1 Eme taha bapa fekicne Eliasibi e taha bapa qomâfâc‐ticne jaŋehec fuŋkerâ Lama Motâc bambiŋ. Jaŋe iŋuc ehuc mutirirâ wâtuŋ â motâc‐ticne mâmâc râembiŋ. Erâ ʒuhuckerâ barakupie Hameare ʒae â Hananere ʒae ira fisiwec. 2 Ehame Jeriko ŋic jaŋe jahere tofanao iticnerâ bambiŋ. Eme jaŋere tofanao iticnerâ Imirire ŋokâ Ʒakuruzi bawec.

3 Ehame Hasenare ŋokâfâc jaŋe Hâwec Qowi Motâc bambiŋ. Erâ wâtuŋ‐ticne âkendâŋnehuc otecne â motâc erâ babasanaŋ wiac‐ticne râe‐fârembiŋ. 4-5 Eme jaŋere tofanao iticnerâ Uriare ŋokâ Hakozi ŋosa‐ticne Meremoti eki bâpiaŋkewec. Eme ere tofanao iticnerâ Berekiare ŋokâ Meseʒabe ŋosa‐ticne Mesulamzi bâpiaŋkewec. Eme ere tofanao iticnerâ Banare ŋokâ Zadokozi bâpiaŋkewec. Eme ere tofanao iticnerâ Tekoi ŋic jaŋe bâpiaŋkembiŋ. Ehame fekicnefâc‐jeŋic jaŋe ine bomboŋ‐jeŋicte gie qâtec‐joparâ mi bambiŋ.

6 Ehame Paseare ŋokâ Jojada â Besodejare ŋokâ Mesulam jahe Motâc Raŋɋane bâpiaŋkepic. Jahe wâtuŋ‐ticne âkendâŋnehuc otecne â motâc erâ babasanaŋ wiac‐ticne râe‐fârepic. 7 Eme jahere tofanao iticnerâ Gibeoŋ ŋic Melatia â Meronoti ŋic Jadoŋ jahe bâpiaŋkepic. Erâ Eufrata opâ ocniŋucnao mâreŋ fokac irec soŋaŋ ere rurumaŋko Gibeoŋ â Mizipa ŋic jumbiŋ jaŋe mâmâc bambiŋ. 8 Jaŋere tofanao iticnerâ Harihajare ŋokâ gol bapa Uʒielezi bâpiaŋkewec. Eme ere tofanao iticnerâ âsu biaŋ bapa ŋic jaŋeraonec moc ʒâŋene Hanania eki bâpiaŋkewec. Jaŋe Jerusalem hae iŋuc bâpiaŋkehapie raku Sac Qaratiekicne ira fisiwec. 9 Eme Hananiere tofanao iticnerâ Hurure ŋokâ Refajazi bâpiaŋkewec. E Jerusalem hae dâkâne irec mâreŋ i qizeckerâ juwec. 10-11 Eme ere tofanao iticnerâ Harumafare ŋokâ Jedaja e ficticne ŋifecnao sac fowec i bâpiaŋkewec. Eme ere tofanao iticnerâ Hasabinejare ŋokâ Hatusizi bâpiaŋkewec. Eme Harimte ŋokâ Malikia â Pahati‐Moabire ŋokâ Hasubu jahe hae dâkâne moc â Ʒafe Ʒae i bâpiaŋkepic. 12 Eme jahere tofanao iticnerâ Halohesire ŋokâ Salum otâfâcne jaŋe bafickehapie bâpiaŋkewec. Salum e Jerusalem hae dâkâne moc irec soŋaŋ juwec.

13 Eme Hanuŋ â Ʒanoa haere ŋecjucfâc jaŋe Wâneŋ Motâc i bâpiaŋkembiŋ. Bâpiaŋkerâ otecne â motâc erâ babasanaŋ wiac‐ticne râe‐fârerâ haesac i I tauseŋ kubi ʒuhuckerâ barakupie Homotâcko fisiwec.

14 Ehame Rekabare ŋokâ Malikia e Bete‐Hakerem hae mâreŋ qizeckehuc juweczi Homotâc i bâpiaŋkewec. Bâpiaŋkerâ otecne â motâc erâ babasanaŋ wiac‐ticne râe‐fârewec.

15 Eme Kolohoʒere ŋokâ Salum e Mizipa hae mâreŋ qizeckerâ juweczi Opâ Ʒâŋe Motâc bâpiaŋkewec. Bâpiaŋkehuc bupune herâ otecne â motâc erâ babasanaŋ wiac‐ticne râe‐fârewec. Ehuc ŋicwofuŋte ʒariŋ gieo Sela Opâ Nombâŋte sac i bahame raku Dawidire hae qizecko riri hukac ira fisiwec. 16 Eme ere tofanao iticnerâ Aʒibukere ŋokâ Nehemiazi bâpiaŋkeme raku Dawidire ʒâŋeruŋ gie ŋifecnao fisi fotâcnerâ opâ ʒâkâŋ jaba bakicne ira fisiwec; erâ irecnec fotâcnerâ ŋic qac momori jaŋere ficko fisiwec. Nehemia e Bete‐Zuru haere mâreŋ dâkâne soŋaŋkehuc juwec. 17 Eme ere tofanao iticnerâ Lewiŋic kecʒiŋuc jaŋe bâpiaŋkembiŋ: Banire ŋokâ Rehum, â ere tofanao iticnerâ Hasabiazi mâreŋ‐ticnao bâpiaŋkewec. Hasabia e Keila mâreŋ dâkâne moc qizeckerâ juwec. 18 Eme jahere tofanao iticnerâ qomâfâc‐jekic ʒiŋuc jaŋe bâpiaŋkembiŋ: Henadadire ŋokâ Bawai, e Keila mâreŋ dâkâne moc i qizeckerâ juwec. 19 Eme ere tofanao iticnerâ Jesuare ŋokâ Eʒerezi, heâŋ moc ʒâŋene Râricne ira ʒikare wiac guruckekicne irec ŋifecnao sac fowec i bâpiaŋkewec. Eʒere e Mizipa hae qizeckerâ juwec. 20 Eme ere tofanao iticnerâ Ʒabaire ŋokâ Barukuzi sac tofane moc Râricne irecnec bâpiaŋkeha raku taha bapa fekicne Eliasibire ficmotâcko fisiwec. 21 Ehame Uriare ŋokâ Hakozi ŋosa‐ticne Meremoti e tofane moc Eliasibire ficmotâckonec bâpiaŋkehame raku Eliasibire fic tofanao fisiwec. 22 Eme ere tofanao iticnerâ Jordaŋ Wâneŋte taha bapa jaŋe bâpiaŋkembiŋ. 23 Ehame jaŋere tofanao iticnerâ Benjamiŋ guru â Hasubu ŋic jaŋe ficjeŋic ŋifecnao sac fowec i bâpiaŋkembiŋ. Eme jaŋere tofanao iticnerâ Masejare ŋokâ Anania ŋosa‐ticne Aʒaria eki jahacne fic heririŋko sac fowec i bâpiaŋkewec. 24 Eme ere tofanao iticnerâ Henadadire ŋokâ Binuizi tofane moc Aʒariare fickonec fuŋkerâ bâpiaŋkehame raku Râricne ira fisiwec. 25 Erâ raku tuturuŋnao fisiwec. Eme Uʒaire ŋokâ Palalizi momori soŋaŋ jaŋere hae ʒoŋa heririŋnao ŋicwofuŋte fic faicnao ʒae fowec â Râricne irec ŋifecnao sac i bâpiaŋkewec. Eme ere tofanao iticnerâ Parosire ŋokâ Pedaja 26 â taha ufuŋte kiŋaŋ qaqa Ofele haeo jumbiŋ jaŋe Opâ Motâc â ʒae ferâ domawec irec ŋifecnao bâpiaŋkehapie raku masune mocko fisiwec. 27 Eme jaŋere tofanao iticnerâ Tekoi ŋic jaŋe tofane moc ʒae sâko ferâ domawec irec ŋifecnao bâpiaŋkehapie raku Ofele haere sacko fisiwec.

28 Ehame taha bapa jaŋe Becâsic Motâc faicnao buc buc ficjeŋic ŋifecnao sac bâpiaŋkembiŋ. 29 Eme jaŋere tofanao iticnerâ Imere ŋokâ‐ticne Zadoko e wâc iŋuc jaha ficticnere ŋifecnao bâpiaŋkewec. Eme ere tofanao iticnerâ Sekaniare ŋokâ Semajazi bâpiaŋkewec. Semaja e Ʒoaŋ Wewefunao Motâc irec soŋaŋ juwec. 30 Eme Semajare tofanao iticnerâ Selemiare ŋokâ Hanania â Zalafare ŋokâ namba 6 ʒâŋene Hanuŋ, jahe ŋondeŋne moc bâpiaŋkepic. Ehame jahere tofanao iticnerâ Berekiare ŋokâ Mesulamzi e jahacne ficmaŋ ŋifecnao bâpiaŋkewec. 31 Eme ere tofanao iticnerâ golzi eri wiac bapa ŋic jaŋeraonec moc, ʒâŋene Malikia, eki bâpiaŋkehame raku Bibiric Motâc ŋifecnao taha ufuŋte kiŋaŋ qaqafâc jaŋere fic â nareŋ gareŋ ŋic jaŋere fic ira fisi fotâcnerâ raku tuturuŋnere ficmaŋ faicne ira fisiwec. 32 Eme tuturuŋnere ficmaŋ faicne â Lama Motâc jahere ŋoŋondeŋko ira golzi eri wiac bapa ŋic â nareŋ gareŋ ŋic jaŋe bâpiaŋkembiŋ.