1 Eme Wofuŋzi Mose kecʒiŋuc âzâcnewec: 2 “Go qeŋ jajahec siliwa hedapirekicnezi bazemec. Eme qeŋ i hâcne qapie dâŋeha kikefuŋ jaŋe manahuc tumaŋnenʒepieŋ me teuŋ beherâ hata ranʒepieŋ. 3 Me mâmâc jaha qapie dâŋehapire kikefuŋ jaŋe manarâ tutumaŋ qoruc bozere motâcko gorao fisinʒepieŋ. 4 Me qeŋ mocjaha sawa qapie dâŋeme ine Israe ŋic gurune gurune jaŋere micnefâc jaŋe sawa gorao tumaŋnenʒepieŋ. 5 Ŋoŋe qeŋ bâsokahuc qapie ine ŋic ʒoaŋ wewefunaopec teuŋ âterâ ŋec foc eeŋgopieŋ jaŋe fuŋkerâ hatackenʒepieŋ. 6 Eme qeŋ bâsokahuc qapie arec jajahec eme ine juwic mâreŋkopec ŋec foc eeŋgopieŋ jaŋe hatackenʒepieŋ. 7 Kikefuŋ hetumaŋ‐jopaniŋte qeŋ bâsokahuc mâcne, bâpitiwahuc qanʒepieŋ. 8 Qeŋte dâŋ mukopac izi ŋoŋerao mimiŋzi ɋâric dâŋsanaŋ erâ forahuc juzejec. 9 Râsifâc‐ŋeŋic fific bacŋopaeŋgopieŋ jaŋe jopaniŋte ʒikao rahuc qeŋ bâsokahuc qapie Wofuŋ Anutu‐ŋeŋiczi ŋoŋere manasuhuc râsifâc‐ŋeŋic jaŋere meonec batarac‐ŋopazejec. 10 Ʒeri hombaŋ‐ŋeŋicko me hombaŋ muŋarekicnao, me mosa fufuŋkenao ira qowi bâzi me wama bâzi rikehuc qeŋ qanʒepieŋ wâc; qeŋ jahe ŋoŋere erâ Anutu‐ŋeŋicte maio dâŋepire Anutuzi manasuc‐ŋopazejec. Noni hâcne Wofuŋ Anutu‐ŋeŋic jukopac.”

11 Jara 2 irec mosa 2‐re ʒoaŋ gie bapa 20 ira karoraczi sâcmutâc dâŋte tiri bozeonec fahare fewec. 12 Eme Israe ŋic jaŋe biri‐jeŋic sâc Sinai mâreŋ burocnaonec fahare rahapie karoraczi Paraŋ mâreŋ burocnaonec waha herâ ŋewec. 13 Jaŋe Wofuŋzi Mose dâŋ âzâcne mutâc ewec i bâjâpehuc hata fuŋkerâ rambiŋ hâcne. 14 Judare gurufâc jaŋe maqâreŋ‐jeŋiczi bânie‐jareha birine birine fuŋkerâ rambiŋ, i Aminadare ŋokâ Nasoŋ eki micne bajareha iŋuc embiŋ. 15 Isasare gurufâc jaŋere micne i Zuarare ŋokâ Netanelezi juwec. 16 Â Sebuloŋte gurufâc jaŋere micne ine Heloŋte ŋokâ Eliabazi juwec.

17 Tiri boze batac qatara‐fârerâ qâzuckepie Geresoŋ â Merari jahere ɋâricfâc jaŋe tiri boze reŋkerâ jujumbieŋ jaŋe hâcne hata fuŋkembiŋ. 18 Erâ Rubeŋte gurufâc jaŋe maqâreŋ‐jeŋiczi bânie‐jareha birine birine rambiŋ, i Elizuru, Sedeure ŋokâ hâcne, eki micne bajareha iŋuc embiŋ. 19 Simeoŋte gurufâc jaŋere micne Zurisadaire ŋokâ Selumiezi juwec. 20 Â Gadere gurufâc jaŋere micne ine Reguelere ŋokâ Elisafazi juwec.

21 Eme jaŋere râpeo Kohatire ɋâricfâc jaŋe wiac tirine reŋkerâ rambiŋ. Rahapie bânierâ rambiŋ jaŋe tiri boze mocwâc bambiŋ. 22 Izi ine Eferaimte gurufâc jaŋe maqâreŋ‐jeŋiczi bânie‐jareha birine birine rambiŋ, i Elisama, Amihudure ŋokâ hâcne, eki micne bajareha iŋuc embiŋ. 23 Manasere gurufâc jaŋere micne Pedazure ŋokâ Gamaliezi juwec. 24 Â Benjamiŋte gurufâc jaŋere micne ine Gideonire ŋokâ Abidaŋzi juwec.

25 Eme ʒâhec jâmbâŋ Daŋte gurufâc jaŋe maqâreŋ‐jeŋiczi bânie‐jareha birine birine rakupie tarawec. Jaŋe Ahieʒe, Amisadaire ŋokâ hâcne, eki micne bajareha iŋuc embiŋ. 26 Asere gurufâc jaŋere micne i Okoraŋte ŋokâ Pagielezi juwec. 27 Â Naftalire gurufâc jaŋere micne ine Enaŋte ŋokâ Ahirazi juwec. 28 Israe ŋic guru sâc jaŋe faharerâ birine birine bâbâjâpec iŋuc hâcne rambiŋ.

29 Eme Mose e kimo‐ticne Reguele, Midiaŋ ŋic hâcne, ere ŋokâ Hobabi ʒiŋuc âzâcnewec: “Nâŋe Wofuŋzi ‘mâreŋ i ŋoŋere biŋe qakopac’ iŋuc muhuc mâreŋ nârewec ira razo eŋgopeneŋ. Wofuŋ e Israe ŋic nâŋe ehâmo‐nâreocte mupaŋkewecte go nâŋehec ratecne nâŋe wâc ehâmo‐garenaŋmu.” 30 Eki ine dâŋ ʒiŋuc bâtikiecnewec: “No ŋoŋehec mi rahuc no nahacne mâreŋko â wiacfâc‐nane jaŋerao risiepemu.” 31 Iŋuc mume Mosezi dâŋ ʒiŋuc bâtikiecnewec: “Go mi behec‐nâpocmurâ numu‐garekopac. Goki hâcne mâreŋ burocnao ju fofo eere fuŋne manakicte jowac‐nâpozemec. 32 Go nâŋehec racmuo ine Wofuŋzi nâŋe ehâmo‐nâreocmu sâc ijaha nâŋe go egarenaŋmu.”

33 Eme jaŋe Wofuŋte tiki beherâ rahuc juhapie ʒoaŋ gie bapa jahec â moc tarawec. Ehame Wofuŋte ʒâʒâfic katapazi ʒoaŋ jahec â moc jaha bânie‐jarehuc ŋec foc eniŋte hae mâreŋ hone tâcnewec. 34 Jaŋe teuŋ‐jeŋic behembiŋ sâc Wofuŋte karoraci ʒoaŋko bânie‐jarehuc juwec.

35 Eme katapa e hata rawec sâc Mosezi ʒiŋuc muhuc numuwec: “O Wofuŋ, go faharerâ râsifâcge batâtiec‐jopac, ehame qaisocgueŋgopieŋ jaŋe gore maionec wisenʒepieŋ.” 36 Me katapa e niniŋkerâ ŋewec sâc Mosezi ʒiŋuc muhuc numuwec: “O Wofuŋ, go Israe ŋic tauseŋ gurune gurune jaŋehec juzemec.”