64
Anutuzi râsi repicne okacne jarekac
1 O Anutu, no mu huacbuc epe mana‐narec,
râsizi mu hâhâwic enarekacte juju‐nane sabeckec.
2 Ŋic sindaŋne jaŋe kamiehuc doc bacnuŋgopieŋte,
â sâqocne bapa jaŋe dâŋ qanareŋgopieŋte soŋnuc.
3 Jaŋe nameŋ‐jeŋic ʒâmukupie sâqe iŋucne eekac,
dâŋ hâtânezi tepe motec ejareme tikocko heeŋgopieŋ.
4 Erâ somâckerâ fohuc ŋic bahacmâc qâtâcnecneeŋgopieŋ,
hâwicmâc ɋeŋfâfâc muruniŋte.
5 Wiac repicne eniŋte qaqafeŋ eeŋgopieŋ,
kamiehuc bitiŋ râeniŋte muc manac eeŋgopieŋ,
ehuc mueŋgopieŋ, “Mozi honec‐nâpoocmu?
6 Mozi sindaŋ gie‐nâŋecte fuŋne rituocmu?
Nâŋâc hatane soŋsoŋ foocte mana sarickehuc ʒaeckembeneŋ.”
Ŋic maŋ mamanasu‐ticne utuckekicne fokac.
7 Ehame Anuture tepe moteczi kicjopaocmu,
ɋeŋnea muruc‐jopame fâfâreniŋmu.
8 Jaŋacne nameŋzi hehawic‐jopame rândiŋkepie
honec‐jopaniŋmuzi mu ruruc ejareniŋmu.
9 Eme ŋic sasawa jaŋe hâhâwic mananiŋmu;
ehuc Anutuzi wiac ekac irec mu binaŋ eniŋmu,
â eebapa‐ticnere manatâc qâtâc eniŋmu.
10 Ŋic tiŋnezi Wofuŋte bubiaŋ mananʒepieŋ,
â ere dapeŋko soŋkenʒepieŋ.
Maŋsioc tâmiric sasawa jaŋe mu ʒeri enʒepieŋ.