1 Eme Wofuŋzi Moabi wâneŋko Jordaŋ opâ heririŋ Jeriko hae ŋekac ira Mose kecʒiŋuc âzâcnewec: 2 “Go Israe ŋic mutâcne‐jaretec hae mâreŋ ro rauc embiŋ irecnec fic hae wiac gâcne Lewiŋic jarepie jaŋe ira ŋec juc enʒepieŋ. Erâ hae râreckehuc mâreŋ fokac i lama bulimakaofâc‐jeŋic jaŋere sapa eocte jarenʒepieŋ wâc. 3 Eme ŋic jaŋe hae ira ŋeŋe juju ehuc lama bulimakao â qowifâc‐jeŋic gâcne mâreŋ jareniŋmu ira râec‐jopapie junʒepieŋ. 4 Haesac râpenao mâreŋ râreckehuc forakac izi wâŋ tauseŋ kubi* 1 kubi i sâcmeta moc 18 inses me 46 senti meta irec sâc. ezejec. Eme mâreŋ irec tofanao Lewiŋic lama bulimakaofâc‐jeŋic jaŋere sapa fuazejec. 5 Ehame hae râpenao ʒoaŋ wewefunaopec sâc bapie 2 tauseŋ kubi ezejec, â juwic mâreŋkopec sâc bapie 2 tauseŋ kubi ezejec, â ʒoaŋ huhunaopec sâc bapie 2 tauseŋ kubi ezejec, erâ faic mâreŋkopec sâc bapie 2 tauseŋ kubi jaha ezejec; fic haezi ine ʒâʒâŋiŋko ŋehame mâreŋ ira hâcne lama bulimakaofâc‐jeŋic jaŋere sapa fuazejec. 6 Ŋeŋezic hae 6 ŋerakac i hâcne Lewiŋic jarenʒepieŋ, ehame ʒika qaqa ŋic jaŋe hae ira rarâ soŋkeniŋte mana‐jarenʒepieŋ. Ehuc hae 42 ʒuhuckerâ qikiŋne‐jarenʒepieŋ. 7 Hae mâreŋ jareniŋmu irec qâqâhâc ʒare 48 ezejec. 8 Israe ŋic jaŋe fic hae ro rauc embiŋ irecnec hae jareniŋmu ine guru kâcɋenezi hae bocjaha qikiŋne‐jarenʒepieŋ â guru piticnezi hae afecne qikiŋne‐jarenʒepieŋ. Ine hâcne, guru sâc fic hae wiac ro rauc embiŋ irec sâc manahuc Lewiŋic hae mâreŋ wiac qikiŋne‐jarenʒepieŋ.”

9 Eme Wofuŋzi Mose kecʒiŋuc âzâcnewec: 10 “Go Israe ŋic ʒiŋuc jazazemec: Ŋoŋe Jordaŋ opâ fotâcnerâ Kanaaŋ mâreŋko raʒinʒepieŋ. 11 Raʒirâ ŋeŋezic hae‐ŋeŋic bâwosâec‐jopapie ine ŋic moczi ŋic âgo‐ticne mi mana tarahuc qâhâmoocmuo ira ra soŋkezejec. 12 Okacne bazucnenʒipiŋte wiserâ hae ira ra soŋkerâ mi hâhâmo ɋâricne juhame kikefuŋ jaŋe fuŋne‐ticne bataniŋkenʒepieŋ. 13 Hae ine ŋeŋezic hae‐ŋeŋic 6 qikiŋne‐jarenʒepieŋ. 14 Ŋoŋe Jordaŋ opâ ʒiŋucpec hae 3 â Kanaaŋ mâreŋko hae 3 jaha ŋeŋezic hae‐jeŋic eocte qikiŋne‐jarenʒepieŋ. 15 Hae 6 i jaŋe hâcne Israe ŋic me ŋic furune me ŋondeŋ‐jeŋicko ŋic jaba jueŋgopieŋ jaŋere ŋeŋezic hae erâ ŋehapie ŋic moczi mi mana tarahuc ŋic âgo‐ticne moc qâhâmorâ ra ira soŋkezejec.

16 “Me aeŋ ɋaruczi ŋic qâhâmoc‐jopaeŋgopieŋ ɋaruc iŋucnezi ŋic âgo‐ticne qame hâmoocmuo ine ŋic e ʒika qaqa mucnerâ qâhâmonʒepieŋ. 17 Me qânâzi ŋic hehâmoc‐jopaeŋgopieŋ qânâ iŋucnezi heme hâmo‐jâmbâŋkeocmuo ine ŋic e ʒika qaqa mucnerâ qâhâmonʒepieŋ. 18 Me jâcɋaruczi ŋic qâhâmoc‐jopaeŋgopieŋ ɋaruc iŋucnezi qame hâmo‐jâmbâŋkeocmuo ine e ʒika qaqa mucnerâ qâhâmonʒepieŋ. 19 Okac babazu ŋic eki hâcne ʒika qaqa ŋic e bâfuarâ qâhâmozejec. 20 Me ŋic e ŋic âgo‐ticne qaisockehuc mezi heocmu, me somâ barâ fohuc wiac moc wickerâ hehâmoocmu, 21 me râsi ecnehuc mezi heme hâmoocmuo ine ŋic e ʒika qaqa mucnehuc qâhâmozo wâc. Okac babazu ŋic eki hâcne ʒika qaqa ŋic e bâfuarâ qâhâmozejec.

22 “Me râsi ecnehuc mezi mi heocmu, me somâ mi bacnehuc wiac moc kosa wickeme ŋic âgo‐ticne heocmu 23 me qânâzi ŋic hehâmoc‐jopaeŋgopieŋ qânâ iŋucnezi ŋic âgo‐ticne mi honehuc, me qa jâpec ecneocte wâc mi manasuhuc kosa wickeme ra hehâmoocmuo 24 ine kikefuŋ jaŋe ʒika qaqa ŋic â okac babazu ŋic jahere dâŋ i mumutâc dâŋ mukicne irec sâcko mutara‐jactenʒepieŋ. 25 Ehame kikefuŋ jaŋe ʒika qaqa ŋic ŋezickehuc okac babazu ŋic ere meonec batararâ ŋeŋezic haeo wiserâ rawec ira râepie juhame taha bapa sâko tiri wokemaŋ ruacnekicne ere hâmoc dameŋ maickezejec. 26 Me ʒika qaqa ŋic e ŋeŋezic haeo soŋkewec i beherâ râpenao hurâ juhame 27 okac babazu ŋic eki ware ŋic e bâfuarâ qâhâmome kiŋ tâmiric ezejec. 28 Ʒika qaqa ŋic e ŋeŋezic hae‐ticnao juhame taha bapa sâko ere hâmoc dameŋ maickezejec. Taha bapa sâko hâmone ine ʒika qaqa ŋic e hae mâreŋ‐ticnao risiezo murâ risiezejec.

29 “Irec wiac ʒiŋuczi ŋoŋere mumutâc â dâŋsanaŋ erâ ŋic gaŋne gaŋne fuarâ ŋec juc efeniŋmu sâc forahuc juzejec. 30 Ŋic izi me izi ŋic moc qâhâmoocmuo ine ʒika qaqa ŋic e fuŋne‐ticne mutaniŋkepie okacne bazucnehuc qâhâmozo wâc. Mâc ŋic mocjahazi sawa mutaniŋkeme ŋic e sâcne mi qâhâmozo. 31 Erâ ʒika qaqa ŋiczi juku hâmome hâmoc‐ticnere furi wâc mi ronʒepieŋ, e ine qâhâmo‐jâmbâŋkezo. 32 Me ŋoŋe ʒika qaqa ŋic eki ŋeŋezic hae‐ticnao wiserâ ra juweczi taha bapa sâkozi mi hâmoha mâreŋ‐ticnao risierâ juzo mume manacnehuc furi wâc mi ronʒepieŋ. 33 Ŋoŋe soc hoŋkehuc mâreŋ‐ŋeŋic mi hegâpârenʒepieŋ, soczi hâcne mâreŋ he gâpâreekac; â soc hoŋkekicne izi mâreŋte kiwiric sâcne wâc mi roocmu, ŋic soc hoŋkewec ere soczi ine sâcne rorone. 34 Ŋoŋe mecne â no mecne mâreŋ ŋec juc eeŋgopeneŋ i mi hegâpârenʒepieŋ, Wofuŋ noni hâcne Israe ŋic ŋoŋere ŋondeŋko ŋec juc eekopac.”