeniŋmu,

erâ ŋafe wipe â kâec kâec jaŋe ira ŋec foc eniŋmu.

Ehame Wofuŋzi ima baocte sâcmeda fâreocmu

â niniŋ siarereŋ fuarâ foocte ma baocmu.

12 Zioŋ fekicnefâc‐ticne jaŋe ŋicwofuŋ juju fuaocte mocwâc mi muniŋmu,

erâ micnefâc‐ticne jaŋe ʒeŋgoma omaeniŋmu.

13 Eme ŋicwofuŋ ficko fâpâ uupic fuarâ foocmu

â ficsanaŋ ira ʒâŋ opac fuame

kâte qâto â qera jaŋere ŋeŋe hae eocmu.

14 Eme ŋifec qowi mimicne â kâte qâto

â ŋifec ine kâpâ jaŋe âgofâc‐jeŋic jaŋehec bâbâfuac eniŋmu,

erâ ŋafere demoŋzi ira ŋeŋemana hae‐ticne bâfuaocmu.

15 Qotâ e jâc semunao juju fofo ehuc

hândâŋ râerâ fomackekume âteʒuocmu;

erâ tucwipe jaŋere hozi ira fuaocmu wâc,

ehame moczi moc âgone moc mi basaocmu.

16 Ŋoŋe Wofuŋte papiao dâŋ ʒiŋuc fokac

i wose gufuc erâ mananʒepieŋ:

Jaŋeraonec moc mi basazo,

moczi âgo tâmiric moc mi juocmu.

Wofuŋte mickonec mumupaŋ dâŋ iŋuc hâcne wahawec

â Mâro‐ticnezi hetumaŋ‐jopawec.

17 Eme e jahac mâreŋ bâtâc bajareocte qaŋgec qawec,

ehuc meticnezi sâcmeda fârehuc kâdoc qajarewec;

eme jaŋe irec rune erâ jusanaŋkenʒepieŋ,

â mimiŋzi ɋâric maŋnao ŋec juc ehuc juranʒepieŋ.