1 Wofuŋzi Mose ʒiŋuc âzâcnewec: 2 “Israe ŋic Kanaaŋ mâreŋ jarepemu i hone tâcneniŋte ŋic 12 sorec‐jopazemec. Mamacfâc‐jeŋic jaŋere guruonec ŋic micne wâŋ wâŋ bâwosâec‐joparâ sorec‐jopate ranʒepieŋ.” 3 Iŋuc mume Mose e Wofuŋzi mutâcnecnewec irec sâcko Israe ŋic micne rowosâec‐joparâ Paraŋ mâreŋ burocnao sorec‐jopame rambiŋ. 4 Ʒâŋe‐jeŋic ine kecʒiŋuc: Rubeŋte guruonec Ʒakurure ŋokâ Samua. 5 Simeoŋte guruonec Horire ŋokâ Safati. 6 Judare guruonec Jefunere ŋokâ Kalebe. 7 Isasare guruonec Josefere ŋokâ Igali. 8 Eferaimte guruonec Nuŋte ŋokâ Hosea. 9 Benjamiŋte guruonec Rafure ŋokâ Palati. 10 Sebuloŋte guruonec Sodire ŋokâ Gadiele. 11 Josefere guruonec (Manase guru hâcne) Susire ŋokâ Gadi. 12 Daŋte guruonec Gemaliere ŋokâ Amiele. 13 Asere guruonec Mikaere ŋokâ Seturu. 14 Naftalire guruonec Wofisire ŋokâ Nabi. 15 Gadere guruonec Makire ŋokâ Geuele. 16 Mosezi ŋic mâreŋ hone tâcneniŋte sorec‐jopawec jaŋere ʒâŋe ine hâcne. Ehuc Mose e Hoseare ŋokâ Nuŋ ere ʒâŋe Josua muwec.

17 Eme Mose e ŋic i jaŋe Kanaaŋ mâreŋ hone tâcneniŋte dâŋ kecʒiŋuc jazahuc sorec‐jopawec: “Ŋoŋe Negebe mâreŋ râpenao tiki mâreŋ fokac ira feranʒepieŋ. 18 Ehuc mâreŋ irec fuŋne hone tâcnehuc ŋic ira juŋgopieŋ jaŋe sanaŋne me dodocne, bocjaha me afecne i mâmâc hone manac efârenʒepieŋ. 19 Erâ mâreŋ juŋgopieŋ i biaŋne me sâqocne, â hae‐jeŋic i jaba sawa me basanaŋ‐jopahuc bakicne, 20 erâ mâreŋ i guec sâkohec me mâreŋ kereŋne, erâ jâckâte‐ticne fokac me mâcne, i wâc mâmâc hone‐fârenʒepieŋ. Ŋoŋe hâbi hârohec eniŋ, ehuc mâreŋ irec fâri wiac gâcne bawarenʒepieŋ.” Rambiŋ i waiŋ fâri fufua dameŋko hâcne.

21 Eme jaŋe ferâ, Ziŋ mâreŋ burocnaonec raku Rehoboo, Hamati hae mendâŋko ira forakac mâreŋ i hone tâcnembiŋ. 22 Ehame Anakare ɋâricfâc Ahimaŋ, Sesai â Talamai jaŋe hâcne ira jumbiŋ. (Heboroŋ hae bambiŋ irec faicnao jara 7 tarame Aigita mâreŋko Zoaŋ hae bakicne.) 23 Eme jaŋe Esikola wâneŋko fisirâ waiŋ qaŋeŋne moc makenehec bâtâcnerâ ŋic jajaheczi reŋkepire risie warembiŋ. Ehuc wâc nemuja â jâchândâŋ gâcne i mâmâc bawarembiŋ. 24 Eme ŋic jaŋe waiŋ qaŋeŋne makenehec ira bâtâcnembiŋte hae mâreŋ irec ʒâŋe Esikola wâneŋ* Nâŋâcne dâŋko: Waiŋ makenehec bâtâcnekicne wâneŋ. mumbiŋ.

25 Eme mâreŋ hone tâcneniŋte rambiŋ jaŋe juhapie ʒoaŋ gie bapa 40 tarame risie warembiŋ. 26 Ehuc Mose â Aroŋ erâ Israe kikefuŋ sasawa Paraŋ mâreŋ burocnao Kadesi haeo jumbiŋ jaŋerao risie warembiŋ. Erâ dâŋ binaŋ ejarehuc mâreŋ hone tâcnembiŋ irec jâchândâŋ wiac jowatumbiŋ. 27 Ehuc Mose ʒiŋuc âzâcnembiŋ: “Sorec‐nâpomeŋ nâŋe mâreŋ ira sâcne ra fisimbeŋ. Mâreŋ i susu â baŋaczi fusucmarâ qâmbâriŋkehuc foekac irec hândâŋ fâri‐ticne ʒi hâcne. 28 Ŋic ira juŋgopieŋ jaŋe ŋic sanaŋne, â hae‐jeŋic i kâcɋene erâ basanaŋkehuc bakicne. Ira Anakare ɋâricfâc jupie honec‐jopambeŋ wâc. 29 Amaleke ŋic jaŋe Negebe mâreŋko juŋgopieŋ, â Hitiŋic â Jebusi ŋic erâ Amoŋŋic jaŋe tiki mâreŋko juŋgopieŋ; Kanaaŋ ŋic jaŋe ine hâwecmecko â Jordaŋ opâ heririŋnao ŋec juc eraŋgopieŋ.”

30 Kalebezi ine Mosere maio ŋic ŋokac mu bâmiriŋ ejarehuc kecʒiŋuc muwec: “Nâŋâc ʒiŋuczia ferâ mâreŋ i ro rauc enʒepeneŋ, nâŋâc sâcne sanaŋkerâ ro rauc enaŋmu.” 31 Iŋuc mume ŋic ehec rambiŋ jaŋe ine kecʒiŋuc mumbiŋ: “Ŋic keci jaŋere tâpirizi nâŋâcne tâpiri sirickerâ fokac, irec nâŋâc sâcne mi sanaŋke‐jarenaŋmu.” 32 Jaŋe iŋuc murâ mâreŋ hone tâcnembiŋ irec dâŋ binaŋ bipic tataranehec ʒuhuckerâ ejarepie Israe ŋic jaŋe manarâ hâbi‐jeŋic goroŋkewec. Ehame ʒiŋuc hâcne jazambiŋ: “Mâreŋ hone tâcnenaŋte fotâcnembeŋ izi hâcne ŋecjucfâc‐ticne ɋâcjopa‐fâreekac, erâ ŋic honec‐jopambeŋ jaŋe ŋic ʒoricne â sanaŋne sasawa. 33 Erâ ŋic soka makakicne, Anakare ɋâricfâc hâcne, jaŋe wâc honec‐jopambeŋ. Honec‐jopahuc nâŋe nâŋâcne manapene ɋirikiŋ jaŋere sâc juŋgopeneŋ tinac ewec, ehame jaŋe wâc honec‐nâpopie irec sâc jaha embeŋ.”