1 Juku dameŋ mocko padi qa roro dameŋ maickeme Simsoŋ e noniŋ motecne moc bâmockerâ ŋonâŋ‐ticne iqickeocte rawec. Ra fisirâ muwec: “No ŋonâŋ‐nanere ficmaŋko raʒipemu.” Iŋuc mume ŋokacte mamaczi ira raʒiocte mi manacnewec. 2 Ehuc muwec: “Go e qaisocke‐jâmbâŋkemeŋ, iŋuc manarâ wiʒecge râcnepo. Qoticnezi ine hahac‐ticne sirickerâ sahac hawari biaŋ jâmbâŋ jukac. Irec hahacte âkehoc qoticne rocmurâ mukopac.” 3 E iŋuc mume Simsoŋzi jazarâ muwec: “No dameŋ ʒi Filisa ŋic wiac hâhâwicne eŋarehuc sifu kiŋfâsâc jupemu.” 4 Iŋuc murâ Simsoŋ e ra kâte qâto 300 rocjopahuc waha wâc mâmâc rowec. Erâ kâte qâto jaŋere gec jajahec jajahec bâturehuc waha ŋondeŋ sâc râe basanaŋ efârewec. 5 Ehuc waha qazerâ kâte qâto goroŋ‐jopahuc jâpec‐jopame jaŋe Filisa ŋic jaŋere padi gieo hurâ rapie dâtâckekicne i mecne â dodomane mecne, erâ wâc oliwa â waiŋ gie i mâmâc ʒâmizie‐fârewec. 6 Wiac iŋuc fuame Filisa ŋic jaŋe mumbiŋ: “Wiac ʒi mozi ejec?” Iŋuc mu wioc epie ʒiŋuc jazambiŋ: “Wiac i Simsoŋzi ejec. Timinata haeo kimo‐ticnezi otâ‐ticne jâoc rorâ wiʒec‐ticne râcnewecte ejec.” Dâŋ iŋuc manarâ Filisa ŋic jaŋe fisirâ ŋokac e jahacne â mamac‐ticne ʒocko rikec‐jofambiŋ. 7 Iŋuc epie Simsoŋzi jazarâ muwec: “Ŋoŋe iŋuc eŋgopieŋte no ʒiŋuc mupaŋkekopac: No irec okacne bazu‐ŋarepe tarame behepemu.” 8 Iŋuc murâ imac‐jopahuc henʒaŋ qanʒaŋ‐jopawec. Iŋuc erâ ra Etamte qânâ hârâcte hawecko ŋec juc ewec.

9 Eme Filisa ŋic jaŋe rarâ Juda mâreŋko teuŋ âterâ fohuc Lehi hae râsi fisicnembiŋ. 10 Iŋuc epie Judaŋic jaŋe wio‐jarerâ mumbiŋ: “Ŋoŋe wemocte râsi enâreŋgopieŋ?” Eme Filisa ŋic jaŋe jazarâ mumbiŋ: “Nâŋe Simsoŋ niŋgiŋkerâ wiac enârewec irec sâc jaha ecnenaŋte warembeneŋ.” 11 Iŋuc mupie Judaŋic 3 tauseŋ jaŋe Etamte qânâ hârâc irec hawecko hurâ Simsoŋ ʒiŋuc âzâcnembiŋ: “Go Filisa ŋic jaŋe soŋaŋ‐nâpoŋgopieŋ i mi manakomec me? Go wemo mâsi emeŋte wiac ʒi fua‐nârekac?” Mupie dâŋ ʒiŋuc bâtikie‐jarewec: “Jaŋe wiac enarembiŋ irec sâc jaha ejarepo.” 12 Eki iŋuc mume jaŋe mumbiŋ: “Nâŋe niŋgiŋgurâ Filisa ŋic jaŋere meo râecgunaŋte wahaŋgopeneŋ.” Jaŋe iŋuc mupie Simsoŋzi ʒiŋuc jazawec: “Ŋoŋe mi nuniŋmu i mupaŋke‐nareniŋ.” 13 Mume jaŋe mumbiŋ: “Aricne, nâŋe mi gunaŋmu, mâc niŋgiŋgurâ Filisa ŋic jaŋere meo râecgunaŋmu.” Iŋuc murâ repa ɋâricne jajaheczi mene qarâ qânâ hârâckonec rorâ bawefumbiŋ.

14 Eme Simsoŋ e Lehi hae bâqiŋkeme Filisa ŋic jaŋe aŋara hehuc erao fisimbiŋ. Eme Wofuŋte Mârozi fuacnewec. Ehame repa jajahec meticnao fopic i ʒoczi wiac ʒânusuŋkekicne wahaekac irec sâc nusuŋkehuc wahawec. 15 Wahame Simsoŋ e doŋgi mocte mecqaŋeŋne ɋâricne moc fome honerâ rohuc izi hâcne ŋic 1 tauseŋ qâhâmoc‐jopawec. 16 Ehuc muwec: “Doŋgi mocjahare mecqaŋeŋzi jopape gurune gurune foraŋgopieŋ, doŋgi mecqaŋeŋnezi ŋic 1 tauseŋ qâhâmoc‐jopakopac.” 17 E dâŋ iŋuc mufârerâ doŋgire mecqaŋeŋ i beheme rawec. Eme mâreŋ ŋondeŋ irec ʒâŋe Ramalehi* Dâŋnâŋecko: Mecqaŋeŋ tiki. mukicne.

18 Iŋuc erâ opâre hâmo sâqorerâ Wofuŋ wâsickehuc muwec: “Go kiŋaŋŋicge no babatara gie sâko ʒi bapemurâ mana‐naremec. Eme ʒi opâre hâmohuc mi hezuc‐jopakicne jaŋere meo fepe sâckeocmu me?” 19 Eme Anutuzi Lehi haeo mâreŋ uuruŋ fowec i bâfâuckeme opâ wefuwec. Eme Simsoŋ e opâ i nâme juju â tâpiri‐ticne mocwâc fuawec. Eme opâ irec ʒaŋe Eŋhakore† Dâŋnâŋecko: Wâsickewec ere opâ ʒâŋe. mukicne. Eme opâ i Lehi haeo dameŋ ʒiŋuczia fokac jaha. 20 Eme Simsoŋ e Filisa ŋic jaŋe Israe mâreŋ soŋaŋkembiŋ dameŋ ira Israe ŋic jaŋere mumutara erâ juhame jara 20 tarawec.