31
Ʒârâ hâriŋ maŋko Wofuŋtao roweckehuc numucnezo
1 O Wofuŋ, no gore dapeŋko soŋkekopac;
qurutuapemurâ moc mi mana‐narezemec,
tiŋnegere erâ bataracnuzemec.
2 Noraopec hazec râec, tarec jaha bataracnuc!
Qânâuŋ enarehuc sabecnuc!
Huec sanaŋ enarehuc ŋezicnuc!
3 Ine hâcne, qânâuŋ â huec‐nane domakomec;
ʒâŋe biŋegere erâ jowa qataŋ enarec.
4 Bitiŋ soŋsoŋko râe‐narembiŋkonec unucnuc,
go hâcne dapeŋ‐nane jukomec.
5 Megao maŋ qâqâtâc‐nane râekopac,
goki furi‐nane bameŋ, o Wofuŋ, erâ‐eesanaŋ Anutu.
6 Nemuɋâŋ jabane bajueŋgopieŋ jaŋere takicguekac,
no ine Wofuŋ gorao qohotaekopac.
7 No aki anonocgere aŋacnuha bubiaŋ manakopac,
goki huacbuc‐nane ʒâŋitameŋte,
â maŋʒârâ fua‐nareha hone jauŋ enaremeŋte.
8 Erâ râsifâc‐nane jaŋere meo mi râecnuhuc,
kike‐nane tomao râetec âte sanaŋkepo.
9 O Wofuŋ, no bugâpâcko jukopacte aki anonoc enarec;
ki busâqoc ekupe ʒâŋe‐nane kitutuckekac,
erâ maŋ qâqâtâc â sahac‐nane betaŋkekac.
10 Busâqocko juhape juju‐nane omaezo ekac,
husehuc juhape jara‐nane tarazo ekac.
Qarâ suriŋne jukuhape tâpiri‐nane wahakac,
â me kike‐nane hâmo ɋaŋac ekac.
11 Kisâfâc‐nane sasawa nifepupu enareeŋgopieŋ,
qomâfâc‐nane jaŋe bâec bacnueŋgopieŋ;
manacnuŋgopieŋ jaŋe hâhâwic banareeŋgopieŋ,
hae ʒoŋao honecnueŋgopieŋzi wise‐nareeŋgopieŋ.
12 Hâmokicne jaŋere nikec‐jopaekac iŋuc nore ninikec fuakac,
kuʒi qanʒaŋnekicne tinac ekopac.
13 Bocjahazi saŋuc ʒiŋuc qapie manaekopac: “Wiac hâhâwicne.”
Ehuc juju‐nane nowac roniŋte turerâ
dâŋ nazaŋ gazaŋ eeŋgopieŋ.
14 No ine Wofuŋ go manasiŋguhuc ʒiŋuc muekopac:
“Go nore Anutu.”
15 Dameŋ‐nane gore meo fokac;
râsi enarehuc guriŋnueŋgopieŋ,
jaŋere meonec bataracnuzemec.
16 Ʒâŋe maigezi kiŋaŋŋicge no tamae‐narezejec;
aki anonocgezi baficnuzemec.
17 O Wofuŋ, go wâsicgukopacte,
qurutuapemurâ moc mi mana‐narezemec.
Ŋic sindaŋne jaŋe qurutuahuc,
dâŋ fâsâe‐jareha hâmoc haeo hunʒepieŋ.
18 Burecŋiczi penaroŋ â sahac fefe ehuc,
ŋic tiŋne juekac e musoriŋkeeŋgopieŋ,
jaŋe nâŋguŋ enʒepieŋ.
19 Buurucge i araŋ bagareeŋgopieŋ jaŋe bâmocke‐jaremeŋ,
erâ buuruc hâcne ŋicmaio gore dapeŋko soŋkeeŋgopieŋ jaŋe bâfua‐jaremeŋ,
buuruc i mo iŋucne sâko!
20 Go ʒâŋe maigere sâsâoczi
ŋic jaŋere ʒikadâŋte sabec‐jopaekic.
Go bozegao soŋjopatec,
râsidâŋzi mi sipiric‐jopaekac.
21 No Wofuŋ mumbiaŋkepe!
E hae sanaŋko juhape mâsi bahuc,
aki anonoc‐ticne bâfua‐narewec.
22 No jâmbomac hâwicnume mupo,
“Ʒâŋe maigaonec bârâriecnurâ taicko râecnukicne.”
Eme baficnucmurâ kuku qagarepe,
sifu ki owa‐nane manameŋ.
23 Mitiŋicfâc‐ticne sasawa, ŋoŋe Wofuŋ maŋzi jauŋkeniŋ!
Ŋic siocmâc jaŋe Wofuŋzi hone kitaŋ ejareekac,
maŋfefe jaŋe ine okacne bafehuc jareekac.
24 Wofuŋte woŋec juŋgopieŋ sasawa,
ŋoŋe hâbi‐ŋeŋic ronʒepieŋ â maŋŋeŋic mi wahazejec.