1 Eme Wofuŋzi ʒuhuckerâ Mose ʒiŋuc âzâcnewec: 2 “Go Aroŋ â ŋokâfâcne jaŋe tiri ʒâŋe‐nane bawahanʒipiŋte Israe ŋic jaŋe tiri taha nore biŋe qahuc râeeŋgopieŋ i moc mi maickeniŋte jazazemec, no hâcne Wofuŋ jukopac. 3 Erâ ʒiŋuc jazazemec: Ɋâricfâcge gaŋne gaŋne jufeniŋmu jaŋeraonec moczi Israe ŋic jaŋe tiri taha wiac Wofuŋte biŋe qahuc râeniŋmu i wâwânâŋhec juhuc maickeocmu e mai‐naneonec bâsirowezo, no hâcne Wofuŋ jukopac. 4 Aroŋte ɋâricfâc jaŋeraonec moczi wicsanaŋhec me sahac opâ‐ticne wâwânâŋheczi tiri taha moc mi nânâ mâc juhuc ɋaɋackezejec. Ŋic moc e, wiac moczi me ŋic moczi qâŋɋâŋ heuawec i ba bâuac eocmu, me wie gorewac‐ticne hoŋkeocmu 5 me wiac babarâ jueŋgopieŋ jaŋe ba bâuac ejareocmu, me ŋic moc wâwânâŋ‐ticne i me i he heuac eocmu e wâwânâŋhec jaha eocmu. 6 Wiac iŋucne hâcne ba bâuac eocmu ŋic e wâwânâŋhec erâ juha hae ŋafezejec, ehame tiri taha wiac moc mi nânâ qanaŋ opâ ruazejec. 7 Izi ʒoaŋ hume ɋaɋackezejec. Eme faicnao tiri taha wiac izi nânâ‐ticne ekacte sâcne nâzejec. 8 Qowi e jahac hâmoekac me qowi gâcnezi ki qâsuc ecneeŋgopieŋ i wâc wâwânâŋhec ekacte mi nâzejec, no Wofuŋ jukopac hâcne. 9 Jaŋe qaqatara bâfuahuc kiŋhec erâ hâmonʒipiŋte mumutâc dâŋnane mana rereŋ enʒepieŋ. Wofuŋ noni hâcne bâtiric‐jopakopac.

10 “Ŋic furunezi nânâ bâtirikicne moc mi nâzejec. Me ŋic moczi taha bapa ŋicmanac fisicneocmu, me taha bapare kiŋaŋŋic jabane, jahe wâc nânâ bâtirikicne mi nâzepirec. 11 Taha bapa kiŋaŋŋic‐ticne moneŋzi furine bakicne e me ficticnao fuambiŋ jaŋe ine sâcne nâniŋmu. 12 Taha bapa otâ‐ticnezi ŋic furune moc baocmu e wâc iŋuc jaha taha bâtirikicne mi nâzejec. 13 Mâc otâ‐ticne moczi hozec me ʒuhuc bâtâc erâ naru motec tâmiric juhuc mârâc naru‐ticnao juwec irec sâc mamac‐ticnere ficko risierâ juocmu eki ine mamac‐ticnere nânâ sâcne nâocmu; ŋic furunezi ine mi nâzejec. 14 Me ŋic moczi fuŋne mi mana tarahuc nânâ bâtirikicne nâocmu e irec okacne râehuc ʒuhuckerâ moneŋ 5‐konec wâŋ bâfuarâ taha bapa râcnezejec. 15 Israe ŋic jaŋe Wofuŋte tiri taha râeeŋgopieŋ i taha bapa jaŋe mi bâsifuckenʒepieŋ. 16 Jaŋe iŋuc epie Israe ŋic jaŋe nânâ bâtirikicne i nâhuc kiŋ bahac bâfuanʒipiŋte iŋuc mi enʒepieŋ. Wofuŋ noni hâcne bâtiric‐jopakopac.”

17 Eme Wofuŋzi Mose kecʒiŋuc âzâcnewec: 18 “Go Aroŋ â ŋokâfâcne erâ Israe ŋic sasawa ʒiŋuc jazazemec: Israe kikefuŋ me ŋondeŋ‐ŋeŋicko ŋic jabane jueŋgopieŋ jaŋeraonec moczi mumupaŋ‐ticnere manasuhuc taha râeocmu, me buafec faio taha râehuc Wofuŋ rikecneocmu 19 e bulimakao me lama me noniŋ ŋicne biaŋne moc râeme Wofuŋzi manacneme biaŋkezejec. 20 Ŋoŋe qowi repicne mi râenʒepieŋ, qowi iŋucnere Wofuŋzi mana‐ŋareme mi biaŋkeocmu. 21 Ŋoŋeraonec moczi mumupaŋ‐ticnere manasuhuc me buafec faio Wofuŋ wama bâzi moc rikecnezo murâ ine qowi biaŋne â bahac fâsâc moc rikecnezejec. 22 Qowi ʒâŋe‐jeŋic hâpokicne me tuturuŋ‐jeŋic tarakicne me wichec me sahac opâ‐jeŋic wahaekac me korehec, iŋucne Wofuŋte taha râehuc alatao mi rikenʒepieŋ. 23 Bulimakao me lama me kike‐jeŋic herickekicne jaŋe buafec faio taha râezo murâ râenʒepieŋ, mâc mumupaŋ‐jeŋicte manasuhuc qowi iŋucne râepie mi sâckeocmu. 24 Qowi moc biŋticne bâropiekicne me kijacnekicne me bâpârâckekicne me bakicne i mâreŋ‐ŋeŋicko juhuc Wofuŋte taha mi râenʒepieŋ. 25 Erâ qowi iŋucne ŋic gurune gurune jaŋeraonec rorâ Anutu taha mi bacnenʒepieŋ. E qowi puriŋne iŋucne tahare râepie mana‐ŋareme mi biaŋkeocmu.”

26 Eme Wofuŋzi Mose kecʒiŋuc âzâcnewec: 27 “Bulimakao me lama me noniŋ motecne moc fuarâ neŋgocnehec juhame ʒoaŋ gie bapa 7 tarazejec. Eme ʒoaŋ gie bapa 8 ira fuŋkerâ jufehuc taha rârâere sâc eme alatao rikepie Wofuŋzi maname biaŋkeocmu. 28 Bulimakao me lama neŋgocne jahe motecnehec ʒoaŋ ijaha mi qâhâmoc‐jopanʒepieŋ. 29 Ŋoŋe Wofuŋ daŋge taha moc râcnezo murâ ine Wofuŋzi maname biaŋkeocte manasuhuc râenʒepieŋ. 30 Ŋoŋe taha i ʒoaŋ ijaha nâfârenʒepieŋ, tiwâne moc râepie foha hae mi furezejec. No Wofuŋ jukopac hâcne.

“Ŋoŋe iŋuc ehuc sâcmutâc dâŋnane reŋkenʒepieŋ. 31 No Wofuŋ jukopac hâcne. 32 Ehame tiri ʒâŋe‐nane mi bawahanʒepieŋ, aricne, Israe ŋic ŋoŋe nore manapie tiri jukopac ezejec, noni hâcne bâtiric‐ŋopakopac. 33 Erâ nonizia Anutu‐ŋeŋic jupemurâ Aigita mâreŋkonec jowac‐ŋopa wefupo. No Wofuŋ jukopac hâcne.”