1 Nuŋte ŋokâ Josua e kamierâ ruc bapa ŋic jahec‐ticne mâreŋ hone tâcnenicte Sitim haeonec jasa sorec ehuc muwec: “Rarâ mâreŋ hone tâcnenic. Erâ Jeriko hae i hone‐hâmozepirec.” Eme jahe rapic. Raku Jeriko haeo fisirâ sasec ŋokac moc juwec, ʒâŋene Rahaba, ere ficko ferâ fopic. 2 Ehame Jeriko haere ŋicwofuŋ ʒiŋuc âzâcnembiŋ: “Manakic, Israe ŋic gâcne mâreŋ hone tâcneniŋte ŋafeo ʒira warembiŋ.” 3 Eme Jeriko haere ŋicwofuŋzi Rahabarao dâŋ ʒiŋuc râeme rawec: “Ŋic jajahec warerâ ficgao fepirec ŋekopirec jahec râec‐jofatec warenic. Jahe mâreŋ‐nâŋec hone tâcne‐fârenicte warepirec.” 4 Ŋokac e ine ŋic jahec soŋjofawec. Ehuc muwec: “Ŋic jajahec norao warepirec i jâmbomac. Mâc jahe wenirec warepirec i mi manakopac. 5 Dapâc eme motâc hezo ehapie ŋic jahe hurâ rapirec. Erâ weniŋucpec rapirec ine mi manakopac. Bâruŋ jaha jâpec‐jofa raniŋ. Ŋoŋe sâcne bâfuac‐jofaniŋmu.” 6 E jahac ine jowac‐jafarâ fe ficbupuo bunda râe guruc ewec ira biac soŋjofawec. 7 Ehame ŋic jaŋe roc‐jofaniŋte basac‐jofa raku Jordaŋ opâ rendacnao fisimbiŋ. Basac‐jofaniŋte hurâ rahapie haesac motâc hembiŋ.

8 Eme ŋic jahe ine waha fozo ehapire ŋokac e jaherao ficbupuo fewec. 9 Ferâ ŋic jahec jasarâ muwec: “Wofuŋzi mâreŋ ʒi ŋoŋe ŋarewec i no mana‐jâmbâŋkekopac. Eme ŋoŋere hâhâwiczi boc fusucmac‐nâpowec. Ehuc mâreŋ ʒirec ŋecjucfâc‐ticne sasawa nâŋe ŋoŋere maio weaŋkeŋgopeneŋ. 10 Ŋoŋe Aigita mâreŋkonec wefuhapie Wofuŋzi ʒâŋe fai‐ŋeŋicko Hâwec Bâbâroŋ mume kereŋkewec â Amori ŋic jaŋere ŋicwofuŋ jajahec, Sihoŋ â Ogo erâ gurufâc‐jekic Jordaŋ ocniŋucnao jopa miziembiŋ, i mana‐fârembeŋ. 11 Nâŋe i manahuc maŋnâŋec betaŋkeme hâbi‐nâŋec ŋeŋgoroŋkewec. Ŋoŋere Wofuŋ Anutu eki sawa faic sambâŋko â mâreŋko ʒira Anutu mocjaha juekac. 12 Eme ŋohe ʒi Wofuŋte maio mupaŋke‐narenic. Noni bubiaŋ qaŋactekopac iŋuc jaha ŋoŋe mamac‐nanere fic ʒi bubiaŋ qacneniŋmu irec ma jâmbâŋ moc mufua‐narenic. 13 Ehuc neŋgoc mamac, hahac ɋa, seŋ qo â wiacfâc‐nane sasawa akic‐nâpohuc juju‐nâŋec hâmockonec bataranʒepieŋ.” 14 Eme ŋic jahe ŋokac âzâcnerâ mupic: “Sâcne, ŋopaniŋmuo nâhere juju wâc omaezejec. Go nâhe mi mufuac‐nâfocmuo Wofuŋzi mâreŋ nâreocmu dameŋ ira sioc tâmiric bubiaŋ qaŋarenaŋmu.”

15 Eme ŋokac e ficticne haesachec iticnehuc bakicnere ira ŋeŋe juju ewec. Irec ŋic jahe qâqâtâc kataŋko repao râec‐jofame sac râpeo hupic. 16 Ehuc jasarâ muwec: “Basac‐ŋofaŋgopieŋ ŋic i jaŋe bâfuac‐ŋofanʒipiŋte tiki mâreŋko razepirec. Eme ira ʒoaŋ gie bapa jahec â moc soŋkerâ juhapire basac‐ŋofaŋgopieŋ jaŋe risie‐fârepie ine ŋohe hata‐ŋekic ʒuhuckerâ razepirec.” 17 Eme ŋic jahe ŋokac âzâcnerâ mupic: “Go enâctetec dâŋ ʒi mupaŋkekoperec ine wiac ʒiŋucte bahac fâsâc enacmu: 18 Nâŋe mâreŋ ʒira ware fisinaŋmu dameŋ ira go repa bâbâroŋ ʒi râec‐nâfotec wahakoperec i qâqâtâc kataŋ ʒira ʒâfickezemec. Ehuc neŋgoc mamac jahecge, hahac ɋafâcge â mamacgere wiacfâc jaŋe sasawa ficgao qâzuc‐jopa‐fârezemec. 19 Eme moc e gore fickonec waharâ hae ʒoŋao juocmuo ine socticnere kiŋ i e jahacne faio fehame nâhe bahac fâsâc enacmu. Â ficko juhapie moczi moc jopaocmuo irec socte kiŋ i nâhere faio fezejec. 20 Go nâhere gie ʒi mufuacmuo ine dâŋ ʒi mupaŋkekoperec i wahame bahac fâsâc enacmu.” 21 Eme ŋokaczi jasarâ muwec: “Dâŋ mukopirec irec sâcko fuazejec.” Iŋuc murâ sorec‐jofame rapic. Ehame qâqâtâc kataŋko repa bâbâroŋ i ʒâfickeme domawec.

22 Eme jahe rarâ basac‐jofambiŋ ŋic i jaŋe risieniŋte tiki mâreŋko ʒoaŋ gie bapa jahec â moc woŋec jupic. Ehame basac‐jofambiŋ jaŋe hatao babasa gie sâko baku mâc risiembiŋ. 23 Ŋic jahe ine tiki mâreŋkonec mocwâc waharâ Jordaŋ opâ fotâcnerâ Nuŋte ŋokâ Josuarao fisirâ wiac fua‐jactewec irec binaŋ bacne‐fârepic. 24 Ehuc Josua âzâcnerâ mupic: “Wofuŋ e jâmbomac mâreŋ sasawa i nâŋâcne meo râe‐fârewec. Erâ i sawa mâcne, mâreŋ irec ŋecjucfâc jaŋe ʒeŋgoma nâŋâcne hâwic‐jopame maŋjeŋic gâcke‐fârekac.”