58
Bâbâsifuc gâgâpâcne irec okacne hâhâwicne fuaocmu
1 Nemu ŋoŋe jâmbomac mumutara gie fârine baeŋgopieŋ?
Ŋoŋe mâreŋŋic dâŋjeŋic tiŋnea mutaraeŋgopieŋ?
2 Aricne, maŋzi bâbâsifuc mana biric eeŋgopieŋ,
â mâreŋko jâjâiŋ bâbâʒâic kâdoc qajareeŋgopieŋ.
3 Sindaŋŋic jaŋe neŋgoc bumaŋkonecteaŋ qac qâsoric eeŋgopieŋ,
fuarâ izia qâsoriehuc burecdâŋ eeŋgopieŋ.
4 Marasiŋ sâqocne homa iŋucne kisoŋne jueŋgopieŋ,
sopâc homa qepoŋne ere sâc hâcne.
5 E qaŋgec bapa dâŋmarac‐jeŋic mi manaekac,
qaŋgecte fuŋne mamanazi emâmâŋkeekac.
6 O Anutu, goki micsiec‐jeŋic qanʒaŋnec,
Wofuŋ, go laioŋ motec ʒuŋe‐jeŋic unuckec!
7 Ejaretec opâ iŋucne ŋetâtiehuc omaenʒepieŋ,
qinʒiŋ iŋucne ɋaŋa ururuc erâ hâmonʒepieŋ.
8 Gâwâc hahaczi ŋeŋerâ raku hâmo ʒaŋ eekac iŋucne,
me ŋokac kiwecheczi dameŋne mi maickeha kogoc rome,
bumâŋ‐ticnere fârinezi tatamac mi honehuc omaeekac iŋucne.
9 Kuʒi ɋâricne ʒoczi mi ʒasanaŋkeha qâtipepie raekac,
irec sâc hetapaic‐jopatec ratâmirenʒepieŋ.
10 Tiŋne jujuzi okac babazu honerâ ʒeri eocmu;
kike‐ticnezi sindaŋŋic ere soc ruaocmu.
11 Eme ŋic jaŋe muniŋmu,
“Jâmbomac, tiŋne jujuzi furi bâfuaekac;
jâmbomac, Anutu jukac, ehuc mâreŋko mumutara gie baekac.”