1 Ŋic sindaŋne jaŋe moczi mi jâpec‐jopaha jaŋac wiseeŋgopieŋ, â ŋic tiŋne jaŋe ine laioŋ iŋucne sanaŋkeeŋgopieŋ.

2 Ŋic guru moc jaŋe micne‐jeŋiczi mamana â maŋɋârâŋhec juhuc guriŋ bajareha sâcne sanaŋkerâ juniŋmu, â guru moc jaŋe qaqatara â hehesic boc bâfuapie micnefâc‐jeŋic jaŋe bâipiec‐joparâ ââkehoc eniŋmu.

3 Guriŋ bapa ŋic moczi ŋic hapetac bâʒâic‐jopaocmu e hoe mâŋâŋ sâkozi giegaŋ ima baekac irec sâc eocmu.

4 Ŋoŋe sâcmutâc dâŋ qatarahuc ŋic sindaŋne jaŋe bafic‐jopaniŋmu, â sâcmutâc dâŋ mana rereŋ eniŋmuo ine râsi ejareniŋmu.

5 Ŋic hehesicne jaŋe tiŋne hata kâuc baeŋgopieŋ, â Wofuŋ araŋ bacneeŋgopieŋ jaŋe ine mana taraeŋgopieŋ.

6 Ŋic hapetaczi siocmâc juocmu ere manapene fefene eocmu, â ŋic moneŋ mafa sâkoheczi siochec juocmu ere ine manapene wawahane eocmu.

7 Ŋicmotec moc e sâcmutâc dâŋ mana rereŋ eocmuzi maŋɋârâŋhec juocmu, â moc e ŋic kosa jujune jaŋe âgo ejareocmuzi ine mamac‐ticne mimi qaqa ecneocmu.

8 Ŋic moc e ŋic âgofâc‐ticne eatuc‐jopahuc wiac‐jeŋic sâctiri jowac rorâ e jahacne moneŋ mafa bâsokaocmuo ine Anutuzi mocwâc jâoc rorâ ŋic hapetac jare tahac eocmu.

9 Ŋic moczi sâcmutâc dâŋ mana rereŋ mi eocmu e Anutuzi nunumu‐ticnere maname mamakâcne eocmu.

10 Go ŋic sioc tâmiric moczi hata hehesicnao raocte manasuhuc doc barâ nombâŋ romeŋ ira go gahac hucmu; â bahac tâmiriczi ine furi sâko roocmu.

11 Ŋic moneŋ mafa sâkohec jaŋe jaŋacne manapie maŋɋârâŋhec juŋgopeneŋ eekac, â ŋic hapetac mamana tarahec jaŋe ine fuŋne‐jeŋic hone taraeŋgopieŋ.

12 Ŋic tiŋne jaŋe guriŋ bapa gie‐jeŋic tâpirihec bapie ŋic jaŋe ʒeŋgoma ʒeri eniŋmu, â ŋic sindaŋne jaŋe guriŋ bapa gie bapie ine ŋic jaŋe soŋkeniŋmu.

13 Ŋic moc e bahac‐ticne hesoŋkeocmuzi mi juhâmoocmu, â moc e bahac‐ticne mufuarâ râpeckeha Anutuzi aki anonoc ecneocmu.

14 Ŋic moc e Wofuŋ araŋ bacneocmu ere manapene ʒerine eocmu, â moc e maŋrâŋgeŋ bâfuaocmuzi ine sipirickeocmu.

15 Ŋic sindaŋne moczi ŋic hapetac guriŋ bajareha bititieniŋmu, e laioŋ â bea jahe nânâ opâre hâmohuc momori eekopirec irec sâc eocmu hâcne.

16 Guriŋ bapa ŋic moczi mamana tâmiric juhuc ŋic ʒâʒâicne eocmu, â moc e sioc wiac qikiŋneocmuzi ine guriŋ bapa gie‐ticne dameŋ ʒora barahuc juocmu.

17 Ŋic moc e ŋic âgonere soc hoŋkewecko ine ŋic moczi moc mi bafickeha wise wise jukuhame hâmoc dameŋ‐ticne maickezejec.

18 Ŋic moc e sioc tâmiric juhuc biaŋkeocmu, â moc e siochec juocmuzi sipirickeocmu.

19 Ŋic moc e gie‐ticne he sarac eocmuzi nânâ mâriri sâko bâfuaocmu, â moc e gie bapa dameŋ sipirickeocmuzi ine hapetac erâ juocmu.

20 Ŋic sioc tâmiric dameŋ ʒora juhâc qâhâmoocmu, â moc e moneŋ mafa sâkohec eocte ʒoɋac eocmu e ine bâbâtiŋ fuacneocmu.

21 Ŋic mana wosâc ejarepene mi sâckeocmu. Mumutara ŋic gâcne jaŋe bâbâmiriŋ moneŋ huŋgaŋne mac sawa rohuc wiac hehesicne eniŋte manapie mi quŋkeocmu.

22 Ŋic moc e wiac buchâro nâ bajuc eekaczi moneŋ mafa bâfuaocte ʒoɋac sâko ehuc ʒâhec roroc fuacneocmu i mi manasuocmu.

23 Ŋic âgoge mu bâtiŋ ecnetec ʒâhec mana‐gareme biaŋkeocmu, â wokemaŋ dâŋ ecnetec ine ʒâhec mana‐gareme sâqoreocmu.

24 Moc e neŋgoc mamac jahec‐ticne jahere wiac fiuc rohuc ʒiŋuc muocmu: “Izi bahac mi ekac,” iŋuc muocmu e sisipiric ŋic jaŋere âgo jaha eocmu.

25 Ŋic moc e nânâ âmbâŋ nâekaczi dâŋ bâfuaekac, â moc e Wofuŋtao roweckeekaczi ine juhâmoocmu.

26 Moc e jahacne maŋ mamanasuo roweckeocmuzi ŋic mutucne eocmu, â moc e ŋic maŋɋârâŋhec jaŋere dâŋ mana rereŋ eocmuzi ine juhâc qâhâmoocmu.

27 Ŋic moc e ŋic hapetac bafic‐jopaocmuzi sifu wiac moc mi basaocmu, â moc e hapetac hone takic ejareocmu e ine ŋic bocjaha jaŋe sâweckeniŋmu.

28 Ŋic sindaŋne jaŋe tâpirihec epie ŋic gâcne jaŋe soŋkeniŋmu, â tâpiri‐jeŋic omaeme ine ŋic tiŋne jaŋe mocwâc guriŋ bapa gie baniŋmu.