1 “Jei, lama soŋaŋ ŋoŋe, sapa‐nanere lama guru mi soŋaŋ‐jopahuc bâtâtiec‐jopaeŋgopieŋ!” Wofuŋte dâŋ iŋuc. 2 Irec Wofuŋ, Israere Anutu e ŋicfâc‐ticne soŋaŋ‐jopaeŋgopieŋ soŋaŋ i jaŋere ʒiŋuc mukac: “Ŋoŋe lama gurufâc‐nane hone maiŋ moc mi ejarehuc bâtâtiec‐jopambiŋ â jâpec‐jopambiŋ. Manaŋgopieŋ, no eebapa‐ŋeŋic sâqocnere erâ bâtiŋ‐ŋopapemu! Wofuŋ nore dâŋ iŋuc. 3 Eme no lama gurufâc‐nane ʒanʒaŋne mâreŋne mâreŋne behec‐jopapo irecnec qânusuc‐joparâ jowac‐jopa ware sapa‐jeŋicko râec‐jopapemu, eme fua sawec enʒepieŋ. 4 No soŋaŋ râec‐jopape hone soŋaŋ ejarenʒepieŋ, eme jaŋe mocwâc mi hâwic‐jopaha gâgâmârânʒepieŋ, ehame moczi mocwâc mi sifuckezejec, Wofuŋ nore dâŋ iŋuc.”

5 Wofuŋzi kecʒiŋuc mukac: “Manakic, dameŋ moc maickeocmu ira Dawidire oso gitecne tiŋne moc mupe fuaocmu, eme eki ŋicwofuŋ juhuc guriŋ bapa gie‐ticne mamanahec bazejec â mâreŋko mumutiŋ dâŋ â tiŋne juju foocte giene bahuc juzejec. 6 Eme ere juju dameŋko Juda bâbâpiaŋ fuacneocmu â Israezi wama faio juocmu; ʒâŋe‐ticne ine ʒiŋuc muniŋmu: ‘Wofuŋ e tiŋne‐nâŋec.’

7 “Irec manac, dameŋ moc maickeocmu ira ʒiŋuc mocwâc mi muniŋmu, ‘Wofuŋ e jujâmbâŋkekacte Israe ŋic Aigita mâreŋkonec jowac‐jopame wahambiŋ.’ 8 Aricne, ʒiŋuc muniŋmu, ‘Wofuŋ e jujâmbâŋkekacte Israere ɋâricfâc jaŋe jaŋacne mâreŋko ŋec juc eniŋte faic mâreŋkonec â ira me ira bâtâtiec‐jopaweckonec jowac‐jopa warewec.’ ”

15 Irec Anutu Tâpiri Ɋuŋɋasaŋ Wofuŋ noni porofete jaŋere dâŋ kecʒiŋuc mukopac:

16 Anutu Tâpiri Ɋuŋɋasaŋ Wofuŋ e kecʒiŋuc mukac: “Porofete findaŋdâŋ ŋazaeŋgopieŋ jaŋere dâŋ mi mananʒepieŋ, jaŋe eatuc‐ŋopaeŋgopieŋ sawa; jaŋe Wofuŋte mickonec dâŋ mâcne, jaŋe jaŋacne maŋko fuac dâŋ ŋazaeŋgopieŋ. 17 Wofuŋte dâŋ qaisockeeŋgopieŋ jaŋe dameŋ sâc ʒiŋuc jazaeŋgopieŋ, ‘Ŋoŋe sâcne juhâc qâhâmoniŋmu’, â maŋrâŋgeŋ‐jeŋicte hata âtehuc jueŋgopieŋ jaŋe ʒiŋuc jaza‐fâreeŋgopieŋ, ‘Ŋoŋe wiac hâhâwicne moc mi fua‐ŋareocmu.’ ”

23 Wofuŋzi kecʒiŋuc mukac: “No Anutu bembeŋko sawa jujune â taicko mi jujune me? 24 Ŋic moczi sâcne haesoŋ mocko soŋkepaŋkeme no basapemu me? No sambâŋ mâreŋ ŋefuserâ mi jukopac me? 25 Porofete gâcne nore ʒâŋeo âke hotahuc findaŋdâŋ burecne mueŋgopieŋ, ehuc ʒiŋuc mueŋgopieŋ: ‘No guŋko dâŋ iŋuc manapac, iŋuc manapac’, i jaŋere dâŋ kâuc mi bakopac. 26 Porofete jaŋe maŋjeŋicko burecdâŋ babaju, â findaŋdâŋ burecne mumu, â maŋjeŋicte eeatuc mumusawe i wezimucko behenʒoŋgopieŋ? 27 Guŋ manarâ irec dâŋ nazaŋ gazaŋ eeŋgopieŋ i ŋicfâc‐nane nore ʒâŋe nikec‐jopaocte manasuhuc eeŋgopieŋ hâcne, mimiŋnefâc‐jeŋic jaŋe iŋuc jaha Baali nemu kiŋaŋ qacnehuc ʒâŋe‐nane nikec‐jopawec. 28 Porofete moc e guŋ manajecko irec binaŋ bazo murâ bazejec, â moc e nore dâŋ moc manajecko ine dâŋnane fâretiŋ jaha muzejec. Padi jawane â fârine i wemocko bâturec‐jofazo? 29 Dâŋnanere fuŋne kecʒiŋuc fokac i mi honeŋgopieŋ me? E ʒocbâruŋ iŋucne, erâ hamazi qânâ sâko qâfâuckepene dâkâ piic piic eekac irec sâc. Wofuŋ nore dâŋ iŋuc. 30 Irec mananiŋ, porofete moczi mocte mickonec dâŋnane manahuc fiuc roroc eeŋgopieŋ jaŋe râsi ejarekopac. 31 Erâ manaŋgopieŋ, porofete jaŋacne nameŋzi dâŋ murâ, Wofuŋzi mukac, muhuc burec eeŋgopieŋ, jaŋe wâc râsi ejarekopac. 32 Erâ no Wofuŋzi ʒiŋuc mupe mananiŋ: Noni mi sorec‐jopahape â dâŋ moc mi mutâcne‐jarehape porofete gâcne jaŋe guŋ burecnere findaŋdâŋ muniŋmu, erâ irec binaŋ bahuc ŋic ŋokacfâc‐nane jowac‐jopapie burec â eeatuc dâŋjeŋic reŋkehuc qâsorieniŋmu, porofete iŋucne jaŋe râsi ejarekopac. Jaŋe gie bapie ŋic ŋokac jaŋerao fârine biaŋne moc mi fuaekac. Wofuŋ nore dâŋ iŋuc.

33 “Jeremia, go ŋicguru keci jaŋe, me porofete moczi, me taha bapa moczi ʒiŋuc mu wioc egareniŋmu, ‘Wofuŋte tagi i wemo wiac mo?’ ine jazazemec, ‘Tagi i ŋoŋe hâcne, no hetara behec eŋarepemu.’ Wofuŋ nore dâŋ iŋuc. 34 Porofete moczi me taha bapa moczi me ŋic jaŋeraonec eki me eki ‘Wofuŋte dâŋ ine hâcne’, dâŋ iŋuc muocmu ŋic e â wiacfâcne jaŋe mâmâc bâtiŋ‐jopapemu. 35 Ŋaŋackoaŋ nazaŋ gazaŋ ehuc mu wioc ʒiŋuc enʒepieŋ: ‘Wofuŋzi dâŋ weniŋuc bâtikiewec?’ Me ‘Wofuŋzi dâŋ weniŋuc muwec?’ 36 ‘Wofuŋte tagi’, dâŋ i ine mu bâuac mocwâc mi enʒepieŋ, Anutu Tâpiri Ɋuŋɋasaŋ Wofuŋ, Anutu‐nâŋec hâcne, ere dâŋ musifuckepie ŋaŋacne dâŋzi tagi eŋarezacte. 37 Irec porofete ʒiŋuc mu wioc ecnezemec: ‘Wofuŋ e dâŋ weniŋuc bâtikie‐garewec?’ Me ‘Wofuŋ e dâŋ weniŋuc muwec?’ 38 Ŋoŋe ine ‘Wofuŋte tagi,’ dâŋ iŋuc mupie Wofuŋzi muocmu, ‘Ŋoŋe “Wofuŋte tagi,” ’ dâŋ i mi muniŋte muac‐ŋopa‐bipiehape sifu muniŋmuo 39 ine tagi iŋucne bafaharec‐ŋoparâ ŋoŋe mecne â mimiŋnefâc‐ŋeŋic hae ŋarepo i mâmâc mai‐naneonec behec‐ŋopape sipirickeniŋmu. 40 Eme mupe mimi tatara tâmiric â mimi qaqa fofo sanaŋ â mi ninikecne izi fai‐ŋeŋicko fezejec.”