8
Maŋɋârâŋte mu baafec dâŋ
Maŋɋârâŋzi wirakac,
â mamana tarazi owackerâ dâŋ mukac,
irec hazec râerâ mananiŋ!
E tiki botâŋko mecne, hata sâko heririŋko mecne,
â hata ŋeŋehasicko mâmâc domahuc iŋuc ekac.
Erâ hae mendâŋko â haesac motâcko wâc domahuc
ʒiŋuc muhuc wirakac hâcne:
“O ŋicbureŋ, no ŋoŋe hâcne wira‐ŋarekopac,
â marac fânâŋ‐nane i mâreŋ sâc ŋic ʒeŋgoma ŋoŋerao fuakac.
Maŋhumuc juŋgopieŋ ŋoŋe mamana bâfuaniŋ,
â ŋic mutucne ŋoŋe maŋfânâŋhec eniŋ.
Ŋoŋe dâŋnane biaŋne i mana maŋ eniŋ,
micnaneonec dâŋ wahaekac i tiŋne sasawa.
No dâŋ muekopac i fârine sasawa,
â burecdâŋ ine qaisockeekopac.
No dâŋ jâmbomac sasawa muekopac,
sioc â mumusifuc dâŋ ine mi eekopac.
Ŋic mamana tarahec jaŋe dâŋnane mana tiŋneeŋgopieŋ;
â maŋ mamanasuhec jaŋe mana tara‐fâreeŋgopieŋ.
10 Ŋoŋ siliware manapie omane eha
dâŋnanere manapie fârine ezejec,
erâ gol ɋaɋacnere wâc manapie wawahane eha
mamana tara irec manapie furi sâko ezejec.
 
11 “Maŋɋârâŋ no qânâ furi sâko jaŋere sâc sirickeekopac,
â wiac furi sâko i me i nohec sâc hehene mi eekac.
12 Maŋɋârâŋ no mamana tara‐nanehec,
erâ mamana saric â mumutiŋ i wâc fonareekac.
13 Ŋic moc e Wofuŋ araŋ bacneocmuzi hehesic qikiŋneocmu
no irec hâcne sahac fefe â penaroŋ,
eebapa sâqocne â burecdâŋ i râpecke‐fâreekopac.
14 No mamana tara â tâpiri‐nanehec,
irec dâŋ manasu biric erâ fârine wâc bâfuaekopac.
15 No ŋicwofuŋ jaŋe guriŋ bapa gie baniŋte,
â ŋic fekicne jaŋe sâcmutâc dâŋ biaŋne râeniŋte bafic‐jopaekopac.
16 Mâreŋte guriŋ bapa ŋic,
gawamaŋ me ŋic ʒâŋe biŋehec
jaŋe noni hâcne dopec‐jopahape
gie‐jeŋic baeŋgopieŋ.
17 No maŋjauŋ enareeŋgopieŋ
jaŋe maŋjauŋ jaha wâc ejareekopac,
â wira basac enareeŋgopieŋzi bâfuacnueŋgopieŋ.
18 Norao hâcne mazuc mâriri â ʒâŋe biŋe,
erâ mumutiŋ â jujuhâmo bâbâfuane fokac.
19 Noraonec wiac roniŋmu i gol ematauckekicne
â siliwa ɋaɋacne irec sâc jâuruocmu.
20 No tiŋne jujure hatao raekopac,
ehuc ŋic jaŋere dâŋ mutiŋnehuc mutaraekopac.
21 Ehuc maŋjauŋ enareeŋgopieŋ jaŋe bafic‐jopahape
mafa mâriri fua‐jarerâ ficjeŋic fusucmaekac.
 
22 “Wofuŋ e wiac sasawa moc mi fuarâ foha
bâbâni no hâcne fuŋkerâ bâfuacnuwec.
23 E mârâc sasac jaha jâmbâŋ
mâreŋ sâko mâreŋ moc mi bâfuahuc
no hâcne râecnuwec.
24 Hâwec sâko me opâ ʒâŋe moc mi fuarâ foha
no hâcne fuapo.
25 Tiki kâcɋene â piticne jaŋe
ŋeŋe‐jeŋicko moc mi ŋehapie
noni hâcne fuapo.
26 Anutuzi mâreŋ me jufu sesuc
me mâreŋ qâhâcne huŋgaŋne mac moc mi bâfuaha
no hâcne fuarâ jupo.
27 No fuarâ juhape Anutuzi sawa qânikiŋ râewec,
â hâwec qaŋeŋne fâretiŋnewec.
28 Ehuc faic karorac qaratiewec
â juwic hâwec sâko ʒâŋene bâmârâŋkewec.
29 Erâ no fuarâ juhape jaha mâreŋte hobeteŋne râehuc
hâwec sâko fofo‐ticnao foocte mutaracnewec.
30 Ehame no ʒoaŋne ʒoaŋne Anuture heririŋko
ʒeri faio juhuc bubiaŋ bâfuacnepe
mana‐nareme biaŋkewec.
31 Iŋuc enareme mâreŋte manape ʒerine ewec,
â ŋic jaŋere wâc manape biaŋkewec.
 
32 “Irec ŋicmotecfâc‐nane, ŋoŋe dâŋnanere hazec râeniŋ,
erâ dâŋ ŋazaekopac i mana rereŋ ehuc juhâc qâhâmoniŋmu.
33 Dâŋ ŋaza qazuc ekicne i mana hâmonʒepieŋ,
erâ maŋɋârâŋhec juhuc mi qâsuanʒepieŋ.
34 No ŋic moczi kecʒiŋuc eocmu ere manape ʒerine eocmu:
Dâŋnanere hazec râeocmu,
me ʒoaŋne ʒoaŋne ficmotâc‐naneo fisirâ
motâc râpeo maŋɋârâŋ nore woŋec domaocmu.
35 Ŋic moc e no bâfuacnuocmuzi juju bâfuaocmu,
ehame Wofuŋzi manacneme biaŋkeocmu.
36 Me ŋic moc e no qaisocnuocmuzi
hâmocte aŋackeocmu hâcne.”