31
Busâqocte okacne bubiaŋ fuaocmu
1 “No dameŋ ira hâcne Israere kikefuŋ birine birine jaŋere Anutu juhape jaŋe ŋicfâc‐nane jufârenʒepieŋ.” Wofuŋte dâŋ iŋuc.
2 Wofuŋzi kecʒiŋuc mukac:
“Israe ŋic jaŋe juju mana mâreŋ‐jeŋicko raniŋte rambiŋ,
dameŋ ira ʒikare micko mi fembiŋ,
ŋic nâfocne i jaŋe mâreŋ sawao aki anonoc bâfuambiŋ.
3 Ehame Wofuŋ no taickonec ware fua‐jarehuc mupo:
No maŋjauŋ eŋarehuc jupozi jukopac,
irec aki anonoc‐nane moc mi sakare‐ŋareekopac.
4 O ŋokac ʒeŋoŋ Israe! No bâɋârecgupe
faharerâ domazemec,
go sahacge mocwâc erickezemec,
ehuc gae woŋgâŋ eeŋgopieŋ jaŋere birio huzemec.
5 Samaria tiki mâreŋko waiŋ gie mocwâc sarazemec,
eme saraniŋmuzi fârine fuame nânʒepieŋ.
6 Eme ʒoaŋ moc maickeocmu ira Eferaim tiki mâreŋko
ruc bapa jaŋere wiwira kecʒiŋuc fuaocmu:
‘Ajoc, Wofuŋ Anutu‐nâŋectao Zioŋko fenaŋ!’ ”
7 Wofuŋ e kecʒiŋuc mukac:
“Jakobo ʒeri bubiaŋ ecneniŋ,
â ŋicne ŋicne micne‐jeŋic kiwac qawac ecneniŋ!
Hahaŋne bahuc ʒiŋuc muhuc muteŋkeniŋ,
‘Wofuŋ e ŋicfâcne jaŋe bafic‐jopawec,
Israe ŋic ʒanʒaŋne jaŋe hâcne.’
8 Manaŋgopieŋ, no faic mâreŋkonec jowac‐jopa warepemu,
â mâreŋ qaŋeŋnaonec ro nusec ejarepemu,
erâ ŋondeŋ‐jeŋicko tiŋtuŋ, kike demba, kiwechec
â kogochec juŋgopieŋ jaŋe mâmâc;
eme jaŋe ŋic guru sâkozi ʒira risie warenʒepieŋ.
9 Jaŋe kiohuc risieniŋmu,
eme noni bâmiriŋ‐jopahuc jowac‐jopahape wareniŋmu;
ehuc wâneŋ hatao mi fâfâc‐jopaha opâo fisinʒepieŋ;
no Israe mamac ecnehuc jahape
Eferaim e mârâc ŋokâ‐nane jukac hâcne.
10 “Ŋicne ŋicne ŋoŋe Wofuŋ nore dâŋ mananiŋ,
erâ nucne nucne taicko forakac ira musaweniŋ:
‘Israe bâtâtiec‐jopapo no ro nusec erâ
lama soŋaŋzi lamafâcne soŋaŋ‐jopaekac
irec sâc hone maiŋ ejarepemu.’
11 Wofuŋ no Jakobo firuepo,
ehuc tâpiri‐ticne sirickehuc jukac
ere meonec batarapo hâcne.
12 Jaŋe fisirâ Zioŋ tikio ʒeri gae heniŋmu,
ehuc Wofuŋ noraonec taha wiac kecʒiŋucte mana ʒiziweniŋmu:
Padi jacgoŋ, waiŋ, wokemaŋ, lama motecne â bulimakao;
eme juju‐jeŋic i hoezi jufu gie bâgunuckeekac
irec sâc ehame nânâ opâre mocwâc mi hâmoniŋmu.
13 Iŋuc fuame ŋokac ʒeŋoŋ jaŋe gae wohuc bubiaŋ mananiŋmu,
erâ ŋic socɋâri â ŋicqizec jaŋe ʒeri eniŋmu.
No ki mamakuc‐jeŋic hetikiepe ʒeri fuazejec,
â bâmiriŋ‐jopahuc busâqoc irec okacne bubiaŋ qajarepemu.
14 No taha bapa mâriri tahac‐jopape
bubiaŋ faio junʒepieŋ,
â ŋicfâc‐nane jauŋ bacjopape gapec‐jopazejec.
Wofuŋ nore dâŋ iŋuc.”
Rahezi ɋiefâcne jaŋere kiokac
15 Wofuŋzi kecʒiŋuc mukac:
“Rama haeo ojowa, ki uu â mu mamakuc sâko fuakac.
Rahezi ɋiefâcne jaŋere kiokac;
ɋiefâcne jaŋere erâ bâmiriŋkeniŋte eipieŋgopieŋ,
wiac omae‐fârembiŋte hâcne.”
16 Wofuŋzi kecʒiŋuc mukac:
“Go ojowa â ki uu behetec ʒâŋeucge kereŋkezejec;
manakic, ʒâic giegere furine i fokac,
Wofuŋ nore dâŋ iŋuc.
Jaŋe râsi jaŋere mâreŋkonec risie wareniŋmu.
17 Ɋâricfâcge jaŋe juju biaŋne fua‐jareocmu,
â ŋokâfâcge jaŋe mame sâko hae‐jeŋicko mocwâc risieniŋmu hâcne.
Wofuŋ nore dâŋ iŋuc.
18 No Eferaimzi mu mamakuc ehuc mume manapo,
‘Go bâtiŋnumeŋ, eme no bulimakao râŋgeŋne iŋucne
bâbâtiŋte fuŋne manapo.
Go Wofuŋ Anutu‐nane jukicte risiepemurâ
mana‐naretec maŋnane bârisiezepac.
19 No go behecgurâ busâqoc manapo,
ehuc fuŋne‐nane mana tararâ mimiehuc amec‐nane bofackepo.
No qurutuarâ maŋnane omaekac,
no socɋâri juhuc wiac miminehec bâfuapo
irec okacne fua‐narekac hâcne.’
20 Eferaim e ŋokâ biaŋ‐nane
â joroc‐nane mi jukac me?
No râsi ecnehuc dâŋticne muekopac sâc
sifu ere mocwâc manasuekopac hâcne;
irec maŋnanezi ere ecneekac,
no busâqoc manacnezore enarekac.
Wofuŋ nore dâŋ iŋuc.
Israe ŋic jaŋe risiepie Anutuzi jambuŋ‐jopaocmu
21 “Go qânâzi ma âkendâŋnehuc hatare wiac gâcne râe razemec,
ehuc hata rameŋ i hone dendeŋnec!
Israe ŋokac ʒeŋoŋ go risiec,
hae wiacge ŋerakac ira risie warezemec!
22 Israe ŋokac ʒeŋoŋ, go râpecnumeŋzi
wemocte maŋjahec boc ekomec?
Manakic, Wofuŋ no mâreŋko mâsi ɋâricne moc bâfuapemu,
ine ʒiŋuc: Ŋokaczi ŋic ŋezickehuc juocmu.”
23 Anutu Tâpiri Ɋuŋɋasaŋ Wofuŋ, Israere Anutu e kecʒiŋuc mukac: “No kâpâcwâruonec batarac‐jopapemu dameŋ ira Juda mâreŋko â hae sâko‐ticne ŋerakacko dâŋ ʒiŋuc mocwâc muniŋmu:
‘O tiŋnere ŋeŋe hae â tiri tiki,
Wofuŋzi jambuŋguzejec!’
24 Eme Juda hae sâko‐ticne sasawa jaŋe irec maŋnao jufârenʒepieŋ, hesarac ŋic â lama bulimakao bajuhuc mâreŋ râreckeeŋgopieŋ jaŋe mâmâc. 25 No hâcne rokawekicne jaŋe gumeqiŋ‐jopapemu â betaŋkekicne jaŋe bâgunuc‐jopape âke mâteŋ‐jopa‐fârezejec.”
26 Iŋuc nazahame guŋkonec ɋârerâ ʒâŋe fitâcnepo, ehuc guŋte aŋac manapo.
Ʒâʒâfic ɋâricnere dâŋ
27 Wofuŋte dâŋ kecʒiŋuc fokac: “Manakic, dameŋ moc maickeocmu ira Israe kikefuŋ â Juda kikefuŋ jambuŋ‐jopape ŋic mecne qowi mecne ukichec erâ fua sawec enʒepieŋ. 28 Eme qâfiec‐jopazore â heropiec‐jopazore â sipiric‐jopazore â bâsirowec‐jopazore erâ bâʒâic‐jopazore ruc bajarehuc jupo irec sâc jaha heɋârec‐jopazore â sarac‐jopazore hone soŋaŋ ejarehuc jupemu, Wofuŋ nore dâŋ iŋuc. 29 Dameŋ ira ʒiŋuc mocwâc mi muniŋmu:
‘Mimiŋne jaŋe waiŋ hândâŋ ʒaʒacne nâjumbieŋte
ɋâricfâc‐jeŋic jaŋere micsiec ariweekac.’
30 Aricne, ŋic sasawa jaŋe jaŋacne kiŋte erâ hâmoniŋmu, â waiŋ hândâŋ ʒaʒacne nâniŋmu sâc micsiec‐jeŋic ariweocmu.”
31 Wofuŋ e kecʒiŋuc mukac: “Manaŋgopieŋ, dameŋ moc maickeocmu ira noni Israe kikefuŋ â Juda kikefuŋ jaŋehec ʒâʒâfic ɋâricne moc bâfuapemu. 32 No mârâc jaha mimiŋnefâc‐jeŋic Aigita mâreŋkonec jowac‐jopapemurâ mejeŋicko rohuc jaŋehec ʒâʒâfic epo, ʒâʒâfic iŋucne mâcne. Ʒâʒâfic i rujeŋic no juipiehape sifu mana suacnuhuc bâtâcnembiŋ, Wofuŋ nore dâŋ iŋuc. 33 Eme dameŋ mukicne i maickeme Israe kikefuŋ jaŋehec ʒâʒâfic epemu ine kecʒiŋuc: No sâcmutâc dâŋnane maŋjeŋicko râepe huocmu, erâ buhândâŋ‐jeŋicko qâreŋkepe foocmu, eme no Anutu‐jeŋic jupemu, â jaŋe kikefuŋfâc‐nane juniŋmu. Wofuŋ nore dâŋ iŋuc. 34 Eme ŋic moczi moc âgofâcne me qomâfâcne jaŋehec ʒiŋuc muhuc qaqazu gie mocwâc mi baniŋmu: ‘Wofuŋte fuŋne mananiŋ!’ Mâcne, jaŋe wahakicnezi mecne fekicnezi mecne mâmâc manacnu‐fâreniŋmu. Fuŋne ʒiŋucte manacnuniŋmu: No kiŋjeŋic behe‐jarepemu, ehuc sindaŋ‐jeŋicte mocwâc mi manasupemu. Wofuŋ nore dâŋ iŋuc.”
35 Ʒoaŋzi ʒoaŋ sâc tamaeocte muekac,
â mosa bâpiŋ ŋafe sâc tamaeniŋte mutâcne‐jareekac,
â hâweczi qiriŋ qame siri‐ticne fânâŋkeocte muekac
ʒâŋe‐ticne Anutu Tâpiri Ɋuŋɋasaŋ Wofuŋ
eki hâcne ʒiŋuc mukac:
36 “Mumutâc sanaŋ i hâcne nore maio moc arictac eocmuo
ine Israere ɋâricfâc jaŋe nore maio ŋicguru moc buc erâ juju
i iŋuc jaha arictac jâmbâŋ eocmu.
Wofuŋ nore dâŋ iŋuc.”
37 Wofuŋzi ʒiŋuc mukac:
“Faic sambâŋte sâc bapane fome muzac
me mâreŋte hobeteŋne duŋ ira fokac
i mana gufuc eene ezac ine no Israe ɋâricfâcne
jaŋe wiac ewefuhuc jumbiŋ irec erâ wâc behec‐jopa‐fârezapo.
Wofuŋ nore dâŋ iŋuc.”
38 Wofuŋzi ʒiŋuc mukac: “Manaŋgopieŋ, dameŋ moc maickeocmu ira Wofuŋ nore hae sâko i Hananele ere fic hâŋ bafekicne irecnec fuŋkerâ heɋâre ware raku Tuturuŋ Motâc sâko domakac ira bataraniŋmu. 39-40 Ehame sâc meda ine ʒuhuckerâ râepie dândâŋne raku Garebe tikio fisizejec, erâ ira ŋehasickerâ Goaopec razejec. Eme ŋic qâŋɋâŋ â ʒafe wâneŋ â hae mâreŋ foraku Kidoroŋ opâo mickekac erâ ʒoaŋ wewefunaopec Becâsic Motâc irec tuturuŋko tarakac i sasawa Wofuŋ nore biŋe ehuc tiri fozejec. Eme sisipiric me ima bapa i ira mocwâc mi fua‐jâmbâŋkezejec.”