44
Wofuŋ e mocjahazi Anutu jukac
1 “Ʒi ine Jakobo kiŋaŋŋic‐nane,
â Israe bâwosâecgupo go manac!
2 Bâfuacguwec â neŋgoc bumaŋko fuŋkerâ baʒawiecguwec
erâ baficguhuc juekac, Wofuŋ eki hâcne ʒiŋuc mukac:
Jakobo kiŋaŋŋic‐nane, â Israe bâwosâecgupo
go mi hâwicguzejec.
3 Manakic, no mâreŋ hahaŋkekicnao opâ hoŋkepemu
â mâreŋ kereŋnao opâ mupe fuarâ foocmu;
no Mâro‐nane ecnepe ɋâricfâcge jaŋerao wahaocmu
â jambuŋ‐nanezi apa ŋosafâcge jaŋere faio feocmu.
4 Eme jaŋe kecɋaŋzi opâ ŋondeŋko
â kakikic jâczi opâ sâko heririŋnao fua sokac eekac
irec sâc fua sawec enʒepieŋ.
5 Moc e muocmu: ‘No Wofuŋte biŋe,’
â moc e ʒâŋe‐ticne Jakobo muocmu,
erâ moc e jahacne meo ‘Wofuŋte erâ jukopac’
iŋuc qâreŋkehuc ʒâŋe‐ticne Israe muocmu.”
6 Wofuŋ, Israere Wofuŋ Sâko â fifirue,
Anutu Tâpiri Ɋuŋɋasaŋ Wofuŋ hâcne, e ʒiŋuc mukac:
“Nonizia bâbâni â ʒâhec,
no mocjahazi Anutu fârine jukopac.
7 Mozi no iŋucne jukac? Moc jukacko muzejec,
erâ fuŋne‐ticne nore maio mutaniŋkehuc nazazejec.
Juku wiac fuazokac i weni jaŋe esecne mufuambiŋ?
Moc embiŋko ine wemo wiac ʒâhec fuaocte mukicne i wâc nâzânʒepieŋ!
8 Ŋoŋe hâwic‐ŋopaha mi fâfârenʒepieŋ;
no juwicnao mi mufua‐ŋarepo â mi ŋazapo me?
Eme ŋoŋe irec biŋe mumufâc‐nane embiŋ juŋgopieŋ!
Mozi Anutu no iŋucne moc jukac?
Haroŋaŋ moc mi fome manakopac!”
Ɋâŋ qâqâtâc araŋ babajare i wiac racne
9 Ɋâŋ qâqâtâc bapa jaŋe ŋic mutucne sasawa, â wiac basarickehuc baeŋgopieŋ izi wâc fâri tâmiric; irec ɋâŋ wiac numu‐jareniŋmu jaŋe wiac hone manac moc mi ehuc qurutuaniŋmu. 10 Mozi nemu me ɋâŋ qâqâtâc gie mi bapane fasaeocmu me aeŋzi ba akic eocmu? 11 Manaŋgopieŋ, âgofâc‐ticne jaŋe qurutua‐fâreniŋmu, â metâ bapa ŋicfâc‐ticne jaŋe ŋic sawa jaha; eme i â i jaŋe mâmâc tumaŋnerâ domaniŋmuo ine sifu bipic tatara ejareha qurutua‐fâreniŋmu.
12 Aeŋzi wiac bapa e aeŋ ʒocko rike dockerâ ba akic eekac, erâ hamazi hejacneme hawarine fuaekac, e mesanaŋ‐ticnezi irec gie baekac, ehuc nânâre hâmohuc dockeekac â opâ wâc mi nâhuc betaŋkeekac. 13 Kamunda eki ine muc fârehuc kirifizi ma baekac; e jâc fasaehuc biriŋzi qâreŋ oorâŋ baekac, ehuc ŋic hawari iŋucne ba akic eekac, ŋic hawari biaŋne â ficko dodomane iŋucne hâcne. 14 E jâmâzâc jâc qafaraocte raekac, eme jâmiŋ me boriŋ me kâteo jâc wiac gâcne bâwosâeekac. E jâmâzâc sarame hoe heme mâreŋzi bâgunuckeme sokaekac. 15 Izi ŋic ʒoc bâfuacneekac, eme ʒocticne ʒame sahac‐ticne hâroŋkeekac; ŋifecne ruqerâ nânâ poroŋ rikeekac â ŋifecnezi ine ɋâŋ fasaerâ numucneekac, nemuɋâŋ fasaerâ dieŋzi hecneekac hâcne. 16 Jâc dâkâne moc ʒocko râeme ʒaekac â dâkâne moczi qowi ʒegoc barâ nâ gapec eekac, ehuc ʒoc ruahuc muekac: “Aija, hâroŋnukac â ʒoc biaŋne ruakopac i!” 17 Jâc dâkânezi ine nemu‐ticnere ɋâŋ qâqâtâc fuaocte fasaeekac, fasae‐fârerâ dieŋzi hecnehuc dapecnerâ ʒiŋuc muhuc numucneekac: “Go Anutu‐nane jukicte baficnuzemec!”
18 Jaŋe wiac moc mi hone mana tarac eeŋgopieŋ, jaŋe ʒâŋe‐jeŋic bâhâpokicnere tiŋtuŋ qaeŋgopieŋ â maŋjeŋiczi wiac moc mi manaeŋgopieŋ. 19 Ŋic moc maŋticne uŋtoha manatâc qâtâc moc mi eekac â mamana‐ticne moc mi fuaekac, e wemocko ʒiŋuc moc muocmu: “No jâc ŋifecne ʒocko râepe ʒawec, ehame ʒoc mimiŋnao nânâ â bec rikerâ nâ gapec epo, irec wemocko jâc ŋifecne fasaehuc wiac mamakâcne barâ jâcombâŋ iŋucnere maŋfuŋko dapepemu?” 20 Moc e gie fâri tâmiric baocmu e maŋticnezi eatuckehuc sioc ecnewec muzo; eme irec hâcne juju‐ticne ŋezickehuc ʒiŋuc sâcne mi muocmu: “Mefâre‐naneo wiac badomakopac i burec wiac moc mecne?”
Wofuŋ e Israe ŋic jaŋere fifirue
21 O Jakobo â Israe, go irec manasuc, go hâcne kiŋaŋŋic‐nane;
go kiŋaŋŋic‐nane junarecmurâ baʒawiecgupo;
o Israe, no gore mi nikecnuocmu.
22 No hehesicge karorac iŋucne bârâriekopac
â sâqocnege i hâweŋ iŋucne ficne sue‐garekopac.
No firuecgupo irec norao risiezemec.
23 Wofuŋzi iŋuc ewecte sambâŋne sambâŋne semuja heniŋ
â mâreŋ fâhâŋne fâhâŋne ŋoŋe ʒeri eniŋ;
tikine tikine ŋoŋe aŋara hehuc ʒeri fânâŋ eniŋ,
kâtere maŋnao jâc doma rakac sasawa ŋoŋe mâmâc!
Wofuŋ e Jakobo firuewec
erâ Israe ŋic jaŋerao ʒâŋe‐ticne bataniŋkeocmu hâcne.
24 Neŋgoc bumaŋko fuŋkerâ baʒawiecguwec Wofuŋ fifiruege
e hâcne ʒiŋuc mukac: “No Wofuŋ,
noni hâcne wiac sasawa bâfua‐fârepo,
no sambâŋne sambâŋne bucnane fârehuc bâdâmârepo
erâ mâreŋ qaratiepo; ehame mozi moc baficnuzac?
25 No siocŋic jaŋe sowidâŋ mupie mupe fâri tâmiric eekac,
â qaŋgecŋic mutuc bacjopaekopac;
no maŋɋârâŋhec jaŋe bârisiec‐jopape wiseeŋgopieŋ,
erâ mamana gie‐jeŋic hetikiepe mutuc jaŋere sâc eekac.
26 No kiŋaŋŋicfâc‐nane jaŋere dâŋ basanaŋkepemu
erâ biŋe mumufâc‐nane jaŋe mumupaŋ dâŋ musokambiŋ
i mupe fârinehec eocmu;
no Jerusalem haere ʒiŋuc mupemu:
‘Ŋecjucfâc‐ticne mocwâc fuanʒepieŋ,’
â Juda haefâc‐ticne jaŋere mupemu:
‘Jaŋe heɋârec‐jopahuc bazo,
erâ sesuctac i noni bâpiaŋkepemu.’
27 No hâwec ʒâkâŋ âzâcnepemu: ‘Ʒicke kereŋ ec,
noni mupe opâge kereŋke‐fâreocmu.’
28 No Kirure mukopac: ‘E lama soŋaŋ‐nane,
irec dâŋ mana biric epo i eki fârine bâfuazejec,’
ehuc Jerusalemte ʒiŋuc muzejec, ‘E mocwâc heɋârehuc bazo’;
â taha ufuŋte muzejec: ‘Wâtuŋ‐ticne râepie huoc!’ ”