64
1 Go sambâŋ fotâcnerâ wahanʒaŋ,
eme tiki jaŋe gore maio qiriŋ qanʒapiŋ me!
2 I ʒoczi nâŋ qaqa wiac ʒâseŋkeekac
â opâ ʒarâ du âteekac irec sâc,
ehuc râsifâcge jaŋe ʒâŋegere fuŋne bataniŋke‐jaretec mananʒapiŋ,
eme ŋicne ŋicne jaŋe gore maio ɋarac ɋarac qanʒapiŋ.
3 Ehame go wiac hâhâwicne,
nâŋe irec ʒâŋe mi fieŋgopeneŋ,
i moc enʒaŋ, go wahanʒaŋ me,
eme tiki jaŋe gore maio qiriŋ qanʒapiŋ!
4 Fuŋnaonecteaŋ Anutu mocte biŋe mâcne,
gore mocjaha ʒiŋuc hone manac ekicne:
Gorao roweckeekac e bafickehuc juekic.
5 Buafec jaha tiŋne jujure gie baeŋgopieŋ
â gore hatao juhuc manasucgueŋgopieŋ
jaŋehec bâbâfuac eekic.
Manakic, go aaric manameŋ,
nâŋe ine sifu sâqocne bambeŋ,
ehuc dameŋ ʒora râpecguhuc jumbeŋ.
6 Nâŋe iŋuc ehuc ʒeŋgoma ŋic wâwânâŋhec iŋucne embeŋ,
â eebapa‐nâŋec tiŋne
i ŋaqi sohoŋ ruacnekicne irec sâc ewec.
Nâŋe ʒeŋgoma jâc rehacne iŋucne hâmo ɋaŋac eeŋgopeneŋ
â sâqocne‐nâŋeczi mâŋâŋ iŋucne erâ ficne suec‐nâpoekac.
7 Moczi moc ʒâŋege mi riwaseckeekac
me gorao roweckeocte mi afeckeekac;
go ʒâŋe maige bâsoŋke‐nâremeŋ
ehuc kiŋbahac‐nâŋeczi bâmâc‐nâpoocte qikiŋ‐nâpomeŋ hâcne.
8 Erâ Wofuŋ, go sifu mamac‐nâŋec jukomec,
nâŋe afe, goki ine kuʒifâcge bacnâpomeŋ,
nâŋe ʒeŋgoma meqâreŋfâcge.
9 O Wofuŋ, go aaric boc mi manac,
ehuc sâqocne‐nâŋecte mi mac manasu‐nârehuc juzemec.
Go mana honec, nâŋe ʒeŋgoma ŋicfâcge mi juŋgopeneŋ me?
10 Tiri hae sâkofâcge jaŋe sesuctac embiŋ,
Zioŋ i sesuctac ewec wâc,
Jerusalem i niniŋ siarereŋ fokac hâcne.
11 Tirific‐nâŋec eri qaraweŋnehec,
maŋnao mamacfâc‐nâŋec jaŋe muteŋ bâteŋ egarehuc jumbiŋ i ʒocte nânâ ewec,
ehame wiac ʒâŋe rara biaŋ‐nâŋec i wâc ima bafârekicne.
12 O Wofuŋ, go wiac i hone takirezo mukic me?
Erâ dâŋemâc juhuc boc badapec‐nâpozo mukomec me?