13
Hiobezi bahacmâc juju‐ticne mutaniŋkekac
1 “Manaŋgopieŋ, ŋoŋe wiac sasawa muŋgopieŋ
i ʒâŋe fâri‐nanezi hone‐fârepo,
â hazec‐nanezi mana‐fârerâ mana tarapo.
2 Ŋoŋe mamana foŋarekac
sâc ijaha wâc no fonarekac,
no ŋoŋere wahamicne mi jukopac.
3 No ŋoŋe dâŋ ŋazapemurâ mâcne,
bapafâre rune dâŋ âzâcnepemurâ manasukopac,
no Anutuhec dâŋgie bapemurâ enarekac hâcne.
4 Ŋoŋe maŋmutuc‐ŋeŋicte fuŋne taniŋkezacte
burecdâŋzi foŋkeeŋgopieŋ,
ŋoŋe dota mutucne jaŋe ŋic bâpiaŋ‐jopaniŋte
eipieeŋgopieŋ jaŋere sâc.
5 Jâi, ŋoŋe niniŋkerâ jupie muzac
mana‐ŋarepe maŋɋârâŋhec juŋgopieŋ ezac.
6 Ŋicbureŋ, ŋoŋe hazec râehapie
fuŋne‐nane mutaniŋke‐ŋarepe,
ehuc dâŋ okacne bâtikie‐ŋarepe mana‐hâmoniŋ.
7 Ŋoŋe burecdâŋ muŋgopieŋ
i Anuture erâ muŋgopieŋ me?
Me ere dâŋ basanaŋkeniŋte sioc eŋgopieŋ me?
8 Ŋoŋe dâŋgieo e bafickehuc
dâŋticne dopeckeniŋte muŋgopieŋ me?
9 Anutuzi fuŋne‐ŋeŋic bataniŋkehuc
mana‐ŋareme biaŋkeocmu me?
Me ŋic eatuc‐jopaeŋgopeneŋ
irec sâc ŋoŋe Anutu sâcne eatuckeniŋmu?
10 Nâŋe Anuture dâŋ dopeckeŋgopeneŋ,
ŋoŋe burec iŋuc ehuc qoricnuniŋmuo
ine eki fuŋne‐ŋeŋic bataniŋke‐jâmbâŋkeocmu.
11 Iŋuc eŋareme tâpiri‐ticnere bipic tatara eŋareocmu,
ehuc ere hâwic‐ŋopaocmu.
12 Ŋoŋe dâŋ muŋgopieŋ i racne sasawa,
erâ dâŋ okacne bâtikie‐nareŋgopieŋ
i fâri tâmiric jaha.
13 “Ŋoŋe niniŋkehuc mana‐narehapie dâŋnane muzepac,
eme irec okacne wiac i me i
fua‐narezo murâ fua‐narezejec.
14 No upe‐nane wiwiticko sicnehuc
juju‐nane qikiŋ nezo ʒawiekopac.
15 No juju biaŋnere woworic‐nane fârimâc ekac,
irec Anutuzi qâhâmocnuzo murâ qâhâmocnuzejec,
erâ no sifu ere maio fuŋne‐nane mutaniŋkezepac.
16 Ŋic sindaŋne jaŋe ere maio fuaniŋte hâwic‐jopaekac,
no ine hâbihec erâ fuŋne‐nane mutaniŋkecnepe akicnuocmu mecne.
17 Ŋoŋe hazec râehapie fuŋne‐nane muɋaɋacke‐ŋarepe
aimuŋ jaha mana‐hâmonʒepieŋ.
18 Manaŋgopieŋ, no Anuturao fuŋne‐nane mutaniŋkehuc ʒiŋuc manapaŋkepemu:
Anutu e dâŋnane dopeckeocmu.
19 O Anutu, go dâŋgieo râecnuzo mukomec me?
Go iŋuc etec no niniŋkerâ omaezore afeckepemu.
20 Mocjaha, go wiac jajahec jahere numu‐garepe
mana‐naretec gore hâwicnume mi soŋkepemu.
21 Go mocwâc mi bâʒâicnuc,
erâ wiac hâhâwicne fai‐naneo râetec ferâ
mocwâc mi sipiricnuzejec.
22 O Anutu, go fuŋkerâ dâŋ mutec
okacne bâtikie‐garepemu,
me manatec mi sâckeme ine noni fuŋkerâ mupe
goki okacne bâtikie‐narezemec.
23 Kiŋ bahac‐nane wezimuc fokac,
erâ wemo hehesicne moc bâfuapo i nazatec manape.
24 Go wemocte honecnutec râsige tinac ehape
ʒâŋe maige bâsoŋke‐narekomec?
25 No mâŋâŋzi rehac ficne sueme raekac
irec sâc juhape hâhâwic henarezo ekic me?
Erâ sopâc hahaŋkekicne irec sâc ehape
ficne suecnuzo mukomec me?
26 Go bâbâtiŋ hâhâwicne fai‐naneo râetec fekac,
ehuc ɋie‐naneo wiac ebac epo
irec okacne wâc mâmâc bazu‐narekomec.
27 Go kike‐nane jâc fifitacko râekomec,
ehuc hata rahape ruc banarehuc
kike hata‐nane hetâcnekomec.
28 Go iŋuc enaretec no jâczi semune ehuc
gârecke ʒaŋ eekac irec sâc jaha ekopac,
â wâfu qoʒazaŋzi ŋaqi qoruc nanʒaŋnepie ʒaŋkeekac,
irec sâc jaha ʒaŋkekopac.