1 Abimelecte faicnao Dodo ŋosa‐ticne Tola, Puare ŋokâ hâcne, e Israe ŋic ŋezic‐jopaocte fua tâcnewec. Ŋic e Isasa guruonec. E Eferaim tiki mâreŋko Samiri haeo juwec. 2 Ehuc jara 23 Israe ŋic jaŋerao mumutara gie bahuc juwec. Juku hâmome Samiri haeo duckembiŋ.

3 Eme ere faicnao Gileade ŋic Jairizi fua tâcnerâ jara 22 Israe ŋic jaŋerao mumutara gie bawec. 4 Eme ere ŋokâfâc 30 jumbiŋ, jaŋe doŋgifâc‐jeŋic 30 jaha jaŋere faio rac warec ehuc jumbiŋ. Erâ wâc hae‐jeŋic i 30 jaha Gileade mâreŋko ŋerawec irec ʒâŋe Jairire hae mumbiŋ i ʒiŋuczia fokac jaha. 5 Eme Jairi e hâmome Kamoŋ haeo duckembiŋ.

6 Eme Israe ŋic jaŋe Anuture maio wiac mamakâcne mocwâc embiŋ. Ehuc Siria â Sidoŋ erâ Moabi â Amoŋ â Filisa jaŋere nemu Baali â Asitaroto kiŋaŋ qajarembiŋ. Iŋuc ehuc Wofuŋ kiŋaŋ mi qacnehuc râpeckembiŋ. 7 Eme Wofuŋ e kimbeŋ‐ticne fahareme Filisa ŋic â Amoŋŋic jaŋere meo râec‐jopawec. 8 Iŋuc eme jaŋe jara ira Israe ŋic fific guguriŋ ejarehuc bâuruŋ‐jopambiŋ. Ehuc Israe ŋic Jordaŋ ocniŋucnao Amori ŋic jaŋere mâreŋ, Gileade hâcne ira jumbiŋ, i jaŋe jara 18 fific bacjopambiŋ. 9 Eme Amoŋŋic jaŋe Judare guru â Benjamiŋte guru â Eferaimte guru Jordaŋ ʒiŋucnao jumbiŋ i jaŋe jopaniŋte Jordaŋ opâ fotâcnerâ raʒimbiŋ. Iŋuc ejarepie Israe ŋic jaŋe fific guguriŋ faio jujâmbâŋkembiŋ.

10 Eme Israe ŋic jaŋe ʒiŋuc muhuc Wofuŋ kio wâwâsic ecnembiŋ: “Nâŋe Baali kiŋaŋ qajarehuc Anutu‐nâŋec go râpecgurâ sâqocne bahuc bugao bambeŋ.” 11 Eme Wofuŋzi Israe ŋic jazarâ muwec: “No Aigita ŋic, Amori ŋic, Amoŋŋic â Filisa ŋic jaŋeraonec mi batarac‐ŋopapo me? 12 Erâ wâc Sidoŋŋic, Amaleke ŋic â Maoŋŋic jaŋe fific bacŋopambiŋ. Eme no kio wâwâsic enarepie jaŋere meonec batarac‐ŋopapo. 13 Ehame ŋoŋe sifu no râpecnurâ nemu kiŋaŋ qajarembiŋ. Irec no mocwâc mi batarac‐ŋopapemu. 14 Ŋoŋe rarâ nemu hone wosâc ejarembiŋ jaŋerao kio wâwâsic eniŋ. Eme jaŋe fific guguriŋ dameŋ‐ŋeŋicko batarac‐ŋopanʒepieŋ.” 15 Iŋuc mume Israe ŋic jaŋe Wofuŋ ʒiŋuc âzâcnembiŋ: “Nâŋe sâqocne bambeŋte go gahac manakic sâc enârec. Mocjaha, ʒiŋuc numu‐gareŋgopeneŋ: Dameŋ ʒi batarac‐nâpoc.” 16 Iŋuc murâ nemu jabane i behec‐jopa‐fârerâ Wofuŋ kiŋaŋ qacnembiŋ. Iŋuc epie Wofuŋ e Israe ŋic jaŋerao ʒârâ hâriŋ fowec irec busâqoc mana‐jarewec.

17 Iŋuc fuame Amoŋŋic jaŋe roroc efârerâ Gileade mâreŋko teuŋ âtembiŋ. Eme Israe ŋic jaŋe wâc iŋuc jaha tumaŋne‐fârerâ Mizipa wâneŋko teuŋ âtembiŋ. 18 Ehuc Israe ŋic, Gileade mâreŋte micne bapa jaŋe jaŋaczia wiwioc erâ mumbiŋ: “Mo ŋiczi Amoŋŋic jaŋehec ʒika fuŋkeocmu? Eme ŋic eki hâcne Gileade mâreŋte ŋecjucfâc nâŋâcne micne juzejec.”