57
1 Ŋic tiŋnezi sipirickeekac,
eme moczi irec busâqoc moc mi manaekac;
ŋic biaŋne hâmo sipiric ehapie
moczi moc maname mi quŋkeekac.
Jâmbomac, ŋic tiŋne e hehesicte erâ sipirickeekac.
2 Hata‐jeŋic fâretiŋ rahuc jueŋgopieŋ,
i jaŋe wamao juniŋmu erâ fofo‐jeŋicko fomananiŋmu.
3 Qaŋgec bapa ŋokac ere motecfâc, boe sau â sasec ŋokac
eraonec fuakicne ŋoŋe hâcne bembeŋko ʒira ware domaniŋ!
4 Ŋoŋe mo mu ruruc ecnezo muŋgopieŋ, me more dâŋ muniŋte
micŋeŋic boc aŋkeme nameŋ qaŋgopieŋ?
Me ŋoŋe qaqatara â eeatuc
irec ɋâricfâc mi juŋgopieŋ me?
5 Ŋoŋe hâcne jâc ɋâricne nâkumuchec doma rakac
irec fuŋnao ŋehuc maŋŋeŋiczi ɋâŋ qâqâtâcte bâruŋkeekac,
ŋoŋe hâcne opâ wâcko haroŋaŋ uuŋnao
naru motec hezu rikec ejareeŋgopieŋ.
6 Go opâ wâcko qânâ fâfâsâcne gahacne biŋe bâwosâec‐jopameŋ,
eme qânâ i jaŋe okacne bâfua‐garenʒepieŋ.
Go jaŋe hâcne taha bâzire waiŋ opâ hoŋke‐jaremeŋ
â bâzi rike‐jaremeŋ.
Eme wiac iŋucnezi bunane sâcne bâmâteŋkeocmu me?
7 Go tiki ʒoricne ʒora irec botâŋnao fofoge rumackemeŋ,
erâ ira ferâ taha bâzi rikemeŋ wâc.
8 Motâc â motâcte wâtuŋ râpenao mage râemeŋ;
go râpecnurâ fofoge bâpiaŋkemeŋ, erâ rumackerâ waha fomeŋ;
go jaŋehec maŋ mocjaha erâ sasec gie bahuc mimi‐jeŋic honemeŋ.
9 Go wokemaŋ opâne â wiac âsune furi sâko bocjaha
ameckerâ Moleke nemu erao rameŋ;
go kiŋaŋŋicfâcge taicko sorec‐jopatec rambiŋ,
i hârâcko sorec‐jopatec humbiŋ hâcne.
10 Go hata fuŋne fuŋne âtehuc ʒâic gie bahuc jumeŋ,
ehuc sifu ʒiŋuc mi mumeŋ: “Gie i maŋgâŋ jaha bakopac.”
Aricne, go irec tâpiri hati bâfuameŋte mi betaŋkemeŋ.
11 Go mo araŋ bacnehuc hâwicgume no eatucnumeŋ,
ehuc nore mi manasumeŋ â manatec mi ŋemâckewec?
Me fuŋne ʒiŋuc mi fokac me:
No dameŋ ʒora dâŋemâc soŋkerâ jupo irec nore mi hâwicguwec?
12 No tiŋne juju â eebapage weniŋuc fokac
irec fuŋne bataniŋkepe mi baficguocmu.
13 Go wira wâwâsic etecne ɋâŋ qâqâtâcfâcge fuŋne fuŋne
jaŋe baficguzo murâ baficgunʒepieŋ.
Jaŋe mâŋâŋzi ficne suec‐jopame raniŋmu,
ehuc nakafezi wefurâ omaeekac irec sâc omaeniŋmu.
Norao roweckeocmuzi ine mâreŋ rauckeocmu
â tiri tiki‐nane i ere biŋe eocmu.
Anutuzi ŋicfâc‐ticne bafic‐jopahuc bâpiaŋ‐jopaocmu
14 Eme dâŋ ʒiŋuc fuaocmu: “Mâreŋ bâburockeniŋ,
bâburockehuc hata bâʒâweniŋ,
ŋicfâc‐nane jaŋere hatao aka wiac fokac i bârârieniŋ!”
15 Femicne â Fekicne sâko juraʒihuc juekac sanaŋ,
ʒâŋene Tiri rune, eki ʒiŋuc mukac hâcne:
“No faic jâmbâŋ tiri haeo juekopac,
erâ maŋjeŋic ima qakicne â bawahakicne jaŋerao mâmâc,
i maŋjeŋic bawahakicne bafaharepemurâ
â maŋjeŋic ima qakicne qâzuckepemurâ iŋuc eekopac.
16 No aaric dâŋ hati mi mujarepemu
me kimbeŋ i tofamâc mi qajarepemu,
i mâro‐jeŋic mecne â maŋ qâqâtâc no nahac bâfua‐jarepo mecne
izi nore maio rokawezacte.
17 Jaŋe buchâro ehuc sâqorembiŋte aaricnume jopapo,
no ʒâŋe mai‐nane bâsoŋkehuc kimbeŋ qapo;
jaŋe ine sifu râpecnurâ jaŋe jaŋacne maŋte hata âtembiŋ.
18 No hata‐jeŋic honepo erâ sifu bâpiaŋ‐jopapemu;
no jowac‐jopa rarâ hemiriŋ‐jopapemu,
ehame busâqoc mana‐jareeŋgopieŋ
jaŋerao daŋge mumuteŋ fuazejec.
19 Ŋic ʒoricko me bembeŋko jueŋgopieŋ
jaŋerao wama fârine fua razejec,
eme no bâpiaŋ‐jopapemu, Wofuŋzi iŋuc mukac.
20 Ŋic hehesicne jaŋe ine hâwec siri sâko qaekac iŋucne,
i benoŋ baocte eipieha siri‐ticnezi
sohoŋ â jawa qâsueme tiŋko feekac.
21 Ŋic hehesicne jaŋe wama mi bâfuaniŋmu,”
Anutu‐nanezi iŋuc mukac.