1 “O taha bapa, uŋdâŋ ʒira fuakac i ŋoŋere biŋe ekac hâcne. 2 Ŋoŋe hazec râerâ ʒâŋe biŋe‐nane manariŋ qâriŋ mi eniŋmuo ine ŋaŋacne sâwec‐ŋopape jambuŋ‐ŋeŋiczi wâc sâwechec jaha eocmu. Ŋoŋe ʒâŋe biŋe‐nane manariŋ qâriŋ mi eeŋgopieŋte biac sâwec‐ŋopakopac hâcne, Anutu Tâpiri Ɋuŋɋasaŋ Wofuŋ nore dâŋ iŋuc. 3 Manaŋgopieŋ, taha bâzire qowi bacjopa fisiniŋmu jaŋere hozi ʒâŋe mai‐ŋeŋic ruacnerâ behec‐ŋopape jawa forakac ihec mâmâc bacŋopa raniŋmu. Ehame ɋâricfâc‐ŋeŋic jaŋe wâc mana sâqore‐jarepemu. 4 Iŋuc fuame ʒiŋuc mana taranʒepieŋ: Lewire guru jaŋehec ʒâʒâfic‐nâŋec fokac i ʒuhuckerâ foocte uŋdâŋ ʒi ŋazapo, Anutu Tâpiri Ɋuŋɋasaŋ Wofuŋ nore dâŋ iŋuc. 5 No jaŋehec ʒâʒâfic epo ine wamao jujuhâmo bâfua‐jarehape araŋ banareniŋte epo, eme jaŋe araŋ banarehuc ʒâŋe biŋe‐nanere erâ dape‐narembiŋ. 6 Micjeŋicko mu qaqazuc dâŋ fârine fohuc juhame bipic‐jeŋicko eeatuc dâŋ mi fuawec. Jaŋe norao qohotarâ wamao tiŋne juhuc ŋic bocjaha hata sâqocnaonec bârisiec‐jopambiŋ. 7 Taha bapa e Anutu Tâpiri Ɋuŋɋasaŋ Wofuŋ nore biŋe mumu jukacte dâŋticne muhuc mamana tarare guriŋ bazejec. Ehame ŋic jaŋe mu qaqazuc dâŋticne mananiŋte fotarienʒepieŋ. 8 Ŋoŋe ine hata fâretiŋ beherâ mu qaqazuc dâŋŋeŋiczi ŋic bocjaha maŋ bâsifuc ejarepie fâfâc‐jopawec. Lewire guru jaŋehec ʒâʒâfic epo ʒâʒâfic i ŋoŋe hâcne bâbiembiŋ, Anutu Tâpiri Ɋuŋɋasaŋ Wofuŋ nore dâŋ iŋuc. 9 Ŋoŋe nore hata beherâ mu qaqazuc ehuc ŋic hone bârâwiŋ ejarembiŋte no wâc ŋic sasawa jaŋere maio hone suŋgiŋ â behe qaisoc eŋarepemu.”

10 Wiac nâŋâc mamac‐nâŋec mocjaha, â Anutu mocjahazi bâfuac‐nâpowec i! Eme wemocte mamacfâc‐nâŋec jaŋehec ʒâʒâfic ekicne i bâbiehuc nâŋâczia eeatuc eec eeŋgopeneŋ? 11 Judaŋic jaŋe eeatuc bâfuahuc Israe guru maŋnao â Jerusalem haeo wiac mamakâcne embiŋ. Ehuc nemu araŋ bajareeŋgopieŋ ŋic i jaŋere otâfâc rocjopahuc, Wofuŋzi tiri ufuŋ hone aŋac ecneekac i bâbiembiŋ hâcne. 12 Irec ŋic mâsi iŋucne eekac e â ɋâricfâc‐ticne Anutu Tâpiri Ɋuŋɋasaŋ Wofuŋ taha bacneeŋgopieŋ i jaŋe hâcne Wofuŋzi bâsirowec‐jopame Jakobore kikefuŋko omaenʒepieŋ.

13 Â moc ʒiŋuc eeŋgopieŋ: Ŋoŋe Wofuŋte taha bafisipie hone aŋac ehuc meŋeŋickonec mi roekacte kio wâwâsic epie ʒâŋeuc‐ŋeŋiczi waharâ alata‐ticne sâcke‐fâreekac. 14 Ehame ŋoŋe ʒiŋuc muhuc wioeŋgopieŋ: “Wemocte mi roekac?” I ʒiŋucte: Go socɋâri juhuc ŋokac romeŋ i Wofuŋzi honehame behe qaisoc ecnemeŋ. Ŋokac e hâcne gohec ʒâʒâfic ehuc âgo babaficge â ŋonâŋge juwec. 15 Irec ŋic moc e mamana biaŋ huŋgaŋne focneweczi iŋuc moc mi ewec. E ine weniŋuc eekac? E ɋâricfâc‐ticne jaŋe fuarâ Anuture naru motecfâc jaha juniŋte manasu biric eekac. Irec moc e socɋâri juhuc ŋokac rowec e behe qaisoc ecnezacte maŋticnere soŋaŋ juzejec. 16 Wofuŋ Israere Anutu e kecʒiŋuc mukac: “No ʒuhuc bâtâc eeŋgopieŋ jaŋe mecne, â ŋic bâʒâic‐jopahuc kiŋ hureeŋgopieŋ jaŋe mâmâc hone takic ejareekopac, Anutu Tâpiri Ɋuŋɋasaŋ Wofuŋ nore dâŋ iŋuc. Irec ŋoŋe ŋonâŋfâc‐ŋeŋic behe qaisoc ejarenʒipiŋte rucgereŋ‐ŋeŋic bahuc junʒepieŋ.”

17 Ŋoŋe Wofuŋ micneneŋ ecneeŋgopieŋ. Iŋuc ŋazape ʒiŋuc mueŋgopieŋ: “Hâc, nâŋe weniŋuc ehuc micneneŋ ecneeŋgopeneŋ?” I ʒiŋuc muhuc eeŋgopieŋ hâcne: “Sâqocne baeŋgopieŋ jaŋe Wofuŋzi honec‐jopame biaŋkeha mana aŋac ejareekac.” Â moc ʒiŋuc wiohuc eeŋgopieŋ: “Anutu mumutiŋ rune e wena?”