72
Ŋicwofuŋte bubiaŋ dâŋ
1 O Anutu, go mumutiŋge ŋicwofuŋ tahackezemec,
ŋicwofuŋte ŋokâ tiŋne jujuge râcnezemec.
2 E ŋic ŋokac gurufâcge dâŋjeŋic mutiŋnehuc muzejec,
â hapetacfâcge sâcmutâc dâŋte sâcko ejarezejec.
3 Tiki jaŋe mâreŋ rune mâriri bâfua‐jarenʒepieŋ,
â mâreŋ facne jaŋe iŋuc jaha.
4 E ine hapetac ŋezic‐jopahuc dâŋjeŋic muzejec,
qarâ suriŋne kime dopec ejarezejec,
â fejareeŋgopieŋ ine bâuruŋ‐jopazejec.
5 Juju dameŋ‐ticne i ʒoaŋ qahuc juocmu irec sâc juzejec,
erâ wâc mosa ŋehuc juocmu sâc, dameŋne dameŋne.
6 Hoezi qinʒiŋ qakicnao heekac, e irec sâc ezejec,
â mâreŋ kereŋne bâgunuckeekac iŋucne.
7 Juju dameŋ‐ticnao ŋic tiŋnezi jusarickenʒepieŋ,
â wama fohuc jaha juha mosa hâmozejec.
8 Hae mâreŋ ruckeocmu i ŋifec hâwecko fisizejec,
â ŋifec hâweckoa ratarazejec,
erâ Eufrata opâ sâkoonec domarâ raku
mâreŋ qaŋeŋnao mickezejec.
9 Râsifâcne jaŋe maŋfuŋnao fodapenʒepieŋ,
kisâfâcne rufe muduckenʒepieŋ.
10 Tarasisionec â nucne nucne irec ŋicwofuŋ
jaŋe taha bacne fisinʒepieŋ;
Arabia â Etiopia mâreŋkonec micne bapa
jaŋe sahac taha râcnenʒepieŋ.
11 Ŋicwofuŋ sasawa jaŋe dieŋzi hecnenʒepieŋ,
ŋicguru ʒeŋgoma kiŋaŋ qacnenʒepieŋ.
12 E ŋic hapetaczi kuku qacneme hone kitaŋ ecneocmu,
â qarâ suriŋne me hone bafic tâmiric e iŋuc jaha ecneocmu.
13 Ŋic bebetaŋne â hapetac ere bune sâqoreocmu,
â tac qararacne juju‐jeŋic sabeckeocmu.
14 Fific guguriŋ â bâbâʒâic maic‐jopaha batarac‐jopaocmu,
â socjeŋicte maname furi sâko ekac.
15 E dameŋ ʒora juzejec,
â Saba mâreŋkonec gol tahackenʒepieŋ.
Ere erâ ʒuʒuhuc numuhuc junʒepieŋ,
ehame Anuture jambuŋzi erao wahahuc juzejec.
16 Nânâ monʒaŋ mazuc mâriri fuazejec,
tikine tikine sawe mâririackezejec;
jufu mumuc Lebanoŋte sâc ezejec.
Haene haene ŋic ŋokac fua sawec enʒepieŋ,
kecɋaŋzi gieo fuaekac iŋucne.
17 Ʒâŋe biŋe‐ticne fofo sanaŋ foraʒizejec,
ʒoaŋzi ŋeŋe sanaŋ ŋeekac irec sâc.
Ŋiczi ere ʒâŋeo iticnehuc jajambuŋ enʒepieŋ,
â ŋicne ŋicne e muteŋkenʒepieŋ.
18 Wofuŋ, Israere Anutu, e muteŋkezo,
e buc mâsi sâko baekac.
19 Tatamac ʒâŋe‐ticne muteŋkehuc juzo,
eri tatamac‐ticnezi mâreŋ sâko mâreŋ fusezejec.
Jâmbomac jâmbâŋ.
20 Dawidi, Isaire ŋokâ, ere nunumu gae ʒira tarakac.