1 Sabata hombaŋ mocko Jesu â motecfâc-ticne jaŋe padi gie ŋondeŋko rambiŋ. Rahuc motec jaŋe fârine moc moc bâtâcnerâ mezi šâmurâ nâmbiŋ. 2 Iŋuc epie farisaio jaŋe honerâ mumbiŋ: “ŋoŋe wemocte sabata hombaŋko wiac mi eene eŋgopieŋ?” 3 Mupie Jesuzi šiŋuc jazawec: “Dawidi â ŋicfâcne nânâre hâmohuc wiac embiŋ, i ŋoŋe wose manac mi eeŋgopieŋ me? 4 Dawidi e Anuture ufuŋko ferâ poroŋ Anuture biŋe râekicne i rorâ nâhuc ŋicfâcne jareme mâmâc nâmbiŋ. Poroŋ i ŋic omane bâtâc bajarekicne, bâzi ririke ŋic micbuc-jeŋic. Eme i sifu nâmbiŋ.” 5 Iŋuc murâ muwec: “Ŋic Fâri Wâtuŋne e sabata hombaŋ irec rune jukac wâc.”

6 Eme sabata hombaŋ mocko mitificko ferâ miti jaza qazuc ewec. Ehame ira ŋic moc ŋewec, e me fârene ɋaŋakicne. 7 Eme miti qaqazu â farisaio jaŋe hombaŋko ŋic bâpiaŋkeme honerâ dâŋko râeniŋte ruc bahuc ŋembiŋ. 8 Eme Jesuzi maŋjeŋicko hone tararâ ŋic mene ɋaŋakicne e šiŋuc âzâcnewec: “Go fahare mai domac.” Mume fahare domawec. 9 Ehame Jesuzi šiŋuc jazawec: “No wio-ŋarepe muniŋ: Sabata hombaŋko wiac biaŋne me wiac sâqocne ezo, ŋic bâpiaŋ-jopazo me sipiric-jopazo?” 10 Iŋuc murâ risic forisic honec-joparâ ŋic šiŋuc âzâcnewec: “Mege fâretiŋnec.” Eme ŋic e iŋuc eme meticne sanaŋkewec. 11 Eme jaŋe i hone manac erâ aariczi maŋjeŋic fusucmame Jesu iŋuc me iŋuc ecneniŋte muc manac embiŋ.

12 Dameŋ ira Jesuzi tikio numuocte fewec. Ferâ ŋafe šora Anutu numucnehec juhame hae furewec. 13 Hae fureme kikefuŋfâc-ticne hefârec-joparâ jaŋeraonec 12 bâwosâec-joparâ motec bacjopawec, ehuc šâŋe sâko-jeŋic aposolo muwec. 14 Ʒâŋe bucbuc-jeŋic ine šiŋuc: Simoŋ, šâŋe-ticne moc Petoro â ɋaticne Anderea, erâ Jakobo â Johane, erâ Filipo â Batolomaio, 15 erâ Mataio â Toma, erâ Jakobo Alifaiore ŋokâ â Simoŋ Ʒelote, 16 erâ Juda Jakobore ŋokâ â Juda Karioto haeonec, e juku Jesu doc bawec.

17 Eme rocjopame tikionec waharâ wâneŋko fisirâ juhapie kikefuŋfâc-ticne bocjaha â ŋic guru sâko erao tumaŋnembiŋ. Jaŋe Judaia mâreŋkonec â Jerusalem haeonec â Tiro Sidoŋ hâwec moŋgeŋkonec fisipie miti jazawec â huchec ɋiɋicne bacjopawec. 18 Erâ demoŋzi areŋ ejarewec jaŋe wâc bâpiaŋ-jopawec. 19 Eme bâuapie tâpiri-ticne jaŋerao fotâcneme ɋiɋic qambiŋte bâuaniŋte kime iriac mâretec ecnembiŋ.

20 Eme Jesuzi motecfâc-ticne jaŋerao šâŋe fihuc šiŋuc muwec: “Hapetac jueŋgopieŋ ŋoŋere manape šerine ekac, ŋoŋe hâcne Anuture uucmaŋ biŋe qaŋarekicne. 21 Dameŋ šiŋuczia nâ hâmoc ehuc jueŋgopieŋ ŋoŋere manape šerine ekac, ŋoŋe hâcne juku nâ gapec enšoŋgopieŋ. Dameŋ ši ki busâqoc ehuc jueŋgopieŋ ŋoŋere manape šerine ekac, ŋoŋe hâcne juku bubiaŋ bâfuanšoŋgopieŋ. 22 Ŋic jaŋe Ŋic Fâri Wâtuŋne ere erâ qaisoc-ŋoparâ jâpe bâsuec eŋarerâ musâqorec-ŋoparâ šâŋe-ŋeŋic musoriŋkeniŋmu, ŋoŋe manariŋ-ŋopakopac. 23 Wiac iŋucne fuame dameŋ ira šeri bari enšepieŋ. Manaŋgopieŋ, sambâŋko furine afecne mi foŋarekac. Mimiŋnefâc-jeŋic jaŋe porofete sâc ijaha ejare jumbieŋ.

24 “Moneŋ mafa sâkohec, jei, ŋoŋe juku wemo wiaczi bâmiriŋ-ŋopazokac? 25 Dameŋ šiŋuczia nânâ qowi mâririhec jueŋgopieŋ, jei, ŋoŋe juku nânâ basanšoŋgopieŋ. Dameŋ šiŋuczia gâgâwi faio jueŋgopieŋ, jei, ŋoŋe juku ki busâqoc bâfuanšoŋgopieŋ. 26 Muteŋ bâteŋ eŋareeŋgopieŋ, jei, ŋoŋe juku weniŋuc enšoŋgopieŋ? Mimiŋnefâc-jeŋic jaŋe porofete burecne iŋuc jaha muteŋ bâteŋ ejare jumbieŋ.

27 “Dâŋnane manahuc juŋgopieŋ ŋoŋe ŋazape: Ŋoŋe râsifâc-ŋeŋic âgo jauŋ ejarenšepieŋ, qaisoc-ŋopaeŋgopieŋ jaŋe jauŋ bacjopanšepieŋ, 28 sâwec-ŋopaeŋgopieŋ jaŋe jambuŋ-jopanšepieŋ, musâqorec-ŋopaeŋgopieŋ jaŋere erâ numunšepieŋ. 29 Moczi maucge ŋicfecne qame ŋifecne wâc sicnecnezemec â moczi ŋaqige faine gowac rome e maŋne mâmâc qikiŋnecnezemec. 30 Á moczi wiac mocte numu-gareme râcnezemec â moczi wiac moc gowac rome bârisie-gareocte mi fotariezemec. 31 Ŋoŋe ŋic jaŋe wiac eŋareniŋte manasueŋgopieŋ, sâc ijaha wâc jaŋe ejarenšepieŋ. 32 Ŋoŋe maŋjauŋ eŋareeŋgopieŋ jaŋe sawa maŋjauŋ ejareniŋmu, ine wemocko tofane fome juku bazu-ŋarezo? Miti tâmiriczi âgofâc-jeŋic maŋjauŋ ejareeŋgopieŋ wâc. 33 Á âgo eŋareeŋgopieŋ jaŋe sawa âgo ejareniŋmu, ine wemocko tofane fome juku bazu-ŋarezo? I miti tâmiriczi eeŋgopieŋ wâc. 34 Okacne bârisie-ŋareniŋmu jaŋe sawa wiac ejarepie wemocko tofane fome juku bazu-ŋarezo? Miti tâmiriczi âgofâc-jeŋic šiŋuc muhuc wiac ejareeŋgopieŋ wâc: Juku sâc ijaha bârisie-nârenšepieŋ.

35 “Aricne, iŋuc mi ezo, ŋoŋe râsifâc-ŋeŋic âgo jauŋ ejarenšepieŋ. Okacne mi mecne bazu-ŋareniŋmu jaŋe sifu ehâmo-jarehuc wiac qikiŋne-jarenšepieŋ. Iŋuc erâ juku furine ŋemâcne ronšoŋgopieŋ, erâ femicne sâko ere naru motecfâc erâ juniŋmu. Eki hâcne ŋic qâomane â râŋgeŋne jaŋe sifu bâmec bajareekac. 36 Mamac-ŋeŋiczi buuruc juekacte ŋoŋe iŋuc jaha buuruc junšepieŋ. 37 Ŋoŋe ŋic okacne dâŋ mi mutara-jarenšepieŋ, eme Anutuzi ŋoŋe iŋuc jaha okacne dâŋ mi mutara-ŋareocmu. Ŋoŋe ŋic kiŋko mi râec-jopanšepieŋ, eme Anutuzi ŋoŋe iŋuc jaha kiŋko mi râec-ŋopaocmu. Ŋoŋe tofa-ŋeŋic ŋic qikiŋne-jarepie Anutuzi tofa-ticne ŋoŋe iŋuc jaha qikiŋne-ŋareocmu. 38 Ŋoŋe ŋic bâmec bajarepie Anutuzi ŋoŋe iŋuc jaha bâmec baŋareocmu. Ehuc irec sâc jâuruhuc siric-ŋoparâ bašihuc guru fufusuc heŋareocmu. Ŋoŋe sâc bajuhuc ŋic wiac ejareniŋmu, sâc ijaha Anutuzi bajuhuc ŋoŋe eŋareocmu.”

39 Iŋuc murâ dâŋ suŋsuŋne moc šiŋuc šuhuckerâ jazawec: “Tiŋtuŋ jajaheczi jojowac erâ mi qâsorierâ mâmâc jaha hârâcko hunicmu me? 40 Moteczi qaqazu-ticne sisiricke i mi fokac, motec e wiac mana-hâmorâ qaqazu-ticnere sâc eme taraocmu. 41 Go wemocte âgogere šâŋeo gâc i honehuc go gahacne šâŋeo jâcdâkâ fokac ine mi hone tarakomec? 42 Jâcdâkâ go gahacne šâŋeo foipiehame go weniŋuc âgoge šiŋuc âzâcnetec sâckeocmu: `Âgo, manahaŋ, šâŋegao gâc fokac rogarepe. Ž Burecŋic, gahacne šâŋeo jâcdâkâ fokac i qanaŋ rorâ ie âgogere šâŋeo gâc rotec sâckeocmu.

43 “Jâc biaŋnao wemocko fârine sâqocne fuaocmu, me jâc sâqocnao wemocko fârine biaŋne fuaocmu? 44 Jâcte fuŋne fârinezi bataniŋkeekac. Safeo suc fârine fuame rozo me? Me šaqeŋko saŋ fârine fuame rozo me? 45 Ŋic biaŋnezi maŋrowaŋ-ticne biaŋnaonec wiac biaŋne utuocmu, ŋic sâqocnezi maŋrowaŋ-ticne sâqocnaonec wiac sâqocne utuocmu. Maŋko wiac fusucmarâ foekac, ijaha micko wefuekac.

46 “Wemocte mâc micbipiczi Wofuŋ-nâŋec, Wofuŋ-nâŋec i sawa munarehuc dâŋ ŋazaekopac i mi reŋkeeŋgopieŋ? 47 Moc e nohec juhuc dâŋnane manarâ reŋkeocmu, e mohec sâc hepe mana taraniŋ? 48 E ŋic moc ficsanaŋ bawec ere sâc. Ŋic eki hâcne baocte wâtuŋ šoricne wiseme hume keteŋkeme qiŋ herâ domawec. Erâ fic bâzickeme ŋeha hoemaŋ maickeme mâŋâŋ tâpirihec qarâ fic i sanaŋne bakicnere bâpiewec. 49 Á moczi dâŋnane manarâ qataraocmu e ŋic moc fic dodocne bawec ere sâc. Ŋic eki hâcne fic baocte wâtuŋ mâc burec burec wiseme hume fic iriŋ biriŋ bawec. Ehame hoemaŋ maickeme mâŋâŋ tâpirihec warerâ fic âke tuŋkeme rândiŋkerâ qarâ qanšaŋnewec.”