1 Wofuŋ e Mose â Aroŋ ʒiŋuc jasawec: 2 “Ŋic moc e sahac‐ticne siwiŋneocmu me pupucneocmu me waec fuacneocmuzi ʒâhec wicsanaŋ ecneme taha bapa Aroŋ me ŋokâfâcne jaŋeraonec taha bapa moc erao jowa ranʒepieŋ. 3 Eme taha bapa e ŋic sahac ʒâwâ‐ticne qaŋqaŋ eme me sahac‐ticne biac dockeme honerâ muzejec, i wicsanaŋ hâcne. Taha bapa e ŋic iŋuc hone manac ecnerâ ʒiŋuc âzâcnezejec: Go wâwânâŋhec. 4 Mâc sahaczi dockerâ wic mi ehuc mâc qeueocmu, me sahac ʒâwâ‐ticne qaŋqaŋ mi eme taha bapazi ŋic e ficko râeme ŋehuc juha ʒoaŋ gie bapa 7 tarazejec. 5 Eme ʒoaŋ gie bapa namba 7 ira ine taha bapazi ŋic mocwâc hone manac ecneme wic biac mi fuame ine ʒoaŋ gie bapa 7 ʒuhuckerâ ficko ŋeocte muzejec. 6 Eme dameŋ i tarame hone manac ecneme wiczi fua sokac mi eme taha bapazi ŋic ʒinuc âzâcnezejec: Sahacge ɋaɋacnea fokac, i mâc pupucne rakac; eme ŋic e ŋaqi qoruc‐ticne ʒure‐fârerâ ɋaɋacne jaha juzejec. 7 Eme ŋic e taha baparao fuaocmu irec faicnao wiczi sokame ine taha bapa mocwâc fuacnezejec. 8 Eme taha bapazi mocwâc hone manac ecnehuc, wiczi fua sokac ewec, iŋuc honerâ ʒiŋuc muzejec: Ŋic e wicsanaŋ fuacnekacte wâwânâŋhec ekac.

9 “Ŋic moc wicsanaŋ ecneme taha baparao jowa ranʒepieŋ. 10 Eme taha bapazi hone manac ecnezejec. Ehame sahac‐ticne tamaehuc siwiŋneme sahac ʒâwâ‐ticne qaŋqaŋ ewec, eme sisiwiŋ fokac ira biuczi hâckerâ ŋeme honerâ ʒiŋuc manazo: 11 I wicsanaŋ raŋɋane, irec taha bapa e, ŋic go wâwânâŋhec jukomec, iŋuc âzâcnerâ ficko mi râezejec; ŋic e biac wâwânâŋhec ekac hâcne. 12 Me wicsanaŋzi fua sawec erâ sahac‐ticne sasawa qizecnaonec fuŋkerâ wahaku kikenao tarakac i sâcke‐fâreme 13 taha bapazi hone manac ecnezejec. Eme wicsanaŋzi sahac‐ticne sâcke‐fârewec, iŋuc honerâ ʒiŋuc âzâcnezejec: Go ɋaɋackekomec. Wiczi qaŋqaŋ efârewecte ŋic e ɋaɋackekac hâcne. 14 Me biuczi erao hâckerâ ŋeme ʒiŋuc manazo: Ŋic e wâwânâŋhec. 15 Eme taha bapa e hone manac ecnerâ ʒiŋuc âzâcnezejec: Go wâwânâŋhec ekomec. Wicsanaŋ fokacte biuc hâckekicnezi wâwânâŋhec ekac. 16 Me biuc hâckekicnezi qaŋqaŋ eme ŋic e taha bapa mocwâc fuacnezejec. 17 Eme taha bapazi hone manac ecnehuc, wic i biac qaŋqaŋ efârewec, iŋuc honerâ ʒiŋuc âzâcnezejec: Go ɋaɋackekomec hâcne.

18 “Me ŋic mocte sahacko wicʒâhâc tackekicnao 19 sisiwiŋ hawarine qaŋqaŋ me gogowac moc fuame taha bapa jâutunʒepieŋ. 20 Eme taha bapazi hone manac ezejec. Ehame sahac‐ticne biac dockeme sahac ʒâwâ‐ticne qaŋqaŋ eme taha bapazi honerâ ŋic ʒiŋuc âzâcnezejec: Go wâwânâŋhec ekomec, i wicʒâhâczi juku wicsanaŋ ewec hâcne. 21 Me sahac ʒâwâzi qaŋqaŋ mi eme â sahac‐ticnezi biac mi dockeha taha bapazi honerâ ficko râeme ŋehuc juha ʒoaŋ gie bapa 7 tarazejec. 22 Ehame wiczi mesahac‐ticne gâcne sâcke‐fâreme taha bapazi ʒiŋuc âzâcnezejec: Go wâwânâŋhec ekomec, wicgezi wicsanaŋ ekac hâcne. 23 Me wiczi mi sokame ine ʒiŋuc muzo: Wicʒâhâcte râfâ sawa eme taha bapazi fâsâcne jukomec, iŋuc âzâcnezejec.

24 “Me ŋic mocte sahac ʒoczi ʒame pârâckerâ gowaeme qaŋqaŋ erâ foocmu, 25 ine taha bapazi hone manac ezejec. Ehame sahac ʒâwâzi qaŋqaŋ eha sahac‐ticne dockeme ʒiŋuc manazo: I wicsanaŋ hâcne, ʒoczi ʒakicnao fuawec. Eme taha bapazi ʒiŋuc âzâcnezejec: Go wicsanaŋ fua‐garekacte wâwânâŋhec ekomec hâcne. 26 Me sahac ʒâwâzi qaŋqaŋ mi ewec, me sahaczi biac mi dockehuc mâc bâŋeŋkeme taha bapazi honerâ ficko râeme ŋehuc juha ʒoaŋ gie bapa 7 tarazejec. 27 Eme ʒoaŋ gie bapa namba 7 ira taha bapazi ŋic e hone manac ecnezejec. Ehuc wic i fua sokac eme honerâ ʒiŋuc âzâcnezejec: Go wicsanaŋ fua‐garekacte wâwânâŋhec ekomec. 28 Me wic i mârâc fowec ijaha fohuc mi sosoka mâc gowaeme ʒiŋuc muzo: Ʒocbâruŋzi ʒame siwiŋnewec. Irec taha bapa e ŋic ʒiŋuc âzâcnezejec: Ʒocte râfâ sawa ekacte ɋaɋackekomec.

29 “Eme ŋic me ŋokac moc utunao me mecqaŋeŋnao wic moc fuacneme 30 taha bapazi wic i honezejec. Ehame sahac‐ticne dockeha sahac ʒâwâne bâŋeŋkeme taha bapazi ŋic ʒiŋuc âzâcnezejec: Utugao me mecqaŋeŋgao wic fua‐garekac i wicsanaŋ ekacte wâwânâŋhec ekomec. 31 Me sahaczi biac mi dockeha â sahac ʒâwâzi gâgâpâc mocwâc mi ehuc bâŋeŋkeme taha bapazi wicte fuŋne iŋuc honerâ ŋic wichec e ficko râeme ŋehuc juha ʒoaŋ gie bapa 7 tarazejec. 32 Eme ʒoaŋ gie bapa namba 7 ira taha bapazi i mocwâc honezejec. Eme wiczi soka ŋedâmârec mi ewec, me sahac ʒâwâzi bâbâŋeŋ mi fuame â wiczi mi dockeme 33 ine ŋic e mecʒâwâ hehuc wicko ine mi hezejec. Ehame taha bapazi ŋic wichec e ficko râeme ʒoaŋ gie bapa 7 ʒuhuckerâ ŋezejec. 34 Eme ʒoaŋ gie bapa namba 7 ira taha bapazi wic honezejec. Ehame wiczi soka ŋedâmârec mi eme â sahaczi wâc mi dockeme taha bapazi ŋic ʒiŋuc âzâcnezejec: Go ɋaɋackekomec. Iŋuc âzâcneme ŋic e qoruc wiac‐ticne ʒure‐fârerâ ɋaɋacne juzejec. 35 Me irec faicnao wicticnezi mocwâc soka ŋedâmârec eme 36 taha bapazi honezejec. Ehuc fua sawec ewecko ine sahac ʒâwâ bâbâŋeŋte ʒâŋe mi fihuc mâc ʒiŋuc sawa âzâcnezejec: Go wâwânâŋhec jukomec. 37 Me wic sâfirune mârâc fowec ijaha foha sahac ʒâwâ gâgâpâc mocwâc fuame honerâ ʒiŋuc muzo: Wiczi somiekacte ŋic e ɋaɋackekac. Eme taha bapazi ʒiŋuc âzâcnezejec: Go ɋaɋackekomec.

38 “Me ŋic me ŋokac moc sahac‐ticnao ɋâɋâfoŋ fuame 39 taha bapazi honezejec. Ehame sahac‐ticnao ɋâɋâfoŋ fuakaczi qaʒueme ʒiŋuc manazo: Wic omanezi sawa fuakacte ŋic e ɋaɋackekac.

40 “Ŋic moc qizec susuc‐ticne waha‐fâreme utu pârâc eocmuzi sifu ɋaɋacne juocmu. 41 Me ŋic moc e qizec susuc‐ticne mai‐ticnao me naki‐ticnao domakac izi waha‐fâreme mai pârâc erâ sifu ɋaɋacne juocmu. 42 Me utu pârâc me mai pârâc‐ticnao sahaczi bâruŋkeme ʒiŋuc muzo: Utu pârâc me mai pârâc‐ticnao wicsanaŋ fuakac hâcne. 43 Iŋuc fuame taha bapazi honezejec, ehame sisiwiŋ bâbâroŋ fuakac i sahacko wicsanaŋ fuaekac irec sâc eme ʒiŋuc manazo: 44 Ŋic e wicsanaŋhec ehuc wâwânâŋhec ekac. Irec wicsanaŋzi qizec‐ticnao fuakacte taha bapazi ʒiŋuc âzâcnezejec: Go wâwânâŋhec ekomec.

45 “Ŋic moc wicsanaŋ ecneocmu e ŋaqi suckekicne heme hume juzejec, erâ qizec susuc‐ticne beheme ʒorazejec. Ehuc mecʒâwâ‐ticne faicpec bâsoŋkerâ ʒiŋuc muhuc owackezejec: Wâwânâŋhec, wâwânâŋhec. 46 E wicsanaŋ focneocmu sâc wâwânâŋhec jaha juocmu. Erâ wâwânâŋhec ekacte hae râpenao bucticne juzejec.

47 “Ŋaqi ʒâwânehec me ʒâwâ tâmiric 48 â qoruc wiac ʒâwânehec me ʒâwâ tâmiric, erâ qowi sahac me wiac gâcne qowi sahaczi bakicne 49 i gukuckehuc qondaŋ qarâ gufeme honerâ taha bapa jâutunʒepieŋ. 50 Eme taha bapazi honerâ ŋaqi qoruc gukuckekicne i ficko râeme foha ʒoaŋ gie bapa 7 tarazejec. 51 Ehame ʒoaŋ gie bapa namba 7 ira mocwâc honezejec. Eme gukuczi ŋaqi qoruc me qowi sahac me wiac gâcne qowi sahaczi bakicne i sâcke‐fâreme honerâ ʒiŋuc manazejec: I wiac repicnezi wâwânâŋhec. 52 Iŋuc manarâ ŋaqi qoruc ʒâwânehec me ʒâwâ tâmiric â wiac gâcne qowi sahaczi bakicne i ʒocko rikezejec.

53 “Me taha bapa e ʒiŋuc mecne honeocmu: Gukuczi ŋaqio me qoruc wiacko me wiac qowi sahaczi bakicnao mi sawewec. 54 Iŋuc honerâ wiac gukuckekicne i ʒureniŋte mutâcne‐jarezejec, ʒurepie ficko râeme foha ʒoaŋ gie bapa 7 tarazejec. 55 Eme wiac gukucnehec ʒurekicne i taha bapazi mocwâc honezejec. Eme gukuczi mi sawewec â hawari‐ticne wâc mi hetikiewec, iŋuc honerâ sifu ʒiŋuc manazejec: I wâwânâŋnehec ekac. Irec gukuczi ŋifec fuame ʒocko rikezemec.

56 “Me wiac gukucnehec ʒurepie gowaeme taha bapazi honerâ ŋaqi me qowi sahac me qoruc tofane gukuckewec i bâsuckerâ behezejec. 57 Eme ŋaqio me qoruc wiacko me wiac gâcne qowi sahaczi bakicnao mocwâc saweme go wiac gukuckekicne hâcne ʒocko rikezemec. 58 Me ŋaqi me qoruc wiac me wiac gâcne qowi sahaczi bakicne i ʒurepie gukuc omaeme harierâ ʒurepie ɋaɋacke‐hâmozejec.”

59 Ŋoŋe ŋaqi ʒâwânehec me ʒâwâ tâmiric me qoruc wiac, me wiac gâcne qowi sahaczi bakicne i gukuckeme ɋaɋacne me wâwânâŋhec eocmu irec fuŋne mananiŋte sâcmutâc ʒine hâcne râekicne.