51
Sâqocne mumufua
1 O Anutu, go aki anonocgere erâ nore buge sâqoreoc,
buurucge fufusuc fokac irec sâcko kiŋ bahac‐nane bâtâmirec.
2 Hehesic‐nane ʒure bataniŋ enare‐fârec,
â sâqocne‐nane bârâriehuc baɋaɋacnuc.
3 No bahac‐nane hone tarakopac,
â sâqocne‐nanezi mai enarehuc jukac.
4 Sâqocne bahuc go hâcne bugao bapo,
â wiac epo i goki honetec repirekac.
Go mumutiŋgezi dâŋfâri eocmu,
â mumutaragezi ɋaɋacne eocmu.
5 Jei, no hehesic maŋkonec fuapo,
â neŋgoczi sâqocnehec kiwecnuwec.
6 Jei, maŋzi siocmâc foocte egareekac;
maŋfâhâŋko mamana fârine qazu‐narec.
7 Sanu rehaczi bataniŋnutec ɋaɋackezepac,
ʒurecnutec sinoure sâc sirickehuc qaŋqaŋ fuazepac.
8 Ʒeri bubiaŋzi bâfusecnuzemec,
eme me kike qambaŋaŋkemeŋ i mocwâc biaŋkezejec.
9 Sâqocne‐nanere ʒâŋe maige bâsoŋkezemec,
â bahac‐nane bâtâmire‐fârezemec.
10 O Anutu, go maŋɋaɋac bâfua‐narezemec,
â mâro ɋâricne râe‐naretec maŋkehuc qiŋ hezepac.
11 Ʒâŋe maigaonec mi sârocnuzemec,
â gore Tiri Mâro mi nowac roc.
12 Bâbâpiaŋgere aŋac mocwâc heɋâre‐narec,
â micrereŋte aafec bâfua‐narec.
13 Eme no qaqatara ŋic hatage qazu‐jarepe,
â sâqocne bapazi maŋjeŋic gorao bârisienʒepieŋ.
14 Anutu, bâbâpiaŋ‐nanere Anutu, go soc rurua fuazacte baficnuc;
eme nameŋ‐nanezi tiŋnegere mu ʒeri ezejec.
15 O Wofuŋ, go bipic‐nane baandaŋnec,
eme micnanezi mumuteŋge musokazejec.
16 Go taha babagarere mi aŋacguekac;
no bâzi rike‐garepe manatec mi sâckezac.
17 Ŋicmaŋ busâqoczi kidapekicne irec Anutuzi maname
taha bâzi fârine eocmu.
O Anutu, ŋicmaŋ busâqoczi kidapekicne
â bâuruŋkekicne i goki mi suŋgiŋkecmu.
18 Aki anonocgere sâcko Zioŋ ehâmocnezemec;
ehuc Jerusalemte qânâsac heɋârezemec.
19 Eme taha bâzi jâmbâŋte aŋacguocmu,
qowi bâzi â bâzi hâcbuc rikekicne,
eme bulimakao ŋicne alatagao rike‐garezo.