1 Josefere ɋâricfâc jaŋe mâreŋ rukec qajarepie majeŋic ʒiŋuc fuawec: Ma i Jeriko heririŋ Jordaŋ ombâŋnaonec fuŋkerâ raku Jeriko haere opâ ʒoaŋ wewefu‐ticnao fotâcnerâ mâreŋ burocnao rawec. Erâ Jeriko haeonec ferâ tiki mâreŋko Bete hae ŋewec ira fisiwec. 2 Eme Bete haeonec raku Lusi haeo fisirâ Areki ŋic jaŋere mao Ataroti haeo fisiwec. 3 Erâ ʒuhuckerâ ʒoaŋ huhunao hurâ raku Jafeleti ŋic jaŋere mâreŋko fisirâ fotâcnerâ Bete‐Horoŋ haeo fisiwec. Erâ irecnec ine Geʒera hae fotâcnerâ raku hâwecko mickewec.

4 Josefere ɋâricfâc Manase â Eferaim guru jaŋe mâreŋ ro rauc embiŋ ine hâcne.

5 Eferaim guru garikiŋ‐jeŋic sâc jaŋere mâreŋ ine ʒiŋuc: Mâreŋ majeŋic ʒoaŋ wewefunaopec ine Ataroti‐Adari haeonec feraku Bete‐Horoŋ hae faicne ira fisiwec. 6 Erâ raku hâwecko huwec. Faicpec ine Mikimeta haezi ma ewec. Eme mazi ʒoaŋ wewefunao râreckerâ Tana‐Silo haeopec fotâcnerâ rawec. Ehuc ʒoaŋ wewefunao fotâcnerâ Janoa haeo fisiwec. 7 Erâ irecnec huraku Ataroti â Nara haeo fisirâ Jeriko haeo iticnewec. Ehuc Jordaŋko mickewec. 8 Erâ mazi Tapua haeonec ʒoaŋ huhunaopec raku Kana opâo fisi fotâcnerâ raku hâwecko mickewec. Eferaim guru jaŋe garikiŋ‐jeŋic sâc mâreŋ i hâcne ro rauc embiŋ. 9 Ehame Eferaimte guru jaŋere hae pitic â hae sâko gâcne i Manasere guruo ŋeraocte mutara‐jarembin. 10 Eferaimte guru jaŋe Kanaaŋ ŋic Geʒera haeo jumbiŋ i jopa jâpec mi ejarembiŋ. Irec Kanaaŋ ŋic jaŋe Eferaimte guruo jumbiŋzi dameŋ ʒiŋuczia juŋgopieŋ jaha. Erâ ine kiŋaŋ qaqa bacjopambiŋte jaŋere mic sâcko jueŋgopieŋ.