8
Ŋokac sâqocne moc Jesurao barambiŋ
Jesu e Oliwa tikio fewec. Hae fureme irecnec risierâ taha ufuŋko feme ŋic jaŋe erao mâretec tumaŋnembiŋ. Eme ira ŋehuc miti jaza qazuc ewec. Ehame miti qaqazu â farisaio ŋic jaŋe ŋokac moc boe sau ehuc juhame bâfuakicne e Jesurao bararâ mumbiŋ, “Qaqazu, ŋokac kecši boe sau ehuc juhame bâfuakicne. Eme Mose e ŋokac iŋucne qânâzi hehâmoc-jopazore sâcmutâc dâŋko munârewec. Gahac ine weniŋuc mukic?” I mâc esâickepie dâŋ iŋuc me iŋuc mume dâŋko râeniŋte fecnehuc mumbiŋ. Mupie Jesu e daperâ mâreŋko mezi qâreŋkewec. Qâreŋkehame wiocnerâ wiocne epie qâhâŋnerâ šiŋuc jazawec: “Ŋoŋeraonec moc bahac tâmiric juekaczi fuŋkerâ qânâzi heme henšepieŋ.” Iŋuc murâ mocwâc daperâ mâreŋko qâreŋkewec. Ehame jaŋe dâŋticne manarâ micnezi bânieme moc moc raku rafârembiŋ. Eme ŋokac e Jesure maŋfuŋko buc domame, 10 Jesuzi qâhâŋnerâ wiocnerâ muwec: “Ŋokac, jaŋe wena? Moczi moc okacnere dâŋ mi mugarejec me?” 11 Eme ŋokazi muwec, “Wofuŋ, aricne.” Mume muwec, “Eme noni iŋuc jaha okacnere dâŋ mi mugarepemu. Go mâc ra juhuc sâqocne mocwâc mi bazemec.”]
Jesu e fuŋne-ticne mutaniŋke-jarewec
12 Eme Jesuzi ŋic dâŋ moc šiŋuc šuhuckerâ jazawec: “No mâreŋ sâc ŋic ŋoŋere šoctamac. Eme moc e no bâjâpecnuocmuzi dapâcko mi rahuc juocmu. E jujure tatamac focnehame juocmu.” 13 Iŋuc mume farisaio ŋic jaŋe šiŋuc âzâcnembiŋ: “Ʒi go gahac fuŋnege mutaniŋkekomec, i manapene fârine mi ekac.” 14 Mupie Jesuzi šiŋuc jazawec: “No nahac fuŋne-nane mutaniŋkepe irec fârimâc mi eekac. No wenirec warepo â wena rapemu irec fuŋne manahuc dâŋ muekopac. Ŋoŋe ine irec â irec mâmâc kâuc baeŋgopieŋ. 15 Ŋoŋe fuŋne riritu gie baeŋgopieŋ i sasahac eekac. No ine fuŋne riritu gie mi baekopac. 16 Me fuŋne riritu gie bapemuo ine fârinehec eocmu. No fuŋne riritu gie buc bapane mi fokac. Mamac sorecnuwec eki baficnume bapane fokac. 17 Eme sâcmutâc dâŋŋeŋicko kecšiŋuc fokac: `Ŋic jajaheczi mocte fuŋne ritupire fârine muzo. Ž 18 Eme no fuŋne-nane mutaniŋkehape Mamac sorecnuwec eki iŋuc jaha mutaniŋkeekac.” 19 Dâŋ iŋuc jazame wiocnerâ mumbiŋ, “Mamacge wena?” Eme šiŋuc jazawec: “Ŋoŋe no mi mana taracnuhuc Mamac-nane iŋuc jaha mi mana taraeŋgopieŋ, no mana taracnurâ muzac, Mamac-nane iŋuc jaha mana taranšapiŋ.” 20 Jesu e ufuŋko taha katapa ŋewec maŋne ira miti jaza qazuc ehuc dâŋ i muwec. Eme dameŋ-ticne mi maickewecte wemocko afeckerâ kâpâcwâru banšapiŋ.
Ŋiczi mâreŋkonec, Jesuzi sambâŋkonec
21 Eme Jesu e harierâ šiŋuc jazawec: “No behec-ŋopa rape ŋoŋe basacnurâ sâqocne-ŋeŋichec juku hâmoniŋmu. No ra jupemu ira wemocko fâniŋmu.” 22 Iŋuc mume Judaŋic jaŋe mumbiŋ, `à `No ra jupemu ira wemocko fâniŋmu', iŋuc wemocte mukac? Sahac-ticne qarâ hâmoocte mukac me weniŋuc?” 23 Eme Jesuzi šiŋuc jazawec: “Ŋoŋe juwickonec, no faickonec, ŋoŋe mâreŋkonec, no mâreŋkonec mâcne. 24 No irec hâcne ŋazakopac: ŋoŋe sâqocne-ŋeŋichec juku hâmoniŋmu. No jukopac ši fuŋne-nane ŋazaekopac i mi mana šakieniŋmuo, sâqocne-ŋeŋic foŋarehame hâmoniŋmu hâcne.” 25 Mume wiocnerâ mumbiŋ, “Eme go mo?” Mupie Jesuzi jazawec, “Ŋazaekopac i jâmbâŋ hâcne. 26 No ŋoŋere bahac â kiŋdâŋ bocjaha bajuekopac. Sorecnuwec eki dâŋ fârine muekac, eme noni micticnaonec manapo ijaha šira mâreŋko mufuaekopac.” 27 Mamac-ticnere iŋuc jazame jaŋe mi mana tarambiŋ. 28 Irec Jesuzi šuhuckerâ šiŋuc jazawec: “Ŋoŋe Ŋic Fâri Wâtuŋne bâfeŋnerâ fuŋne-ticne mana taraniŋmu. Erâ no nahacne maŋte wiac mi eekopac, Mamaczi qazu-narewec dâŋ ijaha muekopac, i wâc mana taraniŋmu. 29 Sorecnuwec e nohec juekac. No dameŋ sâc wiac epe bape maname biaŋkeekacte no mi behecnuekac.”
Sâqocne bahuc irec kiŋaŋ qaqa ezo
30 Dâŋ iŋuc mume ŋic bocjahazi manasiŋkembiŋ. 31 Eme e manasiŋkembiŋ Judaŋic jaŋe hâcne šiŋuc jazawec: “Ŋoŋe nore dâŋko juhuc ine motec fuŋfuŋfâc-nane eniŋmu. 32 Eme nore dâŋ fâri qizecne mana tarapie izi batarac-ŋopame niŋgiŋ tâmiric sâcne erâ juniŋmu.” 33 Mume dâŋ šiŋuc bâtikiecnembiŋ: “Nâŋe Abrahamte ɋâricfâc, mozi mo kiŋaŋ qaqafâc-ticne bacnâporâ niŋgiŋ-nâpowecte go šiŋuc mukomec: `Niŋgiŋ tâmiric eniŋmu'?” 34 Eme Jesuzi šiŋuc jazawec: “No jâmbomac jâmbâŋ ŋazakopac, moc e sâqocne baocmuzi sâqocnere kiŋaŋ qaqa eocmu. 35 Kiŋaŋ qaqazi bomboŋ-ticnere fic haeoa hati mi jurâ ju eocmu, ŋokâzi ine mamac-ticnere fic haeo hati jurašihuc juocmu. 36 Irec Ŋokâ eki firuec-ŋopame ŋoŋe jâmbomac niŋgiŋ tâmiric juniŋmu.
Jesure dâŋ qikiŋnerâ Sataŋte ŋic ezo
37 “Ŋoŋe Abrahamte ɋâricfâc, i noni manakopac. Eme ŋoŋe ine dâŋnanezi ŋoŋerao hesowariekacte qâhâmocnuzo muŋgopieŋ. 38 No Mamac-nanerao wiac honehuc jupo irec hâcne muekopac, â ŋoŋe ine ŋaŋacne mamactaonec wiac manambiŋ i eeŋgopieŋ.” 39 Mume šiŋuc âzâcnembiŋ: “Nâŋe mamac-nâŋec Abraham.” Eme Jesuzi šiŋuc jazawec: “Ŋoŋe Abrahamte ɋâricfâc jurâ muzac e hawari enšapiŋ. 40 Anuturao dâŋ fâri qizecne manapo i ŋazaekopac, ehame ŋoŋe nuzo muŋgopieŋ. Wiac iŋucne Abrahamzi mi ewec. 41 Ŋoŋe ine ŋaŋacne maŋte hata âteeŋgopieŋ.” Eme jaŋe mumbiŋ, “Nâŋe fiuckonec mi fuambeŋ, Anutu e Mamac-nâŋec mocjaha.” 42 Mupie Jesuzi šiŋuc jazawec: “Mamac-ŋeŋic Anutu eme muzac, no âgo enarenšapiŋ. No Anuturaonec hâcne wahapo, no nahacne. maŋte mi wahapo, eki sorecnume wahapo. 43 Weniŋuc erâ jupie dâŋnanezi maŋŋeŋicko mi huekac? No dâŋ mupe ŋoŋe hazec afec mi manaeŋgopieŋ irec hâcne. 44 Ŋoŋe mamac-ŋeŋic Sataŋ, eme ere qafeŋko wiac eeŋgopieŋ. E mârâc jaha ŋic sisipiric juweczi juwareekac. E dâŋ fâri qizecne râpeckewecte maŋticnao jâmbomac dâŋ moc mi fokac. E bureczi nânâ opâ-ticne ewec. E burecŋic â burecte mamac. 45 No ine dâŋ fâri qizecne ŋazaekopacte dâŋnane qikiŋneeŋgopieŋ. 46 Ŋoŋeraonec moczi sâcne nore bahac moc muocmu? Eme no sâc iŋucnezi dâŋ fâri qizecne ŋazape wemocte mi mana šakieeŋgopieŋ? 47 Moc e Anuture biŋe juocmuzi dâŋticne manaocmu. Ŋoŋe Anuture biŋe mi jueŋgopieŋte dâŋticne qikiŋneeŋgopieŋ.”
Jesure dâŋ bajuhuc hâmoc sanaŋ mi maickezo
48 Mume Judaŋic jaŋe dâŋ šiŋuc bâtikiecnembiŋ: “Wiac wemo mueŋgopeneŋ, go Samaria ŋic, go demoŋzi egareekac.” 49 Eme Jesuzi šiŋuc jazawec: “No demoŋzi mi enareekac, no Mamac-nane sâseekopac, ŋoŋe ine no ba jawa enareeŋgopieŋ. 50 No šâŋe biŋe-nanere manabâc erâ mi ŋazakopac. šâŋe biŋe-nane hewirickerâ irec dâŋne mumu ine mocte gie. 51 No jâmbomac jâmbâŋ ŋazape mananiŋ: Moc e nore dâŋ bajuocmuzi hâmoc moc mi maicke-jâmbâŋkeocmu.” 52 Iŋuc mume Judaŋic jaŋe kecšiŋuc mumbiŋ: “Demoŋzi egareekac, i jâmbomac. Abraham hâmowec, â porofete jaŋe iŋuc jaha hâmombiŋ, ehame go šiŋuc mukic: `Moc e nore dâŋ bajuocmuzi hâmoc moc mi maickeocmu. Ž 53 Mamac-nâŋec Abraham e sâkozi hâmowec, eme go ere sâc jâuruzo mukomec? Á porofete jaŋe iŋuc jaha wâc hâmombiŋ. Go wemocte sahacge boc bafekomec?” 54 Mupie Jesuzi šiŋuc jazawec: “No nahac sahac-nane bafepe mi sâckeocmu. Mamac-nane jukac, e Anutu-nâŋec mucneeŋgopieŋ, eki ine muafecnuekac. 55 Ŋoŋe e mi mana taraeŋgopieŋ, no ine mana taraekopac. Irec no weniŋuc mi mana tarakopac mupemu. I mupe burec eme ŋoŋere sâc ezapo. Aricne, no mana tarahuc dâŋticne bajuekopac. 56 Mamac-ŋeŋic Abraham e nore šâfo maickeme honeocte aŋac sâko bajuwec. Erâ juku maickeme honerâ šeri ewec.” 57 Iŋuc mume Judaŋic jaŋe mumbiŋ, “Go jarage 50 mi bazumeŋzi Abraham honemeŋ me?” 58 Mupie Jesuzi jazawec: “No jâmbomac jâmbâŋ ŋazape: No Abraham mi fuarâ juhame jupozi jukopac.” 59 Iŋuc mume qânâ rorâ hezo epie e fosiroŋnerâ taha ufuŋkonec wahawec.