8
1 Ehuc Eferaim ŋic jaŋe Gideoŋ âzâcnerâ mumbiŋ: “Go Midiaŋ ŋic jopazo rameŋ dameŋ ira wemocte mi hefârec‐nâpomeŋ? Wemo mâsi enâremeŋ?” Iŋuc muhuc râsi sâko ecnembiŋ. 2 Epie ʒiŋuc jazawec: “Ŋoŋe wiac embiŋ i nore sâc jâurukac. Eferaimte waiŋ hândâŋ ro nusec ee izi Abieʒere waiŋ gie mi sirickekac me? 3 Anutu e Midiaŋ ŋic fekicne jahec‐jeŋic Orebe â Ʒebe meŋeŋicko râec‐jofawec, i ŋoŋe no siricnumbiŋ ekac.” E iŋuc mume jaŋe aaric manacnembiŋ i fâre wahawec.
Gideoŋzi Midiaŋ ŋicwofuŋ rocjofawec
4 Eme Gideoŋ â ŋic 300 jaŋe râsi jâpec‐jopa raku Jordaŋko fisirâ fotâcnehuc docke sâqorembiŋ. 5 Irec Gideoŋ e Sukoti ŋic ʒiŋuc jazawec: “Ŋic bâjâpecnuŋgopieŋ ʒi jaŋe nânâ gumec‐jopanʒepieŋ. Midiaŋ ŋicwofuŋ Ʒeba â Zalimuna jâpec‐jofaŋgopeneŋte dockeŋgopieŋ.” 6 Eme Sukoti haere ŋic fekicne jaŋe mumbiŋ: “Ʒeba â Zalimuna jahe biac rocjofamec irec nâŋe momorifâcge nânâ jarenaŋmu?” 7 Eme Gideoŋzi muwec: “Sâcne, Wofuŋzi Ʒeba â Zalimuna nore meo râec‐jofame no mâreŋ burocnaonec fâpâ â qiŋambuzi biuc‐ŋeŋic bâtâc qâtâcnepemu.” 8 Eme irecnec ine Penuele haeo ferâ ira iŋuc jaha jazawec. Eme Penuele ŋic jaŋe Sukoti ŋic jaŋe âzâcnembiŋ sâc ijaha bâtikiecnembiŋ. 9 Eme Gideoŋ e Penuele ŋic ʒiŋuc jazawec: “No wamao risiehuc ficʒora ʒi heroc qâropiepemu.”
10 Eme Ʒeba â Zalimuna jahe ʒoaŋ wewefunaonec momorifâc‐jekic ʒika nâfocne 15 tauseŋ jaŋehec Karakora haeo jumbiŋ. Â momori 120 tauseŋ jaŋe ʒikao omaembiŋ. 11 Eme Gideoŋ e gurufâc‐ticne jaŋehec Noba â Jogobeha hae i ʒoaŋ wewefunaopec ŋehapire feraku momori jaŋerao fisimbiŋ. Momori guru i jaŋe wisembeneŋ muhuc rucgereŋ tâmiric jumbiŋ. 12 Ehame Midiaŋ ŋicwofuŋ Ʒeba â Zalimuna jahe wisepic. Wisepire jofa jâpec ejacte raku rocjofambiŋ. Iŋuc fuame momori guru tâpiri‐jeŋic ŋeŋgoroŋkewec.
13 Eme Joasi ŋokâ‐ticne Gideoŋ e ʒikaonec risierâ Heresi heâŋko wahawec. 14 Wahahuc Sukotinec ŋicmotec moc bâfuarâ ro basanaŋkewec. Ehuc Sukoti haere ŋic fekicne â micne jaŋere mu indiŋ ecneme ʒâŋe‐jeŋic 77 qâreŋkecnewec. 15 Ehame Gideoŋ e Sukoti ŋic jaŋerao fisirâ ʒiŋuc jazawec: “Ʒeba â Zalimuna ʒi honec‐jofaniŋ. Ŋoŋe hâcne jahere ʒiŋuc muhuc pepec dâŋ nazambiŋ: ‘Ʒeba â Zalimuna biac rocjofamec me? Irec nâŋe ŋicfâcge dockeŋgopieŋ jaŋe nânâ gumec‐jopanaŋmu?’ ” 16 Eme Gideoŋ e hae irec micne rocjoparâ mâreŋ burocnaonec fâpâ â qiŋambu rorâ izi Sukoti ŋic bâtiŋ‐jopawec. 17 Erâ Penuele haeo ficʒora i heroc qâropierâ hae irec ŋic sâqezi qâhâmoc‐jopawec.
18 Gideoŋ e iŋuc erâ Ʒeba â Zalimuna jasarâ muwec: “Taboro haeo ŋic weniŋucne qâhâmoc‐jopapic?” Mume jahe bâtikiecnehuc mupic, “Jaŋe go iŋucne sasawa. Jaŋe ŋicwofuŋ mocte ŋokâfâc tinac.” 19 Mupire eki muwec: “Jaŋe ɋafâc‐nane; neŋgoc‐nanere ŋokâfâc. Ŋohe jaŋe mi qâhâmoc‐jopazapic muzac no wâc mi âke hâmoc‐ŋofazapo, i jâmbomac Wofuŋte maio mukopac.” 20 Iŋuc murâ mârâc ŋokâ‐ticne Jetera âzâcnerâ muwec: “Ajoc, âke hâmoc‐jofac.” Mume motec e mi soka tarawecte hâwickeme sâqe‐ticne mi unuckewec. 21 Iŋuc eme Ʒeba â Zalimuna jahe Gideoŋ âzâcnerâ mupic: “Ajoc, go gahac faharerâ nâfoc. Moc e ŋic ehuc tâpiri‐ticnehec eekac.” Iŋuc mupire Gideoŋ e faharerâ Ʒeba â Zalimuna âke hâmoc‐jofawec. Ehuc ʒuŋe wiac kamele‐jekicte upeo fowec i rowec.
Gideoŋte juju bapa â hâmoc‐ticnere binaŋ
22 Eme Israe ŋic jaŋe Gideoŋ ʒiŋuc âzâcnembiŋ: “Go Midiaŋ ŋic jaŋere meonec batarac‐nâpokicte go â ŋokâge erâ wâc ŋosage ŋoŋe nâŋe soŋaŋ‐nâponʒepieŋ.” 23 Mupie Gideoŋzi ʒiŋuc jazawec: “No â ŋokâ‐nane nâhe mi soŋaŋ‐ŋopanacmu. Wofuŋzi soŋaŋ‐ŋopaocmu.” 24 Erâ muwec: “Wiac mocte numu‐ŋarepe. Ŋoŋe sasawa hazec warawa rombiŋ i nareniŋ.” (Jaŋe Isimaere ɋâricfâc irec hazec warawa‐jeŋic i golzi bakicne bajumbiŋ.) 25 Iŋuc mume jaŋe âzâcnerâ mumbiŋ: “Nâŋe buafec jaha garenaŋmu.” Eme qoruc rumackerâ ŋic sasawa hazec warawa‐jeŋic rombiŋ i guruckepie fewec. 26 Eme hazec warawa irec ŋemâc i 1 tauseŋ 700 irec sâc ewec. Erâ wâc ʒuŋe â eri qoqonaŋ gacne, erâ kamele jaŋere upeo fofo qoruc i â Midiaŋ ŋicwofuŋ jahere ŋaqi bâbâroŋzi âmuc âmucne i wâc mâmâc guruckembiŋ. 27 Eme Gideoŋ e wiac izi taha bapa ŋaqi moc ɋâŋ wiachec barâ e jahacne hae Ofira ira râewec. Eme Israe ŋic jaŋe fisirâ araŋ bacnehuc dapecnembiŋ. Ehame wiac izi Gideoŋ â kikefuŋfâcne jaŋere bitiŋ ewec. 28 Â Israe ŋic jaŋe sanaŋkerâ Midiaŋ ŋic bawahac‐jopakupie tâpiri‐jeŋic omaewec. Eme mâreŋ ira Gideoŋte dameŋko wama fuarâ foha jara 40 tarawec.
29 Eme Joasi ŋokâ‐ticne Jeru‐Baali e hae‐ticnao risierâ ira jusanaŋkewec. 30 Gideoŋ e ŋonâŋfâc‐ticne bocjaha jucnembiŋte ŋokâfâc‐ticne 70 fuambiŋ. 31 Â ŋokac moc Sikem haeo jucnewec eki ŋokâ moc rocnewec. Eme ere ʒâŋe Abimelec muwec. 32 Eme Joasi ŋokâ‐ticne Gideoŋ e jara bocjaha jâmbâŋ bazurâ ŋicqizec jâmbâŋ ehuc hâmome Abieʒe guru jaŋere hae Ofira ira mamac‐ticne Joasire qânâ hawec gufukicne fowec ijaha duckembiŋ.
33 Gideoŋ hâmohame izia Israe ŋic jaŋe mocwâc risierâ Baali nemu jaŋerao qohotahuc Baali‐Beriti wofuŋ‐jeŋic âkendâŋnembiŋ. 34 Ehuc râsifâc‐jeŋic ŋifec â ŋifec jaŋere meonec batarac‐jopawec Wofuŋ Anutu‐jeŋic hâcne ere nikec‐jopawec. 35 Erâ Jeru‐Baali, Gideoŋ hâcne, eki Israe ŋic ehâmo‐jarewec irec okacne garikiŋfâc‐ticne bubiaŋ moc mi qajarembiŋ.