5
Elifaʒizi Hiobe ʒuhuckerâ dâŋ mucnewec
1 “Ajoc, Hiobe, go wira owa ec!
Eme moczi moc okacne bâtikie‐gareocmu
me mâcne i honezemec.
Go aŋelo e me e wira wâwâsic sâcne ecnecmu me?
2 Ŋic mutucne e kimbeŋ aaric‐ticnezi sipirickeekac,
â mamana tara‐ticne tâmiric
e maŋʒoc‐ticnezi qâhâmoekac.
3 No ŋic mutucne moc e eebapa‐ticnezi gâtâne bame
honehape izia fic hae‐ticne ʒaŋkerâ
sesuctac fuarâ fowec.
4 Naru motecfâcne jaŋe juju hâmo basaeŋgopieŋ,
ehame dâŋgieo moczi moc dâŋjeŋic mi dopeckeekac.
5 Gie‐ticnao nânâ fârine fuame
nânâre hâmoeŋgopieŋ ŋic i
jaŋe fisirâ ro nâc eniŋmu,
ehuc fâpâ ʒârâ âke ropierâ roniŋmu wâc.
6 Manakic, wiac hehesicnezi giegaŋko mi fuaekac,
â sisipiriczi mâreŋ maŋkonec wâc mi wefuekac,
erâ mafare andac eeŋgopieŋ ŋic i jaŋe
moneŋ mafa wiac‐ticne roniŋte ʒoɋac eniŋmu.
7 Ʒoc uucnezi iiŋnerâ sawao feekac
iŋuc jaha ŋiczi sisipiric bâfuaocte maŋne domaekac.
8 “Manakic, no go muzac ine
Anuturao rarâ fuŋne‐nane mufuacnezapo.
9 Eki hâcne wiac qeŋ bipinehec baekac
i ŋiczi mi mana taraeŋgopeneŋ,
e mâsi sâko wowosene tâmiric bahuc juekac hâcne.
10 Eki mume mâreŋko hoe heekac,
erâ ekizia wâc mume
opâzi giegaŋ‐nâŋec bâgunuckeekac.
11 Eki waha qaqane jueŋgopieŋ jaŋe bafaharec‐jopaekac,
erâ busâqochec jueŋgopieŋ jaŋe bubiaŋ qajareekac.
12 Eeatuc ŋic jaŋere dâŋ hetâtieme
gie bapie fârimâc eekac.
13 E maŋfânâŋhec jaŋere eeatuc dâŋ
bârisieme bitiŋ erâ kicjopaekac,
ehame mamana biri‐jeŋic biac omaekac.
14 Jaŋe ʒoaŋ ɋaɋacko sifu dapâcko tinac jueŋgopieŋ,
â guŋpiticko sifu ŋafeo tinac basac qasac raeŋgopieŋ.
15 Anutu eki ine bekâ mâsiŋ jaŋe ŋic sindaŋne
jaŋere ʒikare micko fenʒipiŋte ŋezic‐jopaekac,
â qarâ suriŋne jaŋe tâpirihec jaŋere meonec
batarac‐jopaekac.
16 E iŋuc ehuc ro waha âte ejarekicne
jaŋerao jujure mamanac bâfuaekac,
â ŋic sindaŋne jaŋere mic bâbâzickeekac.
17 “Anutu e ŋic moctao bâbâtiŋ gie bame
ŋic ere manape ʒerine eocmu,
irec go qa bâtiŋ egareme manatec mi sâqorezejec.
18 Anutu e ʒâpâ nâpoekaczi mocwâc ʒure foŋ enâreekac wâc,
â meticnezi bâʒâic‐nâporâ mocwâc bâmâteŋ‐nâpoekac.
19 E dameŋ sâc sisipirickonec bataracguocmu.
20 Roroc fuame hâmozicte hone maiŋ egarehuc
ʒika dameŋko dede sâsâoc egareocmu wâc.
21 Anutu e kisâfâcge jaŋere ʒikadâŋte sabecguocmu,
erâ sisipiricte ŋezicgume mi hâwicguocmu.
22 Bâbâʒâic me roroc fua‐gareme manatec mi quŋkezejec,
â qowi mimicne jaŋere wâc mi hâwicguzejec.
23 Mâreŋ qânâ tâmiricko gie he sarac ecmu,
ehame qowi mimicne jaŋe âgo egareniŋmu.
24 Iŋuc fuame ficbozegao juhâc qâhâmocmu,
ehuc lamafâcge furu jaha juhapie hone soŋaŋ ejarecmu.
25 Ɋâricfâcge jaŋe bocjaha fua raniŋmu,
â apa ŋosafâcge jaŋe sopâc kecɋaŋ iŋucne sawe mâririackeniŋmu.
26 Padizi dameŋ ʒora gieo domaku woze qeuc eme qa roro eeŋgopieŋ,
eme go irec sâc jaha dameŋ ʒora juhâc qâhâmohuc ŋicqizec jâmbâŋ erâ hâmozemec.
27 Manakic, wiac fua‐nâreme hone manac eeŋgopeneŋ
irec fuŋne mana taranaŋte dameŋ ʒora mamana gie bawefuhuc jumbeŋ.
Irec dâŋ muwarepac i fârine jâmbâŋ,
go mana maŋ ehuc mana biaŋkezemec.”