55
Wofuŋ e buuruc‐ticnere erâ aki anonoc enâre‐fâreekac
1 Wofuŋzi ʒiŋuc mukac:
“Me, opâre hâmoŋgopieŋ ŋoŋe opâo ware‐fâreniŋ,
â moneŋ tâmiric juŋgopieŋzi ware wiac furi mâc ro nâc eniŋ.
Ware waiŋ opâ â susu furine baniŋ,
moneŋ tâmiric â okac babazu tâmiric rorâ nâniŋ.
2 Wemocte wiac mi nânânere moneŋ‐ŋeŋic beheŋgopieŋ?
 nâ gapec mi eenere ʒâic gie baŋgopieŋ?
Dâŋnane paŋʒâic manarâ wiac biaŋne nâniŋ,
wiac wokemaŋnehec nâhuc mana ʒiziweniŋ.
3 Hazec‐ŋeŋic râerâ norao wareniŋ,
ehuc dâŋ manapie maŋ qâqâtâc‐ŋeŋic ɋâreoc;
eme Dawidihec ʒâʒâfic epec irec feŋeŋko
ŋoŋehec ʒâʒâfic sanaŋ ezepac.
4 E hâcne ŋicguru jaŋere mumutaniŋ âkendâŋnepo,
erâ micne â mumutâc jujareocte mucnepo.
5 Manakic, ŋicne ŋicne ʒâŋe ruruŋ‐jopakic i wira‐jarezemec,
â kâuc bacguŋgopieŋzi gorao quruŋ herâ fisiniŋmu.
Wofuŋ Anutuge â Israere Tiri rune ere erâ eniŋmu,
eki gore ʒâŋe biŋe bafaharewec hâcne.
6 “Wofuŋ e bâbâfuane biaŋ juhame basanʒepieŋ,
e bembeŋko juhame wiracnenʒepieŋ.
7 Sâqocne bapa e hata‐ticne behezejec,
â hehesicnezi mamanasu‐ticne qikiŋnezejec;
ehuc Wofuŋtao risieme maŋuruc qacneocmu,
Anutu‐nâŋectao wareme kiŋticne buafec jaha behecneocmu.
8 Wiac nore mamanasu i ŋoŋere mamanasu mâcne,
â ŋoŋere hata i nore hata mâcne, i Wofuŋzi mukac.
9 Sambâŋzi mâreŋ beherâ faic jâmbâŋ fokac,
irec sâc nore hatazi ŋoŋere hata beherâ fekac,
â nore mamanasuzi ŋoŋere mamanasu sirickekac.
10 “Hoe â titikuc jahe sambâŋkonec wahaekopirec,
erâ ira mi ririsie mâreŋ bâgunuckeekopirec,
ehuc gume he siwiŋ ecnekupire wâcwiac âkeʒuekac,
eme hesaracte ukic â hobure nânâ fuaekac,
11 sâc ijaha nore mickonec dâŋ wahaocmuzi ezejec;
i aputac erâ norao mâc mi risiezejec.
Mâcne, no mana biric ecnekopac gie i bazejec,
â hata kiŋaŋ sorekopac irec fârine bâfuazejec.
12 “Irec ŋoŋe ʒeri ehuc fahare ranʒepieŋ,
eme wamao jowac‐ŋopazo.
Rahapie mâreŋ tikine â facne jaŋe ʒeri bari eniŋmu,
â kâtere jâczi ofac heŋareniŋmu.
13 Fâpâ uupic irec okacne ʒariŋ âkeʒuocmu,
â ʒâŋte okacne ware imbirua fuaocmu.
Eme i honehuc Wofuŋ muteŋkehuc juniŋmu;
i ma fofo sanaŋ mi bâbârâriene eocmu.”