1 Wofuŋzi Mose kecʒiŋuc âzâcnewec: 2 “Go Israe ŋic jazatec oliwa hândâŋne bâpisickekicne irec wokemaŋ ɋaɋacne lambere biŋe bafisipie ʒahuc ʒuʒuhuc jaha tamaehuc fozejec. 3 Tutumaŋ qoruc bozeo qorac tapa katapa ŋekac irec ââketâc râpenao ira Aroŋzi ʒure emasaŋ ezejec; eme hae owâeme Wofuŋte maio qazeme ʒahuc ŋeha hae furezejec. Dâŋ izi gaŋne gaŋne dâŋsanaŋ‐ŋeŋic erâ forahuc juzejec. 4 Lambe kikene golzi bakicne irec faio lambe ŋekac i ʒure emasaŋ eme Wofuŋte maio ʒuʒuhuc jaha ʒahuc ŋezejec.

5 “Eme go poroŋ uucne rorâ nânâ poroŋ 12 rikezemec, nânâ poroŋ mocjahare sâc ine poroŋ uucne tase moc irec teŋkonec jajahec rocjofazemec. 6 Ehuc tebo golzi bakicne irec faio biri jajahec râezemec, biri mocko nânâ poroŋ 6 â mocko 6 jaha, iŋuc râe razemec. 7 Erâ nânâ poroŋ birickerâ wiac âsu biaŋ furi sâkozi ruacnezemec. Eme poroŋ âsu biaŋhec izi Wofuŋte taha bâzi ezejec. 8 Eme Aroŋ e sabata hombaŋ sâc nânâ poroŋ iŋuc hâcne birickehuc juzejec. Israe ŋic jaŋe iŋuc ehuc juniŋte mutâcne‐jarekicne hâcne. 9 Nânâ poroŋ i wiac tirine jâmbâŋ, irec Aroŋ â ŋokâfâcne jaŋere biŋe eha tirificko nânʒepieŋ. Wofuŋ taha bâzi rikecneniŋmu sâc wiac izi hâcne taha bapare biŋe erâ forahuc juzejec.”

10 Ehame Israe ŋic jaŋere ŋondeŋko ŋic moc juwec e neŋgoc‐ticne Israe ŋokac â mamac‐ticne ine Aigita ŋic. E juku dameŋ mocko teuŋ‐jeŋicko Israe ŋic moc ehec dâŋ mumuc epic. 11 Ehuc ŋic e Wofuŋte ʒâŋe musoriŋkehuc sâweckewec. Iŋuc eme Moserao jowa rambiŋ. Neŋgoc‐ticnere ʒâŋe Selomiti, e Daŋ guruonec Dibirire otâ. 12 Eme Wofuŋtaonec dâŋ okacne mananiŋte woŋec kâpâcwâru bapie ŋewec.

13 Eme Wofuŋzi Mose kecʒiŋuc âzâcnewec: 14 “Ŋic sâwecdâŋ muwec e mutec teuŋkonec jowa wahanʒepieŋ, ehame sâwecdâŋ mume manambiŋ jaŋe mejeŋic qizecnao râehapie kikefuŋ sasawa jaŋe qânâzi hehâmonʒepieŋ. 15 Erâ Israe ŋic ʒiŋuc jazazemec: Moc e Anutu musoriŋkeocmu e kiŋsâko hureocmu. 16 Moc e Wofuŋte ʒâŋe musoriŋkeocmu e qâhâmonʒepieŋ; kikefuŋ sasawa jaŋe qânâzi hehâmonʒepieŋ. Ŋic jabane mecne mâreŋ rune mecne Wofuŋte ʒâŋe musoriŋkepie qâhâmoc‐jopanʒepieŋ. 17 Moc e ŋic moc qâhâmome okacne qâhâmonʒepieŋ wâc. 18 Â moc e qowi moc qâhâmoocmu e okacne râerâ juzejec. 19 Me ŋic moczi âgo‐ticnere sahac sipirickeocmu e ine âgo‐ticne ecnewec sâc ijaha ecnezo. 20 Me kikene qazume okacne ere wâc qazuzo, ʒâŋene âke hâpome okacne ere wâc âke hâpozo, me micsiecne hezume okacne ere wâc hezuzo. E âgo‐ticne ba imac ecnewec sâc ijaha ecnezo. 21 Moc e qowi qâhâmoocmu e okacne râezejec â moc e ŋic moc qâhâmoocmu e wâc qâhâmonʒepieŋ. 22 Ŋic jabane mecne mâreŋ rune mecne jaŋere sâcmutâc dâŋ i mocjaha fozejec. Noni hâcne Wofuŋ Anutu‐ŋeŋic.” 23 Mose e Israe ŋic dâŋ iŋuc hâcne jazawec, ehame jaŋe sâwecdâŋ muwec ŋic e ecnepie teuŋkonec wahame qânâzi hehâmombiŋ. Iŋuc ehuc Israe ŋic jaŋe Wofuŋzi Mose dâŋ mutâcnecnewec irec sâcko embiŋ.