16
Wofuŋ e ŋicfâcne jaŋere maŋboreŋ fârine
1 O Anutu, go hone kitaŋ enarec,
no gore dapeŋko soŋkekopac.
2 No Wofuŋ âzâcnekopac, “Go Wofuŋ‐nane,
go maŋboreŋ‐nane mocjaha junarekic.”
3 Â mâreŋ ʒira mitiŋic juŋgopieŋ jaŋere mukopac,
jaŋe furi sâkofâc‐nane, jaŋerao aŋac‐nane fokac.
4 Nemu mocte wowosâe jaŋe maŋʒârâ bocjaha fua‐jareekac.
No soczi taha bapa gie‐jeŋicte takicnukac,
â nemu ʒâŋe‐jeŋic mu bâuac mi epemu.
5 Hesarac mâreŋ â nânâ kâdoc‐nane i Wofuŋzi ekac,
go hâcne mâreŋ biŋe‐nane basanaŋkekic.
6 Gaŋrukec mâreŋ biaŋnao râe‐narekicne,
merâfâc‐nane honepe aŋacne ekac.
7 Wofuŋ, dâŋ mu henunuc enareekac, e muafeckekopac,
ŋafeo buhândâŋ‐nanezi wâc mu qâmoc enareekac.
8 No Wofuŋ maŋzi fârepe mai‐naneo domahuc juekac,
e fâre‐naneo domaha biric boroc mi epemu.
9 Irec bunane biaŋkeme maŋzi mu ʒeri ekopac,
erâ sahac‐nanezi wâc sâcne ŋec foc eocmu.
10 Go qaisocnutec hâmoc haeo mi ʒâziŋkepemu,
â tiriŋicge behetec gârecke ʒaŋ mi eocmu.
11 Go jujure hata nowatuekomec;
go hâcne juekicko bubiaŋ guru fufusuc fokac,
mefâregao aŋac bajukic i mi tatarane.