60
Wofuŋte huriri qâreŋzi Zioŋko fuazokac
Faharerâ tamaec, ʒoctamacge fisikac,
Wofuŋte huriri qâreŋzi tamae‐garekac.
Manakic, dapâczi mâreŋ qofackekac,
dâpâc qisiriczi ŋicne ŋicne foŋjopakac;
ehame gorao Wofuŋzi ʒoaŋ iŋucne wefukac,
ere huriri qâreŋzi gorao uucne riŋkekac.
Eme ŋicne ŋicne tatamacgao fisiniŋmu,
â ŋicwofuŋ jaŋe huriri bâbâricgao wareniŋmu.
 
Qâhâŋnerâ rârec rârec fitec rame honec:
Ʒeŋgoma tumaŋnembieŋ gorao wareŋgopieŋ;
ŋokâfâcge wiwickonec fisiniŋmu,
otâfâcge meo bacjopa wareniŋmu.
Eme go hone aŋac erâ ʒâŋege qârucneocmu,
maŋgezi mana ʒiziwerâ ʒeri bari ecmu,
i hâwecte mâririzi gore biŋe ekacte,
â ŋicne ŋicne mafa‐jeŋic gorao warekacte.
Kamele guru sâkozi bârârâŋguniŋmu,
kamele socɋâri Midiaŋ â Efanec,
erâ wâc Sebanec mâmâc fisiniŋmu.
Jaŋe gol â hosâc âsu bagare wareniŋmu,
ehuc Wofuŋte ʒâŋe biŋe musokaniŋmu.
Kedaranec lama guru jaŋe gore erâ heâckembiŋ,
Nebajotinec lama ŋicne jaŋe gore biŋe embiŋ.
Manape biaŋkeha alata‐naneo fenʒepieŋ,
eme biŋe rara ficnane jai jowarecnehec ezejec.
 
Keci weni jaŋe karorac tinac ɋeŋjaha wareŋgopieŋ?
ehuc hapâzi sareŋ‐ticnao risie heekac irec sâc eŋgopieŋ?
Woke gomba nore erâ heâckeŋgopieŋ,
Tarasisionec racwoke jaŋe micne baŋgopieŋ,
i ŋokâfâcge wiwickonec wokec‐jopa wareniŋte,
â moneŋ mafa‐jeŋic mâmâc ameckerâ fisiniŋte.
I Wofuŋ gore Anutu ere ʒâŋere eŋgopieŋ,
Israe guru Tiri Wofuŋ‐jeŋic ere hâcne,
eki ʒâŋe biŋege bafahare‐garewecte.
10 Ŋic jabanezi qânâsacge bagareniŋmu,
ŋicwofuŋfâc‐jeŋic jaŋe kiŋaŋ qagareniŋmu.
No kimbeŋ‐nanere jâmbomac hetapaicgupo,
ʒi ine anonoc‐nanere ehâmo‐garekopac.
11 Sacmotâcge aaŋ domahuc juzejec,
ʒoaŋko me ŋafeo mi hezo.
Eme ŋicne ŋicne mafa mâriri‐jeŋic fehuc fozejec,
â ŋicwofuŋfâc‐jeŋic birihec fisirâ fenʒepieŋ.
12 Ŋicne ŋicne â ŋicwofuŋfâc‐jeŋic
gore kiŋaŋ qaniŋte qikiŋneniŋmu jaŋe siroweniŋmu,
ŋicne ŋicne i jaŋe hâcne sipiricke‐jâmbâŋkeniŋmu.
13 Lebanoŋ tikire eri qaraweŋ gorao fisiocmu,
wete, becʒi â jâmâzâc hâcne,
i tirific‐nanere hae ʒoŋa erickeocte;
eme no kike‐nanere ââtesiŋ ericke bâpiaŋ epemu.
14 Bâʒâicgumbiŋ jaŋere ɋâricfâc
jaŋe gorao dadape fisiniŋmu
â qaisocgumbiŋ sasawa jaŋe maŋfuŋgao fodapeniŋmu,
ehuc ʒâŋege ʒiŋuc muniŋmu: “Wofuŋte hae sâko”,
“Israere Tiri rune ere Zioŋ”.
 
15 Behe qaisoc egarehuc gorao sicne fotâc moc mi embiŋ;
irec okacne bafaharecgupe eri qaraweŋhec erâ juzemec,
eme mimiŋzi ɋâric hone ʒiziwecguhuc junʒepieŋ.
16 Go ŋicne ŋicne jaŋeraonec susu nâhuc juzemec
â ŋicwofuŋ jaŋe moŋ gumecgupie nâzemec,
ehuc ʒiŋuc mana tarazemec:
Bâbâpiaŋge i Wofuŋ no hâcne,
â fifiruege i Jakobore tâpiri rune no hâcne.
 
17 No aeŋ bâbâroŋte okacne gol bafisipemu
â aeŋte okacne siliwa,
jâcte okacne aeŋ bâbâroŋ erâ qânâre okacne aeŋ,
iŋuc bafisipemu.
No wama bâfua‐garepe izi soŋaŋguzejec
â tiŋne juju bâfua‐garepe izi eebapagere guriŋ bazejec.
18 Hae mâreŋgao bâbâʒâic me ima me sisipiric
irec biŋe mocwâc fuame mi manazemec,
go qânâsacge irec ʒâŋe “Bâbâpiaŋ”
â sacmotâcgere ʒâŋe “Mumuteŋ” muzemec.
 
19 Ʒoaŋte tatamac â mosare tatamaczi mocwâc mi tamae‐garezejec;
aricne, Wofuŋzi ʒoctamacge fofo sanaŋ
â Anutugezi huriri qâreŋge juzejec.
20 Ʒoaŋgezi mocwâc mi huocmu â mosagezi mi pitiwaocmu,
aricne, Wofuŋzi ine ʒoctamacge fohuc juocmu sanaŋ,
ehame ki mamakuc dameŋge taraocmu.
21 Ŋicgurufâcge jaŋe ʒeŋgoma tiŋne juniŋmu;
jaŋe jufu gie‐nanere gitecne â meqâreŋ‐nane juhuc
mâreŋ tatara tâmiric rauckepie mumuteŋ‐nane fuazejec.
22 Ŋic guru piticnezi sawerâ guru sâko fuanʒepieŋ
â qarâ suriŋnezi ŋicguru tâpirichec enʒepieŋ.
Wofuŋ no hâcne dameŋne maickeme
ɋeŋjaha fuaocte giene bapemu.