7
Anutu e mumutiŋte jâcne
1 O Wofuŋ Anutu‐nane, no gore dapeŋko soŋkekopac;
guriŋnuŋgopieŋ sasawa jaŋeraonec baficnurâ bataracnuc.
2 Râsi e laioŋ iŋucne kisucnuzackohec,
ehuc moczi mi ŋezicnuha omaecnuzackohec.
3 Wofuŋ Anutu‐nane, no keci jâmbomac epoo,
eebapa repicne menaneo bohotakacko,
4 no âgo moc wamane juha wiac gâgâpâcne ecnepoo,
me moczi râsi enareme nânâ mafa jâoc ropoo,
5 ine râsi e manacnehaŋ jâpecnuku bâfuacnuzejec,
erâ âtefacnume mâreŋko qarâ fozepac,
ehame ʒâŋe biŋe‐nane rufemaŋko duckezejec.
6 O Wofuŋ, go kimbeŋgehec faharec,
go râsifâc‐nane ʒonʒoŋ maickehuc fejarec,
go okac babazure dâŋ mumeŋzi nore erâ mana ɋâɋârec!
7 Ŋicne ŋicne jaŋe tumaŋnehuc rârecgunʒepieŋ,
eme jowaru‐fârerâ faic ocna ŋeŋegao ŋezemec.
8 Wofuŋ go ŋicne ŋicne dâŋ mutara‐jareekic.
No tiŋne‐nanere sâcko mutara‐narec, Wofuŋ;
norao maŋtaniŋ fokac, irec sâcko hâcne.
9 Ŋic sindaŋne jaŋere sâqocne omaeoc me!
Ŋic tiŋne ine goki kime dopec ecnezemec,
maŋ â mamanasu ba esâic ecneekiczi,
Anutu tiŋne rune go hâcne.
10 Anutuzi maro‐nane jukac,
eki hâcne ŋic maŋhumuc ŋezic‐jopaekac.
11 Anutu e mumutara tiŋne,
erâ e ʒoaŋne ʒoaŋne bune gâpâreekac.
12 Ŋic moc e maŋne mi bârisieme,
Anutuzi sâqe‐ticne ʒâmuekac.
Tepe‐ticnao gurutuc âteme hujec.
13 Ʒikare wiac hâmoc bâbâfuanehec bâmockewec,
tepe qâtâcneme ʒocbâruŋnehec ra kicjopaekac.
14 Manakic, ŋic moc e maŋticnao sâqocne râe qâzuc eekac,
eme sindaŋ kiweckehuc juku gibioc roekac.
15 E nombâŋ rorâ ba akic eekac,
erâ nombâŋ bâmockewecko e jahac huekac.
16 Sisipiric bâfuawec izi ŋerisierâ runere sahacko kiekac,
e jahacne sindaŋzi waha utu maine hefâuckeekac.
17 Wofuŋ mumutiŋ‐ticnere erâ daŋge âzâcnezepac,
Wofuŋ, Femicne sâko, ʒâŋe‐ticne mumuteŋ gae hecnezepac.