62
Anuture maio niniŋkehuc fuŋne‐nâŋec manazo
1 Maŋ qâqâtâc‐nanezi Anuturao ʒâŋe fihuc niniŋkekac,
eraonec bâbâpiaŋ fisi‐nareekac.
2 Eki sawa qânâ sanaŋ â babafic‐nane ekac,
erâ huec‐nane ekacte qiriŋ boc mi qapemu.
3 Ŋoŋe ŋic moctao quruŋ herâ ra tuŋkezo muŋgopieŋ,
qânâsac hârehuc otewekicne iŋucne waha qarâ foocte,
mâsi i wezimucko beheniŋmu?
4 Ine hâcne e ʒai ʒoŋʒoŋ‐ticnehec domakacte bawahazo muŋgopieŋ.
Burecte aŋac sâko‐jeŋic fokacte,
miczi mumbiaŋkehuc maŋzi sopeckeeŋgopieŋ.
5 Maŋ qâqâtâc‐nane, go Anuturao ʒâŋe fihuc niniŋkezemec,
erao mamanac‐nane fokac.
6 Eki sawa qânâ sanaŋ â babafic‐nane ekac,
erâ huec‐nane ekacte qiriŋ boc mi qapemu.
7 Bâbâpiaŋ â ʒâŋe biŋe‐nanere ŋesiŋ i Anutu;
Anutu e huec sanaŋ â qânâuŋ‐nane.
8 O qomâfâc‐nane, ŋoŋe erao dameŋ sâc roweckenʒepieŋ,
maŋŋeŋicte fuŋne e bataniŋkecnenʒepieŋ;
Anutu e hâcne qânâuŋ‐nâŋec ekac.
9 Mâreŋŋic jaŋe nokafe sawa,
ŋicbomboŋ jaŋe wâc ɋârâc ɋârâcne,
ŋemâc bâbâfuare sâcko mâmâc afecke‐fâreniŋmu,
mâmâc nokafere sâc jaha eniŋmu.
10 Jâiŋko wiac hohotâckere mi manasunʒepieŋ,
fiuckonec wiac bâbâfuare maŋgâc wâc mi enʒepieŋ;
â moneŋ mafa sawe‐ŋareocmuo,
ine ira mi mana utuckenʒepieŋ.
11 Anutuzi dâŋ moc muwec i manape arecne 2 ewec:
Tâpiri rune i Anutu noni jukopac.
12 Erâ Wofuŋ, goki aki anonoc rauckehuc,
ŋic eebapa‐jeŋicte furine jareekic.