2
Zioŋ ʒârâ hâriŋ‐ticne i Wofuŋzi mume fuacnewec
1 Jei, Wofuŋ e aaric manahuc Zioŋte otâ dapâc maŋnao râewec i!
E Israe ʒai ʒonʒoŋ‐ticne boc ferâ fowec i qame wahawec,
e aaric dameŋ‐ticnao ââtesiŋ‐ticnere moc mi manasuwec.
2 Wofuŋ e Jakobore ŋeŋe hae irec busâqoc moc mi manahuc furu jaha ima bawec.
E aaric manahuc Juda otâ‐ticnere ficsanaŋ
heroc qâropiewec;
e uumaŋ‐jeŋic ima bahuc
guriŋ bapafâcne hetapaic‐jopame
rufeo waha qapie ʒâŋe biŋe‐jeŋic omaewec.
3 E aaric sâko manahuc Israe tâpiri‐ticne bawahawec,
ehuc râsi fisipie ŋicfâcne mi bafic‐jopaocte
mefâre‐ticne sakarewec;
ʒoc ruqepene ʒahuc ŋeratierâ
wiac rârec rârec ʒâseŋke‐fâreekac,
ʒoc iŋucne Jakobore kikefuŋko râeme ʒawec.
4 E râsi iŋucne tepe‐ticne âpârehuc
mefâre‐ticnezi sisipiric gie baocte domawec;
e Zioŋte otâ ere qoruc bozeo wiac hawari biaŋ fowec i imacke‐fârewec,
ehuc aaric‐ticne ʒocbâruŋ iŋucne hoŋkecnewec.
5 Wofuŋ e râsi iŋucne erâ Israe bâsirowewec;
e erific‐ticne ima bafârewec
â ficsanaŋ‐ticne heroc qâropie‐fârewec;
ehuc mume Juda otâ‐ticnere faio
ki busâqoc â ʒârâ hâriŋ bocjaha fewec.
6 E boze‐ticne i gie iŋucne sipirickehuc
tutumaŋ hae‐ticne imackewec;
Wofuŋzi gie‐ticne bahame
Zioŋko hombaŋ â sabata irec ninikec fuawec,
ehame kimbeŋ aaricko ŋicwofuŋ â taha bapa behec‐jopawec.
7 Wofuŋ e alata‐ticne qaisockehuc behewec
â tirific‐ticne hone suŋgiŋ ecnewec,
ehuc Zioŋ erific‐ticnere qânâsac i râsi jaŋere meo râewec.
Eme Israe jaŋe hombaŋko Wofuŋte tiri ufuŋko fânâŋke jumbieŋ
irec sâc râsi jaŋe ojowa sâko embiŋ.
8 Wofuŋ e Zioŋ otâ‐ticnere qânâsac ima baocte mupaŋkewec;
e mucsâc fârehuc ma bawec,
ehuc meticnezi sisipiric gie baocte manacnewec,
e ʒae â qânâsac jahe makuc banicte mujactewec;
eme ʒi busâqocnehec foekopirec.
9 Motâc sâko‐ticnezi mâreŋmaŋko huwec,
e aeŋ babasanaŋ‐ticne sipirickerâ qazuwec;
ŋicwofuŋ â fekicnefâc‐ticne
jaŋe ŋicne ŋicne jaŋere ŋondeŋko bâtâtiec‐jopakicne;
sâcmutâc dâŋte sâcko wiac ebac ee i omaewec,
â porofetefâc‐ticne jaŋe Wofuŋtaonec dâŋ fuame
hone manac ee i wâc arictac ewec.
10 Zioŋ otâ‐ticnere kâcɋenefâc jaŋe mâc fâsâerâ mâreŋko ŋeeŋgopieŋ;
jaŋe ʒafe ruahuc mateŋ qonaŋkeeŋgopieŋ;
Jerusalemte ŋokac ʒeŋoŋ jaŋe qizec‐jeŋic
mâreŋko hetutuckerâ ŋeeŋgopieŋ.
11 No kiohuc jukuhape ʒâŋe‐nane ʒâicnukac
â hobu‐nane fâuckezo ekac.
Ŋicfâc‐nane jaŋere otâ ere ʒârâ hâriŋte erâ
bu heheric enarekac,
i ɋie â hata jujune jaŋe hae ʒoŋao hâmo betaŋ eeŋgopieŋ irec.
12 Jaŋe ʒiŋuc muhuc neŋgocfâc‐jeŋic wâsic‐jopaeŋgopieŋ:
“Nânâ opâ weni?”
Jaŋe iŋuc muhuc ŋic ʒâpâ jopakicne
irec sâc hae ʒoŋao betaŋkeeŋgopieŋ,
eme neŋgocfâc‐jeŋic jaŋe amec‐jopa rahapie
hâmoeŋgopieŋ hâcne.
13 O Jerusalemte otâ, no weniŋuc erâ dopecguhuc
gore dâŋ mupemu me mohec sâc hecgupemu?
O ŋokac ʒeŋoŋ, Zioŋte otâ,
go mohec sâc hecguhuc bâmiriŋgupemu?
Manakic, ʒârâ ʒâpâge i hâwec sâko iŋucne,
irec mo ŋiczi sâcne bâpiaŋguocmu?
14 Porofetefâcge jaŋe findaŋdâŋ burecne
â racne hone manac erâ mufua‐garembiŋ,
ehuc kiŋtofage hesoŋkehuc wiac hâhâwicne
aka mi hecnembiŋ;
aricne, jaŋe qaŋgecdâŋ burecne
â eeatuc dâŋ hone manac erâ
mufua‐garembiŋ hâcne.
15 Hatao gowaruhuc honecgueŋgopieŋ sâc
me pocpoc qagareeŋgopieŋ;
jaŋe Jerusalem otâ‐ticne go mu âke sisic egarehuc
qizec fofotaric eeŋgopieŋ, ehuc mueŋgopieŋ,
“Hae kereŋ biaŋ â mâreŋ sâko mâreŋ
irec bubiaŋ bâbâfua mugareeŋgopieŋ,
hae go hâcne me?”
16 Râsifâcge sasawa jaŋe mâretec sopecgueŋgopieŋ,
ehuc mu âke sisic erâ mic kiki aric kihuc
ʒiŋuc mueŋgopieŋ: “Nâŋe e ima bambeŋ!
Ia, nâŋe dameŋ i fuaocte enâre jujec,
eme ʒi maic‐nâpome honeŋgopeneŋ hâcne!”
17 Wofuŋ e maname fowec i hâcne fârine bâfuawec,
e mârâc sasac jaha uŋsawaŋ dâŋ mufuawec i mume deŋkewec;
ehame busâqoc moc mi manahuc ima gie bawec;
e râsifâcge bafic‐jopame gore bubiaŋ manambiŋ
erâ kisâfâcge jaŋere tâpiri bafewec.
18 O Zioŋte otâ, go hahaŋne bahuc Wofuŋ wâsickec!
Ehuc ŋafeo mecne ʒoaŋko mecne kiotecne
ʒâŋeucge bocjaha wahahuc domazejec!
Go kigie bakutec ʒâŋe hândâŋge bâruŋkezejec.
19 Go ŋafeo faharerâ ruc bapa dameŋ maickeocmu sâc
wira wâwâsic ezemec,
ehuc Wofuŋte maio maŋgere fuŋne opâ iŋucne hoŋkezemec.
Naru motecfâcge hae ʒoŋa tuturuŋne tuturuŋne
ira nânâre hâmo sipiric eeŋgopieŋ
jaŋere erâ mege erao sicnezemec.
20 O Wofuŋ, go ʒâŋe firâ honec!
Go mo ŋic mo wiac iŋucne ecnemeŋ?
Me ŋokac jaŋe ɋiefâc‐jeŋic rocjoparâ
hone maiŋ ejareeŋgopieŋ,
jaŋe nâcjopaniŋte mukic me?
Me taha bapa â porofete jaŋe Wofuŋte furuficko
qâhâmoc‐jopaniŋte mukic me?
21 Hae ʒoŋao ŋic socɋâri â ŋicqizec jaŋe rufeo foraŋgopieŋ;
naru ʒeŋoŋ â ŋicmotecfâc‐nane jaŋe ʒikare nânâ embiŋ;
go kimbeŋ dameŋgao qâhâmoc‐jopameŋ,
busâqoc moc mi mana‐jarehuc qa hefâuc ejaremeŋ hâcne.
22 Go rârec rârec râsifâc‐nane jaŋe hombaŋ mocte erâ
fifisine tinac hefârec‐jopameŋ;
eme Wofuŋ gore kimbeŋ dameŋ ira moczi moc wiserâ mi juwec.
Me faio bacjopa jupo â hone maiŋ ejarehape sokambiŋ
jaŋe hâcne râsizi qâmiziec‐jopawec.