27
Ʒelofeha otâfâcne jaŋere dâŋ
1 Eme Josefere ŋokâ Manase ere ŋokâ Makiri ere ŋokâ Gileade ere ŋokâ Hefere ere ŋokâ Ʒelofeha ere otâfâc jaŋe dâŋ gie baniŋte fisimbiŋ. Jaŋere ʒâŋe ine kecʒiŋuc: Mala, Noa, Hogela, Milika erâ Tiriza. 2 Jaŋe hâcne tutumaŋ qoruc bozere motâcko Mose â taha bapa Eleaʒa erâ micne bapa â kikefuŋ jaŋere maio fuarâ kecʒiŋuc mumbiŋ: 3 “Mamac‐nâŋec e mâreŋ burocnao hâmowec, erâ e Kora â ŋicfâc‐ticne Wofuŋ râsi ecnehuc jumbiŋ jaŋere guruo mi juwec, aricne, e ŋokâ tâmiriczi e jahacne kiŋte erâ hâmowec. 4 Eme e ŋokâ tâmiric juwecte erâ ʒâŋe‐ticne garikiŋfâc‐ticne jaŋerao omaeme sâckeocmu me? Irec mamac‐nâŋecte hahac ɋafâc jaŋere ŋondeŋko mâreŋ moc nârenʒepieŋ wâc.”
5 Mose e ine dâŋjeŋic i Wofuŋte maio bafisiwec. 6 Eme Wofuŋzi Mose kecʒiŋuc âzâcnewec: 7 “Ʒelofeha otâfâc‐ticne jaŋe dâŋ muŋgopieŋ i manape sâckekac; irec go mamac‐jeŋicte hahac ɋafâc jaŋere ŋondeŋko mâreŋ moc jaretec ro rauc epie mamac‐jeŋicte mâreŋ izi jaŋere biŋe ezejec. 8 Ehame Israe ŋic ʒiŋuc jazazemec: ‘Ŋic moc e ŋokâ tâmiric juku hâmome mâreŋ‐ticnezi otâ‐ticnere biŋe ezejec. 9 Me otâ‐ticne moc mi jume mâreŋ‐ticne i hahac ɋafâcne jarepie jaŋere biŋe ezejec. 10 Me hahac ɋafâcne moc mi jupie ine mâreŋ‐ticne i mamac piticfâc‐ticne jarepie jaŋere biŋe ezejec. 11 Me mamac pitifâc‐ticne wâc mi jupie ine mâreŋ‐ticne i tuctofafâc‐ticne jaŋeraonec moc râcnepie ere biŋe ezejec. Dâŋ i Wofuŋzi Mose mutâcnecnewec irec sâc Israe ŋic jaŋere dâŋsanaŋ â mumutâc erâ forahuc juzejec.’ ”
12 Eme Wofuŋzi Mose ʒuhuckerâ ʒiŋuc âzâcnewec: “Go Abarim tikio ferâ, Israe ŋic mâreŋ jare tahac ekopac i honezemec. 13 Honerâ hahacge Aroŋ e mamacfâc‐ŋekic qâtec‐joparâ bâmowec iŋuc jaha goki qâtec‐joparâ hâmozemec. 14 Ŋohe hâcne Ziŋ mâreŋ burocnao kikefuŋ jaŋere maio opâ bâfuahuc ʒâŋe biŋe‐nane bâtirinicte mupe qatarapic.” (Meriba â Kadesi opâ i jahe Ziŋ mâreŋ burocnao fokopirec hâcne.) 15 Eme Mose e Wofuŋ ʒiŋuc âzâcnewec: 16 “Wofuŋ, go ŋic sasawa jaŋere Anutu juekiczi kikefuŋ jaŋere micne moc rowosâezemec. 17 Eme eki jowa qataŋ ejarehame ʒikao ranʒepieŋ â ekizia micne bajareha risienʒepieŋ. Ehame Wofuŋ gore kikefuŋ jaŋe lama guru soŋaŋ tâmiric iŋucne mi junʒepieŋ.” 18 Iŋuc mume Wofuŋzi Mose dâŋ ʒiŋuc bâtikiecnewec: “Go Nuŋte ŋokâ Josua e Mâro focnekacte rowosâerâ jambuŋkezemec. 19 Ehuc ecnetec taha bapa Eleaʒa â kikefuŋ ʒeŋgoma jaŋere maio domaha giere mufiriezemec. 20 Eme eki gore tuc qarâ tâpirihec eme Israe kikefuŋ jaŋe dâŋticne mana rereŋ enʒepieŋ. 21 E dameŋ sâc taha bapa Eleaʒa ere maio fuahuc juzejec. Eme Eleaʒazi ere âkehoc domahuc Wofuŋte maio ɋâsâi tirine qazejec. Ehame Wofuŋtaonec dâŋ weniŋuc fuaocmu i manarâ Josua â Israe kikefuŋ sasawa jaŋe hata ranʒepieŋ, erâ wâc risienʒepieŋ.” 22 Eme Mose e Wofuŋzi dâŋ mutâcnecnewec i renkehuc Josua ecneme eki taha bapa Eleaʒa â kikefuŋ sasawa jaŋere maio ra domawec. 23 Ehame Mose e Wofuŋzi dâŋ âzâcne mutâc ewec irec sâc ehuc jambuŋkerâ giere mufiriewec.