1 “Kiŋ tatara taha bâzi i tirine jâmbâŋ, irec sâcmutâc ine kecʒiŋuc: 2 Qowi bâzi qâhâmoeŋgopieŋ hae ijaha kiŋ tatara taha bâzi irec qowi qâhâmonʒepieŋ wâc, ehuc socticne taha bâzire alata râreckehuc tienʒepieŋ. 3 Wokemaŋ‐ticne sasawa, gecticne wokemaŋnehec â qârurune honao bohotakac i mâmâc tahare biŋe qafârenʒepieŋ. 4 Ehuc râpe hândâŋ jajahecko wokemaŋzi bohotarâ fokac erâ bugâpâcnao qârurune fokac i râpe hândâŋhec mâmâc bârâriezo. 5 Taha bapa eki hâcne wiac i Wofuŋte biŋe qahuc alata faio rikezejec; wiac i kiŋ tatarare taha hâcne. 6 Taha bapa ŋic jaŋe irecnec wiac gâcne nâzo murâ sâcne nâniŋmu, wiac i tirine jâmbâŋ ekacte nâzo murâ tirific maŋko nânʒepieŋ. 7 Kiŋ tatara i sâqocne tâtâmire tahare sâc jaha, irec jahe sâcmutâc‐jekic mocjaha. Wiac i taha bapa kiŋ tatara taha râehuc kiwiric roocmu ere biŋe ezejec. 8 Me taha bapa moc e ŋic i me i ere qowi bâzi rikeocmu e qowi bâzi rikewec irec sahacne rozejec. 9 Me taha bâzi ofeŋmaŋko me ʒocrâqâcko me ofeŋ fainao rikekicne i taha bapazi taha râeocmu ere biŋe ezejec. 10 Â taha bâzi wokemaŋhec bâsifuckekicne me kereŋne i sasawa Aroŋ ŋokâfâcne jaŋere biŋe eme sâckoa bâtâc banʒepieŋ.

11 “Wama bâzi gâcne gâcne Wofuŋte biŋe qahuc rikeniŋmu irec sâcmutâc i kecʒiŋuc: 12 Ŋic moc e wama bâzi daŋge tahare biŋe râezo murâ ine nânâ poroŋ goreŋ tâmiric wokemaŋhec bâsifuckekicne â poroŋ wokemaŋ ruacnekicne erâ poroŋ uucne wokemaŋhec bâsifucke‐hâmokicne i mâmâc râezejec. 13 Wama bâzi‐ticne daŋge tahare biŋe râehuc nânâ poroŋ goreŋnehec mâmâc râezejec. 14 Erâ e taha râeocmu sâc poroŋ irec dâkâne moc rorâ Wofuŋte biŋe qazejec; izi ʒâhec ine taha bapazi wama bâzire soc tieekac ere biŋe ezejec. 15 Daŋge tahare biŋe wama bâzi qowi irec biucne rikeniŋmu ʒoaŋ ijaha nâfârenʒepieŋ, tiwâne moc behepie foha hae mi furezejec. 16 Me ŋic moczi mumupaŋ muwecte erâ taha râeocmu me buafec‐ticnere râeocmuo ine râeocmu ʒoaŋ ijaha nânʒepieŋ, tiwâne foocmuo ine hae fureme nâfârenʒepieŋ. 17 Me qowi tucne tofane moc foocmuo ine ʒoaŋ namba 3 ira ʒocko râepie ʒafârezejec. 18 Me wama bâzi qowi irec biucne gâcne ʒoaŋ namba 3 ira moc nâniŋmuo ine Wofuŋzi ŋic taha râewec e jahacne â taha‐ticnere maname mi biaŋkeocmu. Taha iŋucnere manapie wiac mamakâcne ezejec, ehame moc e nâ bac eocmuzi kiŋ nâfuaocmu.

19 “Qowi biucnezi wiac mamakâcne he heuac eocmu ine mi nânʒepieŋ, i ʒocko râepie ʒazejec. Ŋic ɋaɋacne juŋgopieŋzi qowi gâcne nâzo murâ nânʒepieŋ. 20 Mâc ŋic moc e wâwânâŋhec juhuc wama bâzi Wofuŋte biŋe mukicne irec qowi nâocmu e mi juzejec. 21 Me ŋic moczi ŋic me qowi wâwânâŋhec me wiac wâwânâŋne ba bâuac erâ wama bâzi Wofuŋte biŋe mukicne irec qowi nâocmu e wâc mi juzejec.”

22 Wofuŋzi Mose ʒiŋuc âzâcnewec: 23 “Go Israe ŋic ʒiŋuc jazac: Ŋoŋe bulimakao me lama me noniŋ irec wokemaŋ moc mi nânʒepieŋ. 24 Qowi e jahac hâmoekac me qowi mimicne gâcne jaŋe kisuc qâsuckeeŋgopieŋ irec wokemaŋ i wiac irec me irec rozo murâ ronʒepieŋ, nânâ ine moc mi nânʒepieŋ. 25 Me ŋic moc e Wofuŋte biŋe bâzi rikeniŋmu irec wokemaŋ nâocmu e mi juzejec. 26 Erâ i sawa mâcne, ŋoŋe ira me ira juhuc qâqâc me qowi soc moc mi nânʒepieŋ. 27 Moc e soc i nâocmu e mi juzejec.”

28 Wofuŋzi Mose ʒiŋuc âzâcnewec: 29 “Go Israe ŋic ʒiŋuc jazac: Moc e wama bâzi‐ticne Wofuŋtao râeocmu e irec tofane Wofuŋte biŋe qazejec. 30 Ehuc Wofuŋte biŋe alatao rikeeŋgopieŋ i e jahac bafisizejec. Wokemaŋ â qowi amec siecne hâcne bafisizejec, eme amec siecne i Wofuŋte maio fenʒoŋkehuc taha râenʒepieŋ. 31 Ehame taha bapa e wokemaŋ alatao râeme ʒaha amec siecnezi Aroŋ â ŋokâfâcne jaŋere biŋe ezejec. 32 Wama bâzire ŋefacne fâreopec i ine taha bapa râcne tahac enʒepieŋ. 33 Ŋefacne fâreopec i Aroŋ ŋokâfâcne jaŋeraonec moczi soc tiehuc wokemaŋ rikeocmu ere biŋe ezejec. 34 No Israe ŋic wama bâzi‐jeŋic irecnec amec siecne â ŋefacne nore biŋe rorâ taha bapa Aroŋ â ŋokâfâcne jarepo. I Israe ŋic jaŋe honerâ iŋuc erahuc juniŋte epo hâcne. 35 Wofuŋ bâzi rikecneniŋmu irecnec wiac izi hâcne Aroŋ â ŋokâfâcne jaŋere biŋe ezejec. Iŋuc fuaocte Wofuŋzi taha bapafâc‐ticne erâ juhuc kiŋaŋ qacneniŋte rowosâec‐jopawec dameŋ ira hâcne mupaŋkekicne. 36 Israe ŋic jaŋe wiac iŋuc hâcne jare tahac eniŋte Wofuŋzi taha bapa wokemaŋ rua‐jarembiŋ dameŋ ira mupaŋke‐jarewec. Jaŋe mimiŋzi ɋâric iŋuc erahuc junʒepieŋ.”

37 Qowi bâzi ririke â taha bâzi sâqocne tâtâmire â kiŋ tatara taha â mumufirie taha erâ wama bâzi irec sâcmutâc iŋuc hâcne fokac. 38 Israe ŋic jaŋe Sinai mâreŋ sawao Wofuŋ bâzi rikecneniŋte mutâcne‐jarewec dameŋ ira hâcne sâcmutâc i sasawa Sinai tikio Mose âzâcne mutâc efârewec.