52
Wofuŋte kiŋaŋŋiczi ʒârâ ʒâpâ faio juwec
1 O Zioŋ, go mana ɋâɋârec,
ehuc tâpiri rorâ sanaŋkec!
O Jerusalem, tiri hae, go eri ŋaqige hetec huoc!
Manakic, ŋic ma tâmiric â wânâŋhec
jaŋe haemaŋgao mocwâc mi raʒinʒepieŋ.
2 O Jerusalem hae, kâpâcwâru bacgukicne,
go sahacgaonec gâc wândoc itiriŋketec wahame faharec;
o Zioŋte otâ, upegao niŋgiŋ fokac i firuetec wahaoc.
3 Wofuŋ e ʒiŋuc mukac hâcne: “Ŋoŋe furi tâmiric bacŋopa rakicne irec moneŋ tâmiric jaha batarac‐ŋopazo. 4 Wofuŋ Anutu e kecʒiŋuc mukac hâcne: Ŋicfâc‐nane jaŋe Aigita mâreŋko jaba juniŋte mârâc jaha ira humbiŋ; eme ʒâhec Asiria ŋic jaŋe fuŋne tâmiricko bâʒâic‐jopambiŋ. 5 Ʒiŋuczia ine ʒira wemo wiac fua‐narekac, Wofuŋzi iŋuc mukac; ŋicfâc‐nane furi tâmiric bacjopa rakicne i; bomboŋ ejareeŋgopieŋ jaŋe aŋara heeŋgopieŋ, ehuc ʒâŋe‐nane i ʒoaŋ sâc ʒuʒuhuc jaha musoriŋkeeŋgopieŋ, Wofuŋzi iŋuc mukac. 6 Irec ŋicfâc‐nane jaŋe ʒâŋe‐nane mana taranʒepieŋ; ehuc ʒoaŋ ira ʒiŋuc mana taranʒepieŋ, noni hâcne dâŋ ʒiŋuc muekopac: No ʒine hâcne.”
7 Kiŋaŋ warekac, joroc kike biaŋ, ohec ohec,
tiki hatao biŋe biaŋ barâ fisikac.
Wama dâŋ muhuc juju biaŋte biŋe bawarekac,
ehuc bâbâpiaŋ dâŋ musokakac.
Zioŋ âzâcnekac: “Anutugezi ŋicwofuŋ gie bakac.”
8 Hazec râeniŋ, ruc bapa ŋicfâc‐ŋeŋic qâturerâ
ʒeri gae marac sâko heŋgopieŋ,
ʒâŋezi hohonec ehuc mana ʒiziweŋgopieŋ:
Wofuŋzi Zioŋko risie warekac.
9 Ajoc, Jerusalem hae sesucne sesucne,
gae micʒonʒoŋ‐ŋeŋic fuaoc,
Wofuŋzi ŋicfâcne bâmiriŋ‐jopakac,
Jerusalem niŋgiŋ‐ticne goroŋkekac.
10 Wofuŋzi tiri tâpiri‐ticne bâfuakac,
ŋicne ŋicne jaŋere maio.
Mâreŋ qaŋeŋne jaŋe iŋuc jaha
Anutu‐nâŋecte bâbâpiaŋ hone‐fâreniŋmu.
11 Wiserâ raniŋ, wiserâ raniŋ, Babe haeonec waharâ raniŋ,
ehuc wiac mamakâcne ba bâuac moc mi eniŋ;
Wofuŋte râqâc wiac ameckeeŋgopieŋ ŋoŋe
hae irec maŋnaonec waharâ raniŋ,
â maŋsahac‐ŋeŋic ʒure ɋaɋackeniŋ!
12 Ŋoŋe fâro ehuc mi wahanʒepieŋ
erâ ʒocnehec mi wisenʒepieŋ.
Wofuŋzi bânie‐ŋareocmu
â Israere Anutu e râpefuŋ‐ŋeŋicko fâhuc juocmu.
13 Manaŋgopieŋ, kiŋaŋŋic‐nane e gie‐ticne bame
fârinehec eocmu, e fahareme dopeckezo,
eme fekicne sâko erâ juocmu.
14 Sahac‐ticne ŋic gâcne jaŋere sâc mi bâfuahuc
mamakâcne ewec â hawari‐ticne i ŋic nâŋâcne iŋucne wâc aricne,
irec ŋic bocjaha jaŋe e honehuc bipic‐jeŋic taraocmu.
15 Eme ŋicguru bocjahazi iŋuc jaha wareckeniŋmu,
ehame ŋicwofuŋ jaŋe ere erâ fâsâerâ domaniŋmu;
jaŋe wiac ʒâŋe furu honeniŋmu
â dâŋ hazec furu mananiŋmu irec.