22
1 Ŋoŋe moneŋ mafa sâkohec eniŋte mâcne, ʒâŋe biŋehec juniŋte eŋarezejec, â ŋic jaŋe bubiaŋ qaŋareniŋmu irec manapie fefene eha siliwa â gol irec manapie wawahane ezejec.
2 Wofuŋzi mafaŋic â hapetac mâmâc bâfuac‐jopawecte fuŋne‐jekic bârâwiŋ mi fokac.
3 Ŋic maŋɋârâŋhec jaŋe sisipiriczi maic‐jopame honerâ kizueŋgopieŋ, â ŋic maŋɋârâŋ tâmiric jaŋe ine hone‐bipiehuc rarâ sipirickeeŋgopieŋ.
4 Go maŋhuhuŋ juhuc Wofuŋ araŋ bacnetec moneŋ mafa â ʒâŋe biŋe fua‐gareme dameŋ ʒora juhâc qâhâmocmu.
5 Go jujuge ŋezickezo murâ ine hata heririŋko wiwitic wiac râepie foha ŋic sindaŋne jaŋe raʒipie kicjopaekac i kizuzemec.
6 Go naru motec jaŋe juju hata biaŋne qazu‐jarezemec, eme jaŋe jufeniŋmu sâc irec manasuhuc juniŋmu.
7 Ŋic moneŋ mafahec jaŋe ŋic hapetac ŋicbomboŋ ejareeŋgopieŋ, â moneŋ hotâ roeŋgopieŋ jaŋe moneŋ jareeŋgopieŋ jaŋere mic sâcko gie baeŋgopieŋ.
8 Ŋic moc e wiac sindaŋnere gie baocmu e juku irec fârine sisipiric roocmu, bâbâtiŋ hâhâwicnezi fuacnehuc bâsiroweocmu hâcne.
9 Ŋic moc e afeckerâ nânâ wiac‐ticne ŋic hapetac kâdoc qajareocmu e jambuŋkezo.
10 Ŋic mu âke sisicne e jâpepie raha ŋoŋerao ʒika â mu qaqatarac erâ mumusifuc wiac gâcne i wâc omaeocmu.
11 Ŋic dâŋ wokemaŋnehec mueŋgopieŋ jaŋe ŋicwofuŋzi âgo ejareekac, â Wofuŋzi maŋ ɋaɋacne jueŋgopieŋ ŋic i jaŋere maname biaŋkeekac.
12 Wofuŋ e ŋic mamana tarahec jaŋere dâŋ dopeckeekac, â burecŋic jaŋere dâŋ ine qame wahaekac.
13 Ŋic ojoŋnezi dâŋ kecʒiŋuc muhuc ficko ŋeekac: “Laioŋzi hae ʒoŋao jukacte huhape nâcnuzackohec.”
14 Boe sau ŋokac ere dâŋ i nombâŋ iŋucne, irec Wofuŋzi qaisoc‐jopaekac jaŋe ira hâcne hueŋgopieŋ.
15 Naru motec jaŋe ɋieonecteaŋ fuŋkerâ wiac mutucne kosa eeŋgopieŋ, ehame bâbâtiŋko râec‐jopapene ine beherâ sâcne mac jueŋgopieŋ.
16 Ŋoŋe ŋic moneŋ mafa sâkohec wiac jare tahac eniŋmuo me ŋaŋac mafa mâririhec eniŋte ŋic hapetac bâʒâic‐jopaniŋmuo ine ŋoŋe ŋaŋacne hapetac erâ juniŋmu.
Ŋic maŋɋârâŋhec jaŋere dâŋbiri moc
17 Go hazec râehaŋtec ŋic maŋɋârâŋhec jaŋe dâŋ gâcne mumbiŋ i qazu‐garepe mamana gie bazemec. 18 Go iŋuc erâ ʒâhec manasuhuc ŋic gâcne jaza qazuc ehuc bubiaŋ manacmu. 19 Go Wofuŋtao roweckecmurâ manasuhuc maŋɋârâŋ dâŋ ʒi hâcne gaza mutâc ekopac. 20 No gore erâ maŋɋârâŋ â mumutâc dâŋ 30 sâko qâreŋkepo. 21 Erâ no dâŋ fâri qizecne qazu‐garepemu wâc, eme go irec mu wioc egarepie okacne bâtikie‐jarecmurâ mi eipiecmu.
1
22 Go ŋic hapetac e hapetac juekacte wiac‐ticne kâŋgâc mi jâoc rozemec, â ŋic moc e dâŋgieo wiʒec tâmiric domaha mu bawahac mi ecnezemec. 23 Wofuŋzi ŋic iŋucne jaŋe bafic‐jopahuc juju‐jeŋic jowac roeŋgopieŋ jaŋere juju jowac roocmu hâcne.
2
24 Go ŋic maŋʒochec jaŋe âgo mi ejarezemec. 25 Go jaŋere eebapazi bitiŋ egareha raʒitec kicguzacte jaŋerao mi qohotazemec.
3
26 Go ŋic mocte tofa bazucmurâ moc mi mupaŋkezemec. 27 Manakic, go mumupaŋgere fârine bâfuazo eipiehuc juhaŋtec wiac gâcne gowac rohuc fofo mâkige wâc mâmâc gowac roniŋmu.
4
28 Apa ŋosafâcge jaŋe mâreŋ ma râembiŋ i baʒic baefuc mi ezemec.
5
29 Ŋic moc e gie‐ticne basarickehuc baocmu e ŋic omane jaŋe mâcne, ŋicwofuŋ kiŋaŋ qaqajare irec sâc bâfuaocmu.